09.10.2017 12:50
Статьяос
Философской но лирической кырӟанъёс но рэп чузъяськозы «Элькуновидение» вожвылъяськонын Ижкарын

Философской но лирической кырӟанъёс но рэп чузъяськозы «Элькуновидение» вожвылъяськонын Ижкарын

Фото: vk.com (Элькуновидение2017)
Ижкар / Удмуртиын

Философской но лирической кырӟанъёс но рэп чузъяськозы удмурт кылын кырӟасьёслэн «Элькуновидение» вожвылъяськоназы. 8-тӥ коньывуонэ Ижкарын конкурслэн быръён люкетэз ортчиз. Радъясьёс чаклазы, тупало-а кырӟанъёс конкурслэн куронъёсызлы, озьы ик кырӟасьёслэсь быгатонлыкъёссэс дунъязы.

Вожвылъяськонлэн кыкетӥ люкетаз ӧз шеде Балезино ёросысь но Башкириысь Татышлы ёросысь кырӟанъёс. Кызьы валэктӥзы радъясьёс иворъёсъя «Удмуртия» агентстволы, Балезино ёросысь кырӟась Надежда Сидорова семьяяз кылдэм ужпумъя конкурсэ пыриськыны пумит луиз, нош Башкириысь Лилиана Нуриахметовалэн кырӟанэз куронъёслы ӧз тупа — кылъёсыз бигер кылысь берыктэмын вылэм.

Озьыен, 21-тӥ коньывуонэ «Аксион» культура дворецлэн сцена вылаз 19 кырӟасьёс но коллективъёс потозы.

Вожвылъяськонэ арысь аре пырисько Шаркан ёросысь кырӟасьёс. Туэ солэсь данзэ утёз егит кырӟась, Кыква школаысь крезьгуръя дышетӥсь, ёросазы ортчытэм конкурсын вормись Александра Протопопова. Солы кырӟан гожтӥз Татьяна Хохрякова, 2014-тӥ арын ӵапак солэн кырӟанэныз вормиз вал «Тулкым» ансамбль.

«Кылэме вал Саша Протопопова сярысь со ӟеч кырӟа шуыса. Телефон пыр герӟаськем берам нырысетӥ юанэ вал: „Саша, тыныд кыӵе кулэ кырӟан — куарадэ-а возьматоно тынэсьтыд, быгатонлыктэ яке тыныд кыӵе ке но шулдырзэ кулэ?“. Со шуиз: „Мыным кулэ, мед луоз со чебер куараез возьматон“. <…> Куке Саша потӥз сцена вылэ (ёрос конкурсын — ред.), куаралэсь быгатонлыксэ сётэменыз шуом-а, мар-а, калыклэн сюлэмъёсазы ик пыриз, вылтыр юзыр-кезьыр луиз», — вераз иворъёсъя «Удмуртия» агентстволы Татьяна Хохрякова.

Эгра каргуртлэсь данзэ утьыны потозы воргоронъёс. Ас вакытаз Эграысь Денис Чирковез устоез кылбур понна пусйизы вал, табере квинтетэн вормыны малпало.

«Милям философскойгес кырӟанмы, дыр, луоз, улон сярысь шудо-а, мар-а — „Улон токма уг ортчы“ кырӟанлэн нимыз, кылъёсыз но, крезьгурез но Денис Чирковлэн. <…> Милям воргоронъёслэн ансамбльзы „QUEENтет“, вить воргоронъёс — Денис Чирков, Дмитрий Лекомцев, Иван Лекомцев, Алексей Леоконцев но Павел Шкляев. Куинь ар ни со коллективмылы, <…> милям трос данъетъёсмы ни. Нырысь ик Нижний Новгородэ ветлӥм, Огъяросси фестиваль-конкурс вал — „Щит Росии“ — отын куинетӥ инты басьтӥм», — вераз Павел Шкляев.

Вожвылъяськонэ нырысьсэ уг пыриськы ни Дэбес ёросысь Ольга Перевозчикова. Нырысетӥяз конкурсын со агаезлы Антон Васильевлы юрттӥськиз вал (соку кыкетӥ инты басьтӥзы — ред.).

«Ужпум вормон бордын гинэ ӧвӧл, возьматыны аслэсьтыд быгатонлыктэ, творчестводэ, <…> ӟечлыко крезьгуръёс кылдытыны но калык пӧлы вӧлмытыны. Но вормыны мылкыд вань, кызьы сотэк, ваньмызлэн, дыр, озьы луыны кулэ!», — малпанъёссэ шараяз Ольга Перевозчикова.

Ижкарысь Устинов ёрос вожвылъяськонэ пыриськыны Алексей Пикулевлы оскиз. Егит кылзӥсьёслы со умой тодмо луэ рэп быдэстӥсь сямен.

«Озьы ик со луоз рэп, но кӧня ке поп-кырӟанлы матынгес, малы ке шуоно таӵе конкурс шуыса, мон малпай сое гожтыны мукетгес карыса. <…> Быдэсак кылӥське мукетгес, азьло кырӟанъёсыным ӵошатыса. <…> Кемалась ик ӧвӧл ай бертӥ армиысь, соин ик трос кужыме люкаськиз, мылкыды кыӵе ке но выль ужъёс кылдытыны. Соин ик куке мон тодӥ „Элькуновидение“ конкурс ортче шуыса, мон малпай эскерыны луэ шуыса пыриськы», — вераз Алексей Пикулев.

