03.10.2017 16:30
Статьяос
Финн-угор дуннеын этнотуризм аслаз сюресэзъя азинске

Финн-угор дуннеын этнотуризм аслаз сюресэзъя азинске

Фото: Григорий Фомин
Сыктывкар / Россиын

Кунысьтымы пӧртэм улосвылъёсын этнотуризм ас сюресэзъя азинске. Сыӵе йылпумъянэ вуизы 27–29 куарусёнэ Сыктывкарын ортчем Россиысь финн-угор калыкъёслэн 6-тӥ ӧтчамазы «Лулчеберет. Этнотуризм» секцие пыриськисьёс.

Удмуртиысь Архитертурая но этнографияя «Лудорвай» музей-заповедникен кивалтӥсь Татьяна Шкляева асьме элькунысь этнотуризмъя югдурез возьматӥз. Солэн верамезъя, улосвыламы та ӧр туж умой но тунсыко азинске. Туннэ нуналлы пӧртэм ёросъёсын, пӧртэм гуртъёсын музейёс, удмурт коркаос, лулчебертеъя этноцентръёс усьтӥсько.

«Туннэ тросэз лулчеберетъя ужъюртъёс но басьто асьсэлы сыӵе ӧр — туристъёсты асьсэ доры кыскыны. Мон малпасько, асьме культурая министерствоен но туж шонер ужрад пуктэмын, визь-кенеш сётэмын ёросъёслы, гуртъёслы туризмен ужано шуыса, малы ке шуоно али котькуд лулчеберетъя ужъюрт экономикая рельсъёсы пуктэмын
Татьяна Шкляева

«Лудорвай» музей-заповедникен кивалтӥсь малпамъя, лулчеберет удысын ужаськод ке, калыклы синмаськымон но адӟем карымон ужрад лэсьтэм потэ. Котькудӥз но али озьы ужаны тырше, соин ик этнотуризм удыс азьмынӥсьёс пӧлын ӧвӧл ке но, со аслаз сюресэныз азинске. Кылсярысь, та дыре Удмуртиын возьматымон интыос вань, соос пӧлын Шарканысь Тол Бабайлэн удмурт шӧмын пыӵатэм юртэз. Нош Грак ёросын Баба-Ягалэн коркаез шулдыръяськон поннагес ке но малпамын, сое но этнотуризм пӧлы пыртыны луэ.

Удмурт калык праздникъёс, шулдыръяськонъёс, сям-йылолъёс, удмурт дӥсьёс но йӧскалык сиён-юон — ваньзэ сое асьмеос ӵектыны быгатӥськом элькунэ вуэм куноослы.

«Удмурт гуртъёсын кылемын на вашкала коркаоссы но, лыдӟетъюртъёссы но. Ваньмыз со пыӵатэмын удмуртлыкен. Со вашкала коркаосты луэ басьтыны но, чеберманы но, радъяны но», — вера Татьяна Шкляева.

Со сяна, туннэ нуналлы котькуд гуртын вань фольклор ансамбль. Со — гуртлэн узырлыкез, кудӥз отын улӥсь калыклэсь данзэ но историзэ кырӟанъёс но эктонъёс пыр возьматэ.

«Лудорвай» музей-заповедникын туннэ вань шор, уйпал но лымшор ёросъёсысь удмуртъёслэн, ӟучъёслэн юртъеръёссы. 2018-тӥ арын бесерманъёслэн юртъерзы кылдоз шуыса чаклало. Со сяна, бигеръёслэсь улон-вылонзэс возьматӥсь ёзэт кылдытыны малпало.

Татьяна Шкляева верамъя, та вакытэ гурт калык усьтӥськемгес луиз. Соос понна туристъёс огшоры куноос гинэ ӧвӧл, туристъёс — со кема возьмам куноос, кудъёсыз йӧскалык аспӧртэмлыкен тодматскыны дасесь.

