10.10.2017 12:54
Статьяос
Люза Бадретдинова: йӧскалык журналистика ке ӧз луы, кыл но быроз

Люза Бадретдинова: йӧскалык журналистика ке ӧз луы, кыл но быроз

Фото: Наталья Еркешева
Ижкар / Удмуртиын

3–5 коньывуонэ Ханты-Мансийскын Финн-угор прессалэн огъяросси фестивалез ортчиз. Со радъяське 2 арлы одӥг пол. Туэ фестиваль улсын кык котырес лыдпусъёсты пусйизы: «Ханты ясанг» газетлы 60 ар тырмонэз но «Ленин пант хуват» газетлэн нырысетӥ редакторезлы Григорий Лазаревлы 100 арес тырмонэз.

Ужрадэ Удмуртиысь 5 адями пыриськиз. Делегация Ижкаре берытскем бере иворъёсъя «Удмуртия» агентстволэн корреспондентэз «Кизили» журналлэн кылкутӥсь секретареныз Люза Бадретдиноваен пумиськылӥз, со фестивальлэн ужпумъёсыз, сюлэмшугъятӥсь юанъёс, хантыослэн но мансиослэн лулчеберетэнызы тодматскон но анай кылын журналистикалэн кулэлыкез сярысь мадиз.

Тӥ малпамъя, мар понна та фестиваль ортчытӥське, марлы со сӥземын вал? Кыӵе пайдаё ужрадъёс ортчизы фестиваль улсын?

— Куке пумиськиськод огъя сюлмаськонэн герӟаськем эшъёсын, сыӵе одӥг кадь ужын ужаса, кыӵе сюлмаськонъёс милям одӥг кадесь луо: лыдӟисьёсмы ичиёмо, тираж бордын ужано, собере, улонлэсь бере медам кыле шуыса, интернетэн, сайтъёсын лыдӟисьёсын кусып возёно. Ваньмылэн, мон валасько, сюлмаськонъёсмы одӥг шуыса. Котькудӥз тырше сое ачиз валамезъя кызьы ке но, шуом, кыскыны. Котырес ӝӧкын но вераськон вал. Нырысь трос вераськизы, кызьы выль технологиосты асьме ужамы пыӵатоно шуыса. Нош собере котькудӥз аслэсьтыз сюлмаськонъёссэ, <…> малпанзэ вераны тыршиз.

Депутатъёсын пумиськон мыным туж тунсыко потӥз. <…> Одӥгез депутатсы луэ туж тодмо писатель Еремей Данилович Айпин. <…> Мае мон чаклай, со гожъяськись гинэ луыса уг ужа. Со сюлмаське аслаз пичи калыкез сярысь, кызьы со катъёсты радъяны. Тани, шуом, мувӧй отын потто, нефтяникъёс, газовикъёс трос тыршо, музъемзэс кырсёмыто. Отын улӥсь калык солэсь медаз вӧсь луы шуыса, соосты тырше пӧртэм катъёс пыр (утьыны — ред.). Со катъёс бордын ужамзы сярысь ик соос милемлы мадизы.

Котырес ӝӧк дыръя резолюция но кутӥды-а?

— Вераськимы тазьы, ог-огенымы вошъяськомы шуыса. Отын тани лыктэмын ке вал Мордовиысь но, порысь но нылпи изданиосын ужасьёс, ми соослы асьме материалъёсмес келяломы, удмуртъёс сярысь умойгес мед тодозы, матынгес мед луозы шуыса. Соос но милемлы материалъёссэс келялозы, мед ми асьме лыдӟисьёсмес тодматомы мордва пиналъёслэн ужъёсынызы, пор пиналъёслэн ужъёсынызы.

Со котырес ӝӧк бере резолюция кутӥськом. Отын гожтӥмы сайтъёсын ужанэз одно ик умойгес кароно шуыса, ог-огенымы вошъяськон бамъёсты но выльдоно, азьло вал ни со. Туж куризы нимысьтыз семинаръёс ортчытыны финн-угор журналистъёслы — нимысьтыз, шуом, кыл кутӥсь секретарьёслы, нимысьтыз фотокорреспондентъёслы. <…> Собере кадръёс пумысен трос вераськон вал. Журналистъёс уг тырмо именно йӧскалык кылын, кудъёсыз быгато умой вераськыны но умой гожъяськыны. Шуизы, школаысен кутскыса ик ужано та бордын. Вераськизы, 2019-тӥ арын пумиськонмы эшшо мед пӧрмоз на вал шуыса.

Кыӵе югдур асьме удмурт кылын потӥсь прессаен, мукет улосвылъёсын ӵошатыса?

— Ханты-Манси автоном округын газетъёссы гинэ пото. Соослэн огазеям редакцизы ханты но манси газетъёслэн, огъя редакторзы вань <…> Нимаз асьсэлэн редакторъёссы «Ханты ясанг» — со хантыослэн газетсы, мансиослэн нимаське «Луима сэрипос» шуыса.

Ханты-Манси автоном округын выллемгес ик югдурзы луэ Коми-Пермяк округын. Соос кӧня ке ар талэсь азьло туж мыло-кыдо басьтӥськизы вал «Силькан» журнал поттыны («Колокольчик» шуыса со нимаське). Но отын воштӥськонъёс луизы — Коми-Пермяк округез огазеязы, Пермь улосэ пыртӥзы но, со журнал али уг ни печатласькы. Со «Сильканын» туж умой коллективзы вал <...> люказы трос ни вал котыразы лыдӟисьёсты, суредасьёсты, гожъяськисьёсты. Жаляса верано, соослэн со мытэм сюрессы пытсаськиз. Со интые соослэн огшоры потэ «Сизимок» альманах. Мон тодэмъя, со куинь толэзьлы одӥг пол потэ. 

