30.11.2017 15:44
Статьяос
Анай кылъя дышетӥсь-усточи Светлана Хлебова: удмурт кылтэк сыӵе узыр лулчеберетмы, историмы быроз

Анай кылъя дышетӥсь-усточи Светлана Хлебова: удмурт кылтэк сыӵе узыр лулчеберетмы, историмы быроз

Фото: из архива Светланы Хлебовой
Ижкар / Удмуртиын

Сьӧлта ёросысь Выль Мӧнья шоръёзо школаысь удмурт кылъя но литературая дышетӥсь, пиналъёслэн «Дарали» фольклор ансамбльзылэн кивалтӥсез Светлана Хлебова «Анай кылъя, со пӧлын ӟуч кылъя, дышетӥсьёслэн огъяросси мастер-классы-2017» конкурслэн «Учитель-мастер» номинацияз устоез луиз. Вожвылъяськон Москваын 16–17 шуркынмонэ ортчиз, отчы быдэс кунысь анай кылъя 41 дышетӥсьёс пыриськизы.

Ивортодэтъя «Удмуртия» агентстволэн корреспондентэз Светлана Хлебоваен пумиськылӥз но тодӥз, маин дышетӥсь мукет улосвылъёсысь ужъюлтошъёссэ паймытӥз, малы анай кылэз одно ик дышетоно но кыӵе мылкыдын пиналъёс солэн урокъёсаз ветло.

Светлана Петровна, кӧня но кызьы тӥ мастер-класслы дасяськиды?

 — Огъя учконо ке, кема дасяським, дыр, малы ке шуоно, мон кылем арын но та вожвылъяськонэ быръён люкетаз ысъяй вал материалъёсме. Но ми ӧм тодэ, <…> видеоматериалэз ӟуч кылэ берыктыса титръёсын лэзёно шуыса. Ивор вуиз, со материалъёсты ӧвӧл ик учкиллям, кинлэн ӟуч кылэ берыктэм титръёссы ӧвӧл. Туэ ми выльысь берыктӥмы, титръёс гожъямы урокмылэн люкетаз но лэзимы. Быдэс ар луэ дасяськимы.

Куронъёсыз отын вал туж трос. Нырысь ик видеоуроклэн люкетэз луыны кулэ вал, <…> эссе «Дышетонъя мынам шедьтонъёсы» темая лэзьны кулэ, урокъёслэсь разработкаоссэс, но публикациосты, кытын печатласькемын, <…> методический комментарий уроклы озьы ик гожтыса, кык бам вылын лэзьыны кулэ. Тани ваньмыз быръён люкетаз.

Йылпумъян люкетаз, шуом ни, конкурсэз куинь вал, ньылетӥез — пресс-конференция. Отын дунъясьёс ӧй вал ни, огшоры эркын ог-огмылэсь ужпумъёсмес чакласа, юанъёсъя вераськон вал. Нош нырысетӥ конкурсаз, <…> видеоматериалэз эскероно вал, технологиез валэктыны кулэ вал. 10 минут солы сётӥське. Собере удмурт дэремез (ваньзы дышетӥсьёс кулэ вал луыны асьсэ йӧскалык дэремен) валэктыны кулэ вал, кыӵе, мар пужыос отын. Кызьы, марзэ чакласа лэсьэмын та дэрем.

Зол-а тулкымъяськиды?

 — Тулкымъяськон кылдӥз, дыр, мынам пырак потон азям, малы ке шуоно пус чӧлтонъя мынам лыдпусэ 29-тӥ вал. Радъясьёс буйгатӥзы: 24-тӥ номер туннэ вераськоз на, кылемез, пе, ӵуказе, буйгатске. Тӥни ми гань-гань кариським. Мынам эше Анюта Николаевна (Калашникова, Кузебай Герд нимо нылпи садысь визьнодась — ред.) туннэ вераськыны кулэ, со 23-тӥ вал бере. Табере, шуэ, дасяськы ай, тон но потод, дыр. Малы? Учкы али, кыӵе номер вераське ни. Кылӥ мон, отын 26-тӥ номер ни шуыса, озьыен, иське мон доры вуоз черод. Тӥни соку куалектӥ.