Тодэ вайытом, вожвылъяськонлэн кыкетӥ люкетэз 21-тӥ коньывуонэ «Аксион» культура дворецын ортчоз. Таяз арын кырӟанъёсты дунъян радлыке воштонъёс пыртэмын — вормисез быръёзы кык пумо жюриен пуктэм баллъёсъя. Нош конкурслэн йылпумъян люкетаз, 4-тӥ шуркынмонэ, смс-куараосъя тодмо луоз, кин басьтоз учкисьёслэсь кузьымзэс.

Вераны кулэ, тросэз вожвылъяськонэ пыриськисьёс но учкисьёс выль сямен дунъянлы дурбасьтэмзэс верало.

«Малпасько, будоз „Элькуновидение“ с профессиональной точки зрения. <…> Котькуд ёрослэн пыремзы потоз та конкурсэ котькуд ар, дасяськозы но золгес, валалозы, со туж кулэ уж шуыса
Ольга Перевозчикова, «Элькуновидение» вожвылъяськонэ пыриськись

Нош конкурслэн кулэлыкез пумысен юанъёс та дыре ӧвӧл ни.

«Ку таӵе конкурсъёс ортчо, элькунын озьы ик пото выль кырӟась нимъёс. Кин Ижкарын уг улы, ёросъёсын уло ке, соослэн нимъёссы, оло, тодмо ӧвӧл, нош котькин тодэ, ёросъёсын но уло туж пӧртэм но быгатӥсь адямиос, соин соослы кулэ озьы ик потыны, кызьы шуом, бадӟымгес калык пӧлы, мед соос сярысь тросгес тодозы но кылзозы шуыса», — лыдъя Алексей Пикулев.

«Элькуновидение» вожвылъяськонлэн кыкетӥ люкетаз пыриськисьёслэн лыдметсы:

  1. Пичи Пурга ёросысь «Эрик» группа — «Ижкар вера», крезьгурез Дмитрий Григорьевлэн, кылъёсыз Анастасия Шумиловалэн;
  2. Ижкарысь Ленин ёросысь «Задор мылкыд» ансамбль — «Яратонмы», крезьгуре, но кылъёсыз Ада Диевалэн;
  3. Сарапул ёросысь Павел Смирнов — «Чирдоз учы», крезьгурез но кылъёсыз Павел Смирновлэн;
  4. Вавож ёросысь «ВАЛАН» ансамбль — «Улонысь улонэ», крезьгурез Елена Дементьевалэн, кылъёсыз Евгений Китовлэн, Мария Бегишевалэн; 
  5. Эгра посёлок — «QUEENтет» воргоронъёслэн квинтетсы, «Улон уг ортчы токма», крезьгурез но кылъёсыз Денис Чирковлэн; 
  6. Ижкарысь Устинов ёросысь Алексей Пикулев — «Эктом, эшшо, эшшо», крезьгурез но кылъёсыз Алексей Пикулевлэн; 
  7. Кияса ёросысь Людмила Семёнова — «Ваньмон дыр», крезьгурез но кылъёсыз Евгения Анисимовалэн; 
  8. Можга ёросысь Сергей Вотяков — «Востэм арганчи», крезьгурез Иван Смолинлэн, кылъёсыз Александр Вотяковлэн; 
  9. Татарстанысь Менделеевск ёросысь «ТАУ 17» трио — «Легезьпу», крезьгурез Виктор Никифоровлэн, кылъёсыз Александр Белоноговлэн; 
  10. Яр ёросысь Татьяна Данилова — «Шундыё шуд», крезьгурез Елена Васильевалэн, кылъёсыз Алексей Ельцовлэн; 
  11. Глазкарысь Наталья Богданова — «Малы меда», крезьгурез Ольга Перминовалэн, кылъёсыз Людмила Куртеевалэн; 
  12. Ижкарысь Октябрь ёросысь «Тюрагай» ансамбль — «Удмурт шаермы», крезьгурез но кылъёсыз Виктор Бочкарёвлэн; 
  13. Ижкарысь Индустри ёросысь Владимир Вахрушев — «Зарни италмас», крезьгурез Владислав Андреевлэн, кылъёсыз Владислав Андреевлэн, Владимир Вахрушевлэн; 
  14. Шаркан ёросысь Александра Протопопова — «Тон суреда мыным сяська», крезьгурез но кылъёсыз Татьяна Хохряковалэн; 
  15. Дэбес ёросысь Ольга Перевозчикова — «Палэзьпу юмшан», крезьгурез но кылъёсыз Ольга Перевозчиковалэн; 
  16. Алнаш ёросысь Анастасия Иванова — «Мон гуртам куно гинэ на», крезьгурез Анастасия Ивановалэн, кылъёсыз Анна Бурдиналэн; 
  17. Вотка карысь Любовь Иванова но Лариса Загуляева — «Итаысь италмас», крезьгурез но кылъёсыз Любовь Ивановалэн; 
  18. Татарстанысь Агрыз ёросысь Эдуард Мираев — «Анай», крезьгурез но кылъёсыз Эдуард Мираевлэн; 
  19. Кез ёросысь Сергей Ефремов — «Сяськаныл», крезьгурез но кылъёсыз Сергей Ефремовлэн. 

Сцена вылэ потон радлыкъя пус чӧлтонэз 17-тӥ коньывуонэ ортчытыны малпало. 

    

Партнеры

Загрузка...
Иворъёс

«Goore Fest-2017» финн-угор фестиваль улсын Ижкарын рок-культураез вӧлмытон ужпумъёсъя котырес ӝӧк ортчытыны малпало

06.10.2017 11:35