13.10.2017 12:17
Статьяос
Надежда Пчеловодова: удмурт кылэз тодэме вуттӥз Эстоние

Надежда Пчеловодова: удмурт кылэз тодэме вуттӥз Эстоние

Фото: facebook.com (Nadi Mush)
Ижкар / Удмуртиын

Дышетоно удмурт кылэз яке ӧвӧл? Малы со кулэ? Мар сётыны быгатоз удмурт кыл? Та юанъёс калык пӧлын ялан чузъясько. Жаляса верано, асьсэос удмуртъёс пӧлын но.

Иворъёсъя «Удмуртия» агентство малпаз пумиськылыны адямиосын, кинлы удмурт кыл дуннеез усьтӥз. Нырысетӥез вераськисьмы — Эстонилэн шоркараз Таллинын улӥсь Надежда Пчеловодова. Котькуд гужем одӥг-кык толэзьзэ со Удмуртиын ортчытэ, озьы ик Выль ар шутэтскон нуналъёсы вордскем палъёсаз бертылэ. Ми Надеждаен гудырикошкон шорын пумиськылӥмы.

Надежда Пчеловодова (кушемнимыз Муш Нади) — гожъясь, берыктӥсь, дышетӥсь. Вордӥськиз Алнаш ёросысь Кадик гуртын, йылпумъяз Алнашысь шоръёзо школа-колледжез, Удмурт кун университетысь удмурт филологияя факультетэз «Удмурт кылъя но литературая дышетӥсь, ӟуч кылъя но литературая дышетӥсь» ӧнеръя. Удмурт кылын кылбуръёсыныз бичетъёсыз потэмын. 2005-тӥ арысен Эстониын улэ. Таллинысь университетын «кылосбурчи но берыктӥсь» ӧнеръя магистратураын дышетскиз. Али школаын эстон кыллы дышетэ, озьы ик ӟуч кылъя урокъёс нуэ. Эстон гожъясьёслэсь 15 книгазэс удмурт кылэ берыктӥз. «Удмуртилэсь но Эстонилэсь лулчеберетъя кусыпъёссэс азинтон понна» Муш Надиез Эстонилэн кун данъетэныз пусйизы — Тӧдьы кизилилэн V классъем орденэныз

Тросэз верало ке но, удмурт кыл — со дорын, семьяын вераськон кыл гинэ шуыса, анай кылмы дуннеез но усьтыны юрттэ ук

— Мон сярысь вераськиськом ке, озьы ик со луиз. Луи удмурт кылъя дышетӥсь, филолог. Быдтӥ Удмурт кун университетысь удмурт филологияя факультетэз. Собере вить арзэ ужай йӧскалык библиотекаын шаертодонъя ёзэтын. Отысен ик мон берыктӥсько вал пӧртэм ӟуч авторъёсты удмурт кылэ кылбуръёссэс, ачим гожъяськисько вал, потӥз нырысетӥ книгае, кылбуръёсын книгае. Соку ик ортчиз вал, 2002-тӥ арын, финн-угор гожъясьёслэн ассоциацизылэн конгрессэз Ижын. Отысен мон тодматски Арво Валтонэн (эстон гожъясь, сценарист — ред.), кудӥз ӵектӥз мыным удмурт кылэ берыктыны эстон литератураез.

Ӟуч кыл пыр яке эстон кылэз тодӥськоды ни вал?

— Солэн быдэс сыӵе проектэз вал: адями лыктэ дышетскыны Эстоние, эстон кыллы дышетске ар куспын, собере эстон литератураез дышетэ, эскере но кутске берыктыны со произведениосты, кудъёсыз мынам малпамея тунсыко луозы удмурт лыдӟисьлы. Соин ик мынам удмурт кылэ монэ Эстоние ваиз. Удмурт кыл пыр, удмурт кылын вераськыны быгатэменым но гожъяськеменым мон кошки Эстоние. Эстон кылъя институт радъя сыӵе уж, отын пото али пӧртэм финн-угор калыкъёслэн словарьёссы. Потэмын ини удмурт-эстон словарь нырысетӥез, али потэ ини эстон-пор но эстон-мордва лэсьто али. Со институтын мон ужай кык ар, со кыллюкам проектэн. Али дышетӥсько эстон кыллы ӟуч пиналъёсты школаын.

Эстониын асьтэдыз кин шуыса шӧдӥськоды — удмурт-а, ӟуч-а (россиянка валатонэн)?

— Удмуртиысь отчы кошкыса астэ шедьтӥськод, астэ валаськод. Татын ми ум тодӥське, кинъёс ми — огъя кыӵе ке российский калык. Отчы мыныса, шӧдӥськод ини котькуд адямилэн аслаз… Дышетски мон француз студентъёсын но, Мадридысь студентъёсын но, Барселонаысь студентъёсын но, соин ик национальной характер, тодметъёсыд пото отын, палэнын улыса. Усьтӥськод астэ палэнын улыса.