Малпасько, выльысь нуналозь тодо али кылбурме, дышето. Но потытозям но дышетыса вуттӥськем на. 

«Потэм берам мон чик ӧй ни тулкымъяськы, мон ас интыям кадь — сыӵе, кытын кулэ вал луыны, отын кадь али. Кырӟаса но верай костюме сярысь, кылбураса но верай, валэктыса но вуттӥ
Светлана Хлебова

Со бӧрсьы ни урокме валэктӥ. <…> Отын дышетӥсь вератэк, но валамон луысал, дыр, малы ке шуоно мынам урокам, кылсярысь, туж пыр-поч берыктэмын вал ӟуч кылэ: котькуд юанзы нылпиослэн, котькуд дэмланъёссы.

Нош берло сыӵе ваньмыз усиз кадь. Анюта Николаевна шуэ, ну всё, туннэ изиськом.

Озьыен, тӥ одӥг нуналэ вань уждэс возьматӥды, ӵуказеяз гань-гань кариськиды-а?

 — Ӵуказелы вал адӟытон но пресс-конференция. Адӟытонлы ми вераським вал, кин мар ваиз. <…> Адямиос быдэс семьяен лыктылэмын, юрттӥсьёс вайылэмын. Соос куинь-ньыль сумкаосын лыктӥзы, нош ми мар-о, одӥг сумка кутӥм но… Пичи куншетмес кутӥ, кунпусмес бумага вылын гинэ кутӥ, удмурт дӥсен ныл отын бумага вылын. Ярано, «Кизили» журналын соосты поттылӥзы но, мон соосты кельтӥ вал вандылыса. Воргоронэз озьы ик. Мед адӟиськоз коть, ми удмуртъёс, ми мукетэсь шуыса.

Тӥ устоез дышетӥсь, вормись шуыса валан лыктӥз ни-а?

 — Вормисьлы шуыса диплом — со милемлы туж дуно потӥз ни. Ми нырысь валаса но, мар но ӧм быдтэ: кин ми, мар ми. Гостиницае бертыса гинэ, бон, учкы ай, асьмеос вормисьёс луиськеммы ук шуыса пукиськом кыкнамы но (К. Герд нимо нылпи садысь визьнодась Анюта Калашникова «Анай кыллы яратон пыӵатон понна» номинациын вормиз — ред.). Шумпотӥм ни берло, валаса но ӧм быдтэ вал ай, малы ке шуоно котькудӥз сямен ик дышетӥсь кызьы ке но пусъемын вал. Собере кубок милемлы сётӥзы туж чебер. Пиналъёс зарни-а, мар-а та шуыса эскеризы ни магнитной шарикъёсты донгаса бордаз.

Тӥляд номинациды — «Учитель-мастер», кызьы валэктысалды солэсь пуштроссэ?

 — Отын куать номинация вал, «Учитель учителей», кылсярысь, «Учитель-мастер», «Учитель-новатор»… Тани «Учитель-мастер», мон валасько, со сыӵе, дыр, дышетӥсь, кудӥз аслэсьтыз ужзэ ӟеч тодэ-вала но сое возьматыны быгатэ, кутыны быгатэ пиналъёсын ужаз. «Учитель учителей» ке, мон сое валасько, со сыӵе дышетӥсь, кудӥз ас сьӧраз, шуом, дышетӥсьёсты валтыны быгатэ, дышетӥсьёсты марлы ке но дышетыны. «Учитель-новатор» ке, мон валасько, со сыӵе дышетӥсь, кудӥз мар ке но выльзэ пыртэ ужаз, кин сое воксё ӧз на кутылы, тодмо ӧвӧл на со технологиос.

Хлебова.jpg
Светлана Хлебова Огъяросси мастер-классын Фото: Из архива Светланы Хлебовой ©

Мукет анай кылъёсъя дышетӥсьёсын кенешыса, кыӵе мылкыдды кылиз?

