03.11.2017 13:16
Статьяос
Удмурт нимын пиналъёс: туала анай-атайёслэн выжызэс гажамзы

Удмурт нимын пиналъёс: туала анай-атайёслэн выжызэс гажамзы

Фото: Михаил Шутов, из семейного архива Лукерьи Шиховой, instagram.com (Роман Романов)
Ижкар / Удмуртиын

Нылпи вордон — со туж бадӟым кылкутон, кудӥз анай-атайлэсь трос яратонзэс, дырзэс но кужымзэс куре. Пиналэз визьнодан амалъёсъя огкыл шедьтон азьын соос нырысь ик мукет юанэн пумисько — кызьы нунызэс ниманы? Кин ке нылпи вордскемлэсь азьвыл ик ним быръе, нош кинлы ке укмыс толэзь но уг тырмы.

Россиысь тодосъя академилэн Урал ёзэтысьтыз Историяя, кылъя но литературая удмурт институтысь тодосъя валтӥсь ӧнерчи, истори тодосъя доктор Надежда Шутова верамъя, вашкала удмурт нимъёс пӧйшур, тылобурдо но сяська нимъёслэсь кылдэмын.

«Сяська ке — сыӵе ик чебер мед луоз, тылобурдо ке — сыӵе ик эрико, чебер но шаплы. <…> Куке Коньы, Гондыр нимъёс поно вал. Со кушемнимъёс но вал, дыр. Но соос адямилэсь сямъёссэ возьмато вал», — шуэ Надежда Шутова.

Озьы ик солэн верамезъя, куд-ог дыръя пиналъёслы туж шӧтэм нимъёс сёто вылэм, кылсярысь, жуг-жаг турынъёслэсь. Удмуртъёс сыӵе нимъёс висёнъёслэсь утё шуыса оскиллям.

Иворъёсъя «Удмуртия» агентстволэн корреспондентэз тодӥз, кыӵе удмурт нимъёсты быръё туала анай-атайёс но кызьы со нимъёс пиналлэн сямъёсыныз герӟаськемын.

Кин малпаз пиналъёстэс удмурт сямен ниманы?

Марина Ходырева: Ми кыкнамы ик (кузпалэным — ред.) озьы улӥм вал малпаса кемалась ини, ку возьмамы вал нылмылэсь вордӥськемзэ. Михаил Гаврилович Атамановлэн «Словарь личных имен удмуртов» книгаысьтыз утчаськыса шедьтӥм Зарина ним. Донай ним асьмеос малпамы, собере сое но отысь шедьтӥм. Зарина — со «зарни» кыллэсь, иран кылысь заимствование луэ. <…> Нош Донай ним — со «дуно» кылысь потӥз, «ай» — со инмар, котькытын дуннеын вань сыӵе кыл «ай» — инмар шуыса. Донай — со именно кызьы воргоронъёслы ним сёто вал — муж, мужчина, бог шуыса. Соин вот озьы пӧрмиз милям.

oooo.plus_565.png

Наталия Романова: Италмасэн секыто дыръям ми шузимыса пи возьмамы. Куке нырысьсэ нылмы сярысь тодӥмы, Ромалэн мылкыдыз ик куашказ, ӧз оскы верамелы. Нош собере ӝыт уж дорысьтыз бертӥз но шумпотыса вераз, нылъёс, пе, атайзэс золгес ярато. Италмасэ но атаезлэн нылыз, пе, луоз… Та ивор бере мынам ымы зол усьтӥськиз. Кыӵе ним? Италмас? Таиз мар ке но вылез вал кадь. Со сыӵе шуак вал, возьмамтэ шорысь, кыӵе ке кыскисез но вал та бордын, кышкатӥсез но. <…> Ромалы ӵекти жребий куштыны. Куштом ке