Нош асьмелэн ведь «Кизили» нылпи журнал нырысь мынэ, собере вань асьмелэн нылпи газетмы «Ӟечбур!». «Ӟечбурысь» асьмеос потӥськом «Инвожо» журналэ. «Инвожо» журналысь асьмеос потӥськом «Удмурт дуннее», литературая «Кенеш» журналэ. Нимысьтыз дышетӥсьёслы вань «Вордскем кыл» методической журналмы. Соослэн озьы ӧвӧл. Вот соиз палтӥ асьмеос узыресь. Асьмелэн пичиысен кутскыса пиналъёс лыдӟиськыса будо ини, ми бордысен кутскыса. Ми будэтӥськом лыдӟисьёсты мукет изданиослы, ваньмыз малпаса, радъяса пуктэмын.

Мукетъёсызлэн тани со элькунъёслэн ваньмыз озьы ик. Тани милям журналмы 1986-тӥ арын кылдӥз ке, та приказъя ик кылдытэмын вал мукет элькунъёсын но нылпи журналъёс. Тани поръёслэн «Кече» («Солнышко») нылпи журнал вань. Вань мордваослэн, соослэн кык литературной кылзы бере — эрзя но мокша — соослэн кык литературной журналзы даже: эрзя кылын но мокша кылын.

Мон малпасько, асьмеос, мукет элькунъёсын ӵошатыса, лыдӟисьёсынымы чик но урод ум ужаське. <…> Мон вань редакциос понна кылкутыны уг быгатӥськы, но милям лыдӟисьёсын кусыпъёсмы умой радъямын. Толэзяз кӧня ке пол командировкае потаськомы, пумиськонъёсты ортчытъяськомы. Тани соку ик милемлы подпискаен юрттӥськыны мыло-кыдо вазиськисьёс сюро. Туж трос юрттӥсьёсмы озьы люкасько, сыӵе пумиськонъёс юртто подпискаез, тиражез возьыны.

Тӥ малпамъя, кыӵе кулэлыкез туннэ финн-угор кылын журналистикалэн?

 — Асьме журналистъёсын туж зол герӟаськемын, кызьы асьмеос возьматомы, кулэ-а ӧвӧл-а асьмелы финн-угор газетъёсмы, кулэ-а ӧвӧл-а асьмелы та фестивальёс. <…> Пыримы ми одӥг магазинэ: ваньмыз, мар Ижкарын вузаське, ваньмыз вузаське со магазинын. Пыримы мукетаз магазинэ, торговой центре: <…> со ик дӥськутъёс ошиськыса уло отын. Кызьы сое шуод, роботъёс кадь. Одӥг кадь дӥськутъёс, одӥг кадь сиён-юон милям. <…>

Ведь соин ик асьмеос пӧртэмесь, ог-огмылы маке но мукетсэ, аспӧртэмзэ мед возьматыны быгатом шуыса. <…> Ваньмыз возиське асьмелэн анай кылмы бордын. Журналистика ке ӧз луы, кыл но быроз. <…> Верам потэ, удмурт изданиос шоры тиражзы ӧвӧл шуыса гинэ медаз учке. 

Удмурт изданиос туж трос мукет функциосты быдэсъяло на — культурно-просветительской, калыкен пумиськылон, кивоштӥсьёсты будэтон. «Кизили» журнал пыр гинэ чакласа (мон татын 26 ар ужасько ни), кинъёс гинэ ӧз потэ: корреспондентъёс, кылчиос, тодосчиос, артистъёс. Ваньмыз соос гожъяськыса будэмын, собере асьсэлы творческой профессия быръё. <…> Ужаськомы, анай кылмы мед азинскоз шуыса, интыяз медаз сылы шуыса, лыдӟисьёсмы мед луозы шуыса, нош со лыдӟисьёс собере мед творческой адямиос луозы шуыса, чеберлыкез мед валалозы шуыса.

Сокем кыдёке ветлыса, хантыослэн но мансиослэн лулчеберетынызы, улон радэнызы тодматскыны шуд усиз-а?

— Нырысетӥ нуналзэ быдэсак сӥзизы хантыослэн но мансиослэн улонэнызы тодматсконлы. Нырысь ик милемыз нуллӥзы музеязы, кудӥз инбам улын интыяськемын, «Торум Маа» шуыса со нимаське соослэн. Со, пе, берыктӥське «Священная Земля» шуыса. Со интыяськемын Ханты-Мансийскын ик туж сыӵе вырйыло, гурезё интыын. Азьло отын та калыкъёс асьсэ инмарзылы вӧсясько вылэм. Туж тунсыко лэсьтэмын отын соослэн улон корказы, маин соос выро, шуом, чорыган арбериоссы пуктылэмын, пыжъёссы. <…> 

Соослэн туж тунсыко вань обско-угор калыкъёслэн «Солнце» шуыса нимаськись театрзы. Вот со театр возьматӥз ханты-манси фольклоръя пуктэм спектаклез. Туж тунсыко со пуктэмын. Чум пушкын ми пукимы, котыресын. Со чум но шудӥз со спектакльын. Со чум котыртӥ спектакль радъяськиз, пӧртэм-пӧртэм вужеръёсын, талъёсын, туж тунсыко радъямын вал.

Партнеры

Загрузка...
Иворъёс

Удмуртилэсь Москваысь постпредствозэ быдтозы

10.10.2017 10:09
Иворъёс

Коми-Пермяк округысь но Марий Элысь театръёс спектаклъёссэс Удмуртиысь учкисьёслы возьматозы

10.10.2017 11:59