 — Та конкурс дорозь ик тодӥсько вал, дыр, мон юнме уг ужаськы шуыса, малы ке шуоно нылпиос сьӧрад мыно ке, соос мар ке тынэсьтыд куро ке, ойдолэ, лэсьтом шуыса, со ни туж бадӟым дунъет дышетӥсь понна. Нош та ӵошатскон бере ми асьмедыз палэнысен, шуом, учкыны быгатӥм, кызьы коллегаос милемын верасько-юасько соиз, таиз сярысь, паймо кудӥз. Трос вал паймисьёсыз. Фольклор коллективе мынам вань бере, мон соос сярысь папкаям нуи вал материал, и соос паймо, тани, пе, сыӵе коллективды но вань на, нылпиос ветло шуыса, кырӟало-верало ас кылынымы. Соос ведь уг верало, вот тӥ ӟечок яке мар шуыса, огшоры паймемзэс, малпанъёссэс верало но, ас поннамы ведь сое дунъет басьтӥськом. Зэмзэ но, со сыӵе бурдъя.

Фольклор коллективеныды паймытӥды шуиськоды, кыӵе-сыӵе ансамблен кивалтӥськоды?

 — Фольклор коллективмы нимаське «Дарали» ансамбль, со нылпи коллектив. Туэ ми басьтӥм Адӟем карымон нылпи коллектив ним, элькун ним. <…> 25-тӥ арзэ коллективмы ужа ке но, туэ нырысьсэ Дышетонъя управлениысь милям ёросысьтымы дэмлазы, уд-а, пе, та конкурсэ пыриське шуыса. Вот материал дасям, лэзимы но вормиськеммы. Коллективмы бадӟым, бен, вошъяське 12 адямиысен 16-озь. Тани туэ милям 16 адями коллективе пыриське, 8-тӥ классысен 11-тӥ классозь нылпиосты басьтӥськомы. Пичиосызлэн ветлыны мылкыдзы вань, но али милям луонлыкмы ӧвӧл нимаз группа усьтыны. Бадӟымъёсыныз соослы умойтэмгес луоз, дыр, арлыдзыя шуыса.

Тодӥськоды, али анай кылэз дышетонъя кенешонъёс мыно шуыса. Та ласянь мар малпаськоды?

 — Ваньзы ӟучъёс луыны нокызьы, но уз быгатэ. Котькызьы мед гожтоз — ӟуч-а, бигер-а, но менталитетмы, котьма ке но, асьмелэн мукет ук. Малпаськомы но асьмеос мукет сямен. Тани кин ке шуэ ке, мынам пиналэ ӟуч кылын малпаське, пе, озьы ке но со анай-атайя, виръя пыӵамын ук. <…> 

«Малпасько, кулэ дышетыны. Кызьы сотэк? Калык быроз ук. Сыӵе узыр лулчеберет, <…> историмы асьмелэн сыӵе бадӟым, тунсыко — со ваньмыз быроз
Светлана Хлебова

Нош удмурт калык — мон ӧй шуысал, со урод калык шуыса, малы ке шуоно, асьмеос уродэсь луысалмы ке, 138 пӧртэм йӧслыкъёс удмуртъёс пӧлын ӧй улысалзы, дыр.

Нош гуртады пиналъёс ӟучомо шуыса сюлмаськонъёсты вань-а?

 — Со кытын меда али ӧвӧл, котькытын но вань. Мон ӧй шуысал, ӵапак туннэ сыӵе шугъяськон кылдӥз шуыса. 25 ар талэсь азьвыл школае бертэммы бӧрсьы но сыӵе вал вазиськонъёс, анай-атайёс куронъёс но гожъязы, ум дышетэ шуыса удмурт кылэз. Факультативно дышетӥзы, вал сыӵе учыръёс. Соос озьы ик дешетскизы, вань пиналъёс сямен ик, отметка гинэ ӧм пуктылэ. Кудӥз анай-атайёс, малы со кулэ но шуылӥзы. Соос семьяязы ӟуч кылын верасько вал, коть анайзы но атайзы удмуртэсь. Со 25 ар талэсь азьло ук, нош али югдур эшшо мургес пыремын сыӵе сюлмаськонэн.