Мукет финн-угор калыкъёс, но этнотуризмлы саклык висъяло. Кылсярысь Карел Элькунысь Кижи шормуӵын сыӵе ик нимо музей-заповедник ужа. Отын Карелиысь выжы калыкъёслэн юртъеръёсынызы тодматскыны луэ. Музейын карел, вепс но ӟуч секторъёс гуртъёсысь ваем калыкъёслэн вашкала коркаоссылэсь лэсьтэмын.

«Этнокультурая таӵе огъетъёсты лэсьтон калыклэн лулчеберетэныз тодматскыны юрттэ. <…> Карелие лыктыса, вань интыосы вуылыны туж шуг, соин ик милям малпанмы кылдӥз, выжы калыкъёслэсь секторъёссэс Кижи шормуӵын одӥг интые люкано шуыса», — валэктэ «Кижи» музей-заповедникысь ӧнерчи Анна Анхимова.

"Кижи" музейысь одӥгез юрт
«Кижи» музей-заповедникысь одӥгез юрт Фото: Майя Бывальцева © udmurt.media

Туннэ нуналлы музейын карелъёслэсь, вепсъёслэсь но ӟучьёслэсь лулчеберетсэс крезьгур фольклор, этнографияя ужрадъёс, пумиськонъёс но мастер-классъёс пыр возьмато. Кылсярысь, киуж ӧнерез улӟытонъя бадӟым уж лэсьтӥське, куке туристъёс усточилэсь ужамзэ адӟыны яке асьсэос уже пыриськыны быгато.

«Кижиысь» ӧнерчиос туристъёслы кельшымон выль тунсыко амалъёс утчало. Та вакытэ дэмланъёс пӧлысь тужгес трос калык бичасез — карел сиён-юон лэсьтонъя мастер-класс, отын куноос йӧскалык карел пӧрамез — калиткаез — веръяны яке асьсэос пӧраны быгато.

Анна Анхимова верамъя, та удысын туж кулэез — со туристъёслэн тунсыкъяськонзы. Кылсярысь, сиён-юонэн тодматскон куноослы матысь кык аръёсы тунсыко луоз.

Вепсъёслэсь аспӧртэмлыксэс, «Кижи» музейын сяна, Ленинград улосвылын но возьмато. Винницы черкогуртын Вепс фольклор центр ужа. Та дыре куноослы экскурсия дэмланы быгато. Отчы йӧскалык сиён пӧранъя, веник керттонъя, вепс кадриль эктонъя, но мукет мастер-классъёс пыро.

«Озьы ик ми вепс кылын мунё театр, вепс музейын экскурсия но вепс калыклэн лулчеберетэз, сям-йылолъёсыз но „Улон писпу“ („Дерево жизни“) праздник сярысь фильмъёс возьматыны быгатӥськом
Мария Лапикова, Вепс фольклор центрысь ӧнерчи

Со верамъя, туж умой юрттэт катбыдэсъясь тӧрлыклэсь шӧдске. Выжы калыклэсь лулчеберетсэ азинтонъя ӵектосъёс пӧртэм программаосъя лэсьтӥсько. Мария Лапикова пусйиз, центр ассэ возьыны тырмымон коньдон поттэ. Озьы ке но, солэн кылъёсызъя, коньдон лэсьтон ужпум валтӥсь интыын уг сылы, валтӥсь ужпумзы — лулчеберетэз азинтон.

Ватсалом, этнотуризм удысэз Россиысь финн-угор калыкъёслэн 6-тӥ ӧтчамзылэн резолюцияз но пусйизы. Матысь ньыль аръёслы пуктэм ужпумъёс пӧлын финн-угор этнотурез кылдытон вылын этнокультурая туризмез азинтонлы, улосвылъёс куспын лулчеберет но этнотуризм удысын валче ужан сярысь тупанкылъёс юнматонлы юрттон.

Партнеры

Загрузка...
Статьяос

Россиысь финн-угор калыкъёслэн 6-тӥ ӧтчамазы пуктэм ужпумъёс валамонэсь но быдэстымонэсь

02.10.2017 17:48
Иворъёс

Александр Бречалов: Удмурт лулчеберетъя центр пумысен ужкагазъёс 2018-тӥ арлэн нырысетӥ ӝыныяз дась луыны кулэ

02.10.2017 18:14