Кызьы тани ми дыртыса татӥ сюресэз потӥськом о веть, нош отын нокин но уг дырты, со сыӵе тумошо потэ. Ноку но уг вунэты, кызьы мон нырысьсэ потӥ Эстониын сюресэз. Сюрес кыклы люкемын, кык палаз ик светофор сылэ. Учкисько мон со светофор шоры но, весь ӝуа горд тыл, потыны уг луы. Сылӥсько-сылӥсько, сылӥсько-сылӥсько… Ма, пайми ни мон, сонякема уг воштӥськы ни шуыса. Учкисько — калык но сылэ. Ну, малпасько, ярам, шонер сылӥсько, дыр. Собере учкисько — воштӥськиз, вож луиз. Мон бызьыса уг-а поты?! Ӝыны сюресозь вуи но берлань учкисько — калык уг вырӟы. Мон малпасько, мон мар ке но янгыш лэсьтӥсько, берлань мынӥ. Берен берытски, со интые ик вуи, соку калык вырӟиз. Вот, мон малпасько, адӟиськод ини удмурт синмыныд о-о вож ӝуа шуыса, ӝыны сюресэ вуид ни — мын ни азьлань. Ӧвӧл, берыктӥськоно, учконо, малпано мон янгыш лэсьтӥсько мар ке но… 

Табере кофе ӵекто ужрадын, шуо: «Кофе юоды-а? — Ум». Милям удмуртъёслэн куинь пол ӵектытэк ведь соглаш уд кариськиськы ай! Всё, октӥзы кофезэс, ӵектӥсь ӧз ни луы (серекья). Тӥни сыӵе учыръёсын астэ шедьтӥськод но валаськод: ӟуч но тон ӧвӧл, эстон но тон ӧвӧл, тон — удмурт. Со удмурт луэменымы ик, малпасько, данъяськоно, возьдаськоно ӧвӧл. Пӧртэм калыкъёс дунне вылын вань.

Таллинын улыса — мурт кунын, мурт калык пӧлын — асьтэлэсь удмуртлыктэс кызьы ке но азинтӥськоды-а, паськытатӥськоды-а? Мукет удмуртъёсын, оло, пумиськылыны кылдэ-а?

— Туж монэ шумпоттытӥз: мон дышетскыны лыктэм берам ик мон доры лыктӥзы общежитие, монэ утчаса, асьме удмуртъёс. Отын огазеяськонзы кылдытэмын вылэм ини 20 ар талэсь азьло, удмуртъёслэн огазеяськонзы. Тӥни монэ шедьтыса, мыным чайный сервиз кузьмаса, асьсэос ик оломар но ческыт сиёнъёс вайыса, монэ куно каризы. Сыӵе шуныт луиз, палэнын ке но, удмуртъёс татын но вань шуыса, со юрттэт луиз. Собере ини али ачим кивалтӥсько со удмурт огазеяськонэн. Огазеяськонамы 50 пала адями, пӧртэмез вань — кин али лыктэмын, кин берло лыктэмын, совето вакытъёсы лыктэмъёс но трос. Арлы кык пол люкаськиськом бадӟым праздникъёсы. Таллинын но Тартуын вань ансамбльёсмы. Таллинын 18 ар ужа ини «Юмшан гур» ансамбль. Милям татын, Таллинын, кык ар ӵоже ужаськомы ини, четверглы быдэ люкаськиськом куать кузя удмурт кырӟанъёсыз кырӟаны.

Эстон телевидениын
Надежда Пчеловодова эстон телевидениын удмурт сиёнъёс пӧра Фото: vk.com (Nadi Mush) ©

Тросэз уг тодо, Ижкар — со Удмуртия, Удмуртия — со Ижкар шуыса. Соосты уг герӟало, одӥг улос шуыса. Уг но тодо, кытын со Удмуртия интыяськемын — кытын ке но Уралын, Урал гурезьёс сьӧрын малпало. Эстониын улӥсь адямиос, кинъёсын тӥледлы пумиськылыны кылдэ, тодо-а Удмуртия сярысь, удмуртъёс ӵыжы-выжы калык луо шуыса? Удмурт калыкез, Удмуртиез кызьы ке возьматӥськоды-а отын?

— Эстон калык, конечно, тодэ. Малы ке шуоно соослэн учебникъёсазы но вань, историен учебникъёсазы, соос верало финн-угор калыкъёс сярысь но. Яке киужъёсъя учебникъёссэс тани мон куке но адӟи вал, отын удмурт киужъёс но вань. Эстон калык тодэ удмуртъёсыз, со адӟиське. Тани ӵыжы-выжы калыкъёслэн программазы но туж кема ужа ни Эстониын. Студентъёс кӧня ар ӵоже ветло ни отчы о-о вошъяськыса, тани удмуртъёс ик отын студентъёс туж трос дышетэмын ни. Эстон уксёен ик поттэмын со вань берыктэм книгаос но, ӵектосъёс но (быдэсъясько - ред.), писательёс но ветло, пӧртэм… Со Обиницаысь (2015-тӥ арын финн-угор дуннелэн лулчеберетъя шоркарез — ред.) но адямиос ветло, кырӟасьёсмы но отын выступать каро, соослэнъёсыз татчы лыкто. Со проектъёс пумтэм.