Валэктыны тыршимы, пинал озьы ке но (факультативно — ред.) дышетске, дырыз солэн быре, озьы ик ужъёсты лэсьтэ со, отметка гинэ ум пуктӥське. Нош учкысалзы ке аттестатлэсь шор баллзэ, со 4 басьтэ ке, 5 басьтэ ке, быгатэ ке со урокъёсын ужаны, со плюс гинэ луысал ук. Собере озьы но валэктыны тыршимы: асьмелэн удмурт кылъя, но ӟуч кылъя тросэз правилоос ог-огзылы укшало, повторение кадь луэ соослы, эшшо ке умой луэ шуыса. Экзаменлы, шуом, дасяськыны но.

Али удмурт кылын пӧртэм ужрадъёс но ортчо, со пиналъёслы выль луонлык сётэ, дыр?

 — Алигес нылаш мынэсьтым юа, нош малы, пе, Ижкарез шуиллям Ижкар? Уг тодӥськы шуисько, тани эскерон ужлы тыныд тема, тонэ со тунсыкъяськытэ бере. Мон, дыр, шуисько уг быгаты тонэ кутыны, мынам трос ини эскерон уж гожъясьёсы, оло, тон мукет дышетӥсь доры мынод? Уг, мынам тӥ доры мынэме потэ, шуэ. Нош малы озьы, дыр? Мон умой дышетӥсь шуыса ӧвӧл, со бордын ужпум ӧвӧл. Соос шӧдӥзы ни, зэмзэ но шӧдӥзы, удмурт кылъя трос кытчы луэ потыны шуыса. <…>

Туж умой, асьмелэн мерлык ужа шуыса. Соиз ласянь асьмеос, оло, мукет калыкъёсты но ортчиськомы. <…> 

«Мерлык ужаз ке, удмурт мерлык, пусъеме потэ, асьмелэн кылмы азинскоз. Макем асьмеос шаплыесь луом, сокем шаплы луозы егитъёсмы но
Светлана Хлебова

Шӧдӥзы ке соос «Удмурт Кенеш», «Удмурт нылкышно кенеш», «Шунды» огазеяськон ужаз ке, кыстӥськозы, валалозы соос, мон татын асме возьматыны быгатӥсько, мон татчы пырыны быгатӥсько шуыса. Мон малпасько, со секыт ке но луиз, асьмелы пайдаен берытскыны кулэ.

Сьӧлта ёросысь Выль Мӧнья школаын туннэ 97 пиналъёс дышетско, ваньзы соос удмурт кылэз дышето. Со сяна, котькуд ар дышетсконзэс йылпумъясьёс пӧлын удмурт кылъя экзамен сётӥсьёс луо, кылсярысь, туэ сыӵе мылкыд карисьёс 5 кузя.

Тодэ вайытом, 28-тӥ шуркынмонэ Ижкарысь Кузебай Герд нимо гимназиын «Анай кылъя устоез дышетӥсь» элькун вожвылъяськонын Дэри ёросысь Лудорвай школаысь удмурт кылъя, но литературая дышетӥсь Надежда Мерзлякова вормиз. Солы вуоно арын Анай кылъя дышетӥсьёслэн огъяросси мастер-классазы Удмуртилэсь данзэ утьыны ӵектозы.

Партнеры

Загрузка...
Иворъёс

Алнаш литературалы сӥзем нуналъёс йылпумъяськизы Удмуртиын

27.11.2017 12:06
Иворъёс

Дышетскисьёслэн Россиысь калыкъёслэн кылъёсынызы конференциязы удмурт кылын дасям ньыльзэ ужъёсты пусйизы

27.11.2017 13:12
Иворъёс

Удмуртиысь анай кылъя устоез дышетӥсь Лудорвай школаысь Надежда Мерзлякова луиз

28.11.2017 18:11
Иворъёс

Можга ёросын «Мистер Этно» нимез басьтӥз 17 аресъем Кирилл Меркушев

28.11.2017 18:31
Иворъёс

Егитъёслэн «Удмурт-а мон?» форумазы Ижкаре 150 пала адями люкаськоз

29.11.2017 16:58