Суббота, 27 мая 2017
Ижевск +14 °C
USD 56.76EUR 63.67
21.04.2017 10:06
Статьи
Аръёс но иворъёс: сютэм улон, юонэн нюръяськон, удмурт лулчеберетэз ӝутон сярысь гожъязы 1920-тӥ аръёсы потэм газетъёсын

Аръёс но иворъёс: сютэм улон, юонэн нюръяськон, удмурт лулчеберетэз ӝутон сярысь гожъязы 1920-тӥ аръёсы потэм газетъёсын

Фото: krasnogorskiy-hram.udmresp.ru
Ижкар / Удмуртиын

Иворъёсъя «Удмуртия» агентство Удмурт Элькунысь Йӧскалык лыдӟетъюртлэн «Йӧскалык но шаертодон литературая но библиографияя центр» ёзэтэныз ӵош кылдытэм «Аръёс но иворъёс» нимысьтыз ӵектос улсын азьланьтэ веранзэ, мар сярысь гожъязы пӧртэм аръёсы удмурт кылын потӥсь газетъёсын.

Ӵектос сярысь рос-прогсес лыдӟыны луоз татысь

Газетлэн сканер пыр поттэм копиосыныз тодматскыны луэ Удмуртиысь Йӧскалык лыдӟетъюртлэн сайтаз.

Таяз статьяямы саклык висъяломы «Гудыри» газетын 1920-тӥ аръёсы потэм материалъёслы.

1922-тӥ арын потэм газетъёсын трос гожъямын сютэмъёслы юрттон сярысь. Лыдӟисьёс доры 1-тӥ оштолэзе вуэм номерын нырысетӥ бамаз ик таӵе ивортонъёс вань: «Удмурт Обласьын сютэмен нюр’яськон», «Сютэм улонэз вормон».

1922-тӥ арын 26-тӥ толсуре потэм номерын, кылсярысь, «Поволожияись серотос» сярысь гожтэмын:

«1922-тӥ армы ю удалтыса тросэзлэсь улонзэ каньыл кариз ке, но, тросэз та лыктӥсь 23-тӥ арыд, но сютэм ёромоноёсыз вань на. Соёс та арын, но ньяньлы ёрмыса улоно лыкто. Озьы няньлы ёрмисьёс вань на ке, соёслы юрттыны дасяськыса улыны кулэ <…>».

Аръёс но иворъёс                                                 Фото: Национальная библиотека Удмуртии © unatlib.ru

Отын ик «Ожлэсь, сютэм арлэсь, но ужлэсь пӧрмем инвалид’ёс» сярысь ивортон гожтэмын.

1922-тӥ арын шуркыномнэ потэм номерлэн быдэс бамыз сӥземын трахома син висёнлы. Сое «удмуртлэн шудтэмлыкез» нимало. Черлэн кышкытлыкез, солэсь утиськон амалъёс сярысь «Малы удмурт калык синьтэм (сукыр) луэ?» ивортон гожтэ «удмурт доктыр Шкляев». Со одно ик эмъясьлы вазиськыны куре:

«Удмурт’ёз соку лечиться кариськыны (эм’яськыны) уг дырто. Оло бурмоза, шуса, аналскыса, но уло. Токма (юмме) пельляськись доре ветлыса, но катьсэс бытто. Озьы улыны проч уг яра. Аналскыса улэм’я, пельляськись доре ветлыса, син уката ик уродме. <…> Синез висьыны ӧд’якыз ик лечть карыны кулэ. Дырыз ортчем бере лечить каремлэн, но пайдаез уг луы ини».

«Гудыри» газетын вӧсьлыкез серем карыса гожъямъёс но суредъёс но кылдӥзы. 

Аръёс но иворъёс
                                                  Фото: Национальная библиотека Удмуртии © unatlib.ru

Соку вашкала калык осконъёсты но кулэтэмен лыдъяны кутскиллям, лэся. Соослэн «уродлыксы» сярысь вера Эгызо кушемним улсын гожъясь. 

Аръёс но иворъёс
                                                   Фото: Национальная библиотека Удмуртии © unatlib.ru

Со номерын ик гожтэмын «Кызьы мар сямен удмурт культураез жутоно». Одӥг кылзэ но воштытэк таӵе ивортон потыны быгатэ, дыр, туннэ но. 

Аръёс но иворъёс
                                                   Фото: Национальная библиотека Удмуртии © unatlib.ru

1925-тӥ арын 16-тӥ оштолэзе потэм номерын аракыен нюръяськон сярысь трос гожъямын. «Куректонэд ке ӧвӧл аракы пӧзьтыны сюкась сура, шуо. <…> Дугдытыны кужым ке уг сузьы, калыклэсь тодэм-валамзэ вылэ жутыны туртсконо. <…> Со понна ик мон малпасько, нырысь гурт пеймытэз быдтыны газет’ёсыз-книгаосыз калык вылэ вӧлдыны тыршыны. Собере аракы ачиз быроз. Кин кызьы малпа?» Сыӵе юан пуктэ А. Камашев. 