Мон учкисько но, туж трос калык ветлэ отчы-татчы: удмурт калык — отчы, эстон калык — татчы. Кусыпъёссы туж ӟечесь, мон малпасько. Нош вераськоно ке дунне калыкен ини... Тани мон эстон кыллы дышетски интернациональной группаын, отын японэз но, кореецэз но, Франциысь но лыктэмъёс вал, Испаниысь но — соос чик уг тодо. Соос уг тодо, Россиын вань Удмуртия шуыса… Калашниковез котькин тодэ, Чайковскиез котькин тодэ, нош Удмуртиез… Тани удмурт «Бурановские бабушки» коллективлы туж бадӟым тау, соос ласянь но возьматыны луэ ни Удмуртилэсь брендъёссэ.

Удмуртъёслэн ансамбльзы этноярмаркаын
Удмуртъёслэн ансамбльзы Таллинысь этноярмаркаын Фото: facebook.com (Nadi Mush) ©

Куд-огезлэн, оло, пыкылэмзы потэ, татын дышетскыса, сьӧрло кошкизы шуыса. Но мукет ласянь, соос отын но мерлыкын кыӵе инты басьто, доразы гинэ уг пуко…

— Бен, котькудзылэн но семьяосазы удмурт кыл кулэмын ӧвӧл, удмурт кыл дугдэмын ӧвӧл, со азьланьтӥське. Тани Николай Анисимов, Мария Корепанова (удмурт, бесерман гуръёсты быдэстӥсьёс, али Эстониын уло — ред.), кыӵе соос вылӥе ӝуто удмурт культурамес, удмурт кырӟанмес Европаын. Али потӥз соослэн выль проектсы, выль бичетсы — «АR-GOD». Со асьме удмурт кырӟанэз туж вылӥе уровене ӝутэ, со калыклы кельше, Европалы со кельше. Сое азинтоно. Малпасько, кошко ке егитъёс палэнэ, со умойгес но удмурт кыллы но, удмурт культуралы но, малы ке шуоно кошко дӥсьтӥсьёсыз, кудъёсызлэн ужамзы потэ, уксё басьтэмлы ке но, яке удмурт кылын ужамзы потэ — мед кошкозы, мед адӟозы дуннеез.

Мынам кызьы луиз: аслэсьтым удмурт луэмме гажаны, дунъяны кутски палэнэ кошкыса гинэ. Конечно, татын удмурт филологияя факультетын дышетскыса, удмурт кыллы дышетӥсь луысал ни мон школаын, со но бадӟым дан луысал. Но озьы луиз улонын, мон кошки. Мон малпасько, кошкытэк 15 книга но ӧй берыктысал, кылсярысь. Котьма ке но, кылэз тодэм — со трос сётэ. Удмурт словарь но лэсьтӥзы, вить кузя лэсьтӥмы, со ваньмыз эстон кылэз валась адямиос.

Со кошкем адямиос удмурт калыкен но тодмато, удмурт литератураез, удмурт крезьгурез азинтонын отын ужало.

— Бен, туннэ дунне усьтэмын ини котькинлы но. Дуннеысь мар вань ӟечсэ басьтыса, сое Удмуртие ваёно, удмурт культурае сое ваёно, верано, мар дуннеын вань. Куное ке но лыкто кинъёс ке Таллинэ, яке котькытчы мед мынозы, шумпотоно ини, мон быгатӥсько мар ке но Таллин сярысь вераны, Эстониез возьматыны. Малпасько, со узырмытэ гинэ Удмуртиез но удмуртлыкез.

Ватсалом, Эстониын улӥсь удмуртъёстэк одӥг финн-угор ужрад но, Эстониын улӥсь выжы калыкъёслэн ужрадъёссы но уг ортчо. Кылсярысь, удмуртъёс котькуд ар «Etnolaat» этноярмаркае пырисько, отын туристъёслы, Таллинын улӥсьёслы удмуртъёс сярысь тросгес ивортодэт сётыны тыршо.

Партнеры

Загрузка...
Статьяос

Кӧня кыллы дышетоно покчи нылпиез: малпанъёс но дышетон амалъёс

10.01.2017 18:15
Статьяос

Анай кылэз дышетон: Ижкарысь удмурт анайёслэн амалъёссы но малпанъёссы

20.02.2017 13:31
Статьяос

Люза Бадретдинова: йӧскалык журналистика ке ӧз луы, кыл но быроз

10.10.2017 12:54