«Аракы юон эксэй власьлэсь кылиз», «Удмуртэз та ужлэсь кужмысь палэнтоно» шуыса гожтэмъёс вань. Озьы ик тодыны луэ, кыӵе кӧшкемыт учыръёсы вуттыны быгатэ юон.

«Гудыри» газетын ужасьёс лыдӟисьёссылы дуннеысь но иворъёсты вуттон сярысь сюлмасько. Кылсярысь, 1925-тӥ арын 5-тӥ оштолэзе потэм номерын «Англиын уж шедьтытэк курадӟыса улӥсьёс нуналысь нуналэ йыло. <...>» шуыса гожтэмын.

«Германиысь Лейпциг карын та дыр’я вытсавка мынэ. Та выставкайын Кенешо Союзлэн, но павильёнэз вань. <…> Та пумысен Италиялэн одӥг газетаз тазьы гожто: «Италиялэсь павильёнзэ Кенешо Союзлэн павильёнэныз ӵоӵатӥд ке, возьытэ вумон ик. Италилэн павильёнэзсокем куанер» шуса. Выставкае пуктэм котыр ваньбурыз’я, Кенешо Союзлэн узырлыкез атске».

«Америкайын одӥг бадӟым шурлэн вуэз шуак тудӟыса будыса, быдэс карез (городэз) гылтыса нуэм. 10 сюрс мында калык пыд йылаз кылемын».

«Англиын выль тусо автомобиль лэсьтӥллям. Со автомобиль часлы 240 изькем пе мынэ Солэн мотор’ёсыз бераз тупатэмын».

Ӟырдыт мылкыдын гожъямын дышетон но дышетскон сярысь. 

«Кинь доктыр, кинь агроном, кинь инженер?» статьяын Трофим Борисов вазиське: «Гудыри» газетын сӥзьыл 100 удмуртэз университетэ лэзём (ыстом) шуэмын вал. Дебесӥсь одӥг мурт Трефилов нимтуло Комиссариатэ гожтэт лэзем, мон, но мыно шуса. Сое мыныны списоке пыртӥм ини. Кытын бон 99-эз? <…> Эн кышкалэ ми ӧжыт дышетӥськем шуса. Тододы мылкыдды гынэ мед луоз. Луымтэ уж одӥг но ӧвӧл. Кинь доктор, кинь агроном, кинь инженер луоз». (24.04.1920)

«Университет ужаны куськиз»

«Глаз карись ужась но крестьян калыклэн университетаз 1 апреле дышетыны куськизы ини. Ваньмыз 61 мурт лыктэмын. Та 61 мурт пушкись удмуртэз 41 мурт. 41 мурт пушкись одӥг удмурт ныл лыктэмын» (02.04.21)

«Удмурт дышетӥсьёсыз люкаса кенеш карыны Москваись 526000 ман. коньдон куриськом. Со коньдон сюрэслы, но, суточнойлы луоз». (09.04.1920)

1924-тӥ арын 6-тӥ оштолэзе «Гудыри» газетын удмурт кыл сярысь гожтэмъёс трос, «бигеро-ӟючо кылйос пырало», пе, удмурт кылъёс вань вылысь. Татын ик сётэмын валэктон, кызьы берыктыны луоно «ужмуг кыл'ёсыз». 

Аръёс но иворъёс
                                                  Фото: Национальная библиотека Удмуртии © unatlib.ru

1918-тӥ аръёсы потэм газетъёсын ӵошатыса, 20-тӥ аръёсы ӧжытгес ини печатлаське чеберлыко литература. Оштолэзе 1920-тӥ но 1921-тӥ аръёсы потэмын: Даниил Майоровлэн «Мон — куанер» кылбурез (17.04.1920), Иван Дядюковлэн пичи веросэз, Даниил Майоровлэн кылбурез (07.04.1921).

Оштолэзе Ашальчи Окилэн вордӥськем нуналэз. Соин валче лыдӟетъюртын ужасьёсты нимысьтыз учкыны куримы, вань-а солэн мар ке гожтэмъёсыз оштолэзе потэм газетъёсын. Со вакытысь номыр шедьтыны ӧз луы. Нош 1921-тӥ арын 30-тӥ толсуре потэм газетын, кылсярысь, А. Векшина тодэ ваёнъёссэ гожтэ — «Кызьы мон дышетӥськи». 1924-тӥ арын 3-тӥ инвожое «Та быдӟым городын» кылбурез потэ, 13-тӥ пӧсьтолэзе — «Возьытлык» кылбурез.

Вашкала газетъёсын тунсыко соиз но, торосэз ивортонъёс но статьяос пӧртэм кушемнимъёсын поттэмын: Горд кыл, П. Б., Д. Пишер, Тодӥсь, Коммунист, Коммунис, Удмурт пи, Кырныж, Шум потӥсь Ваня, Тыло Вася, Сюрло, Горд-лыс, Удмурт, Пичи Шайтан, Шунды но мукет.


Партнеры

Загрузка...
Статьяос

Аръёс но иворъёс: Алабгоын «Гудыри» газетэз поттыны кутскизы

21.03.2017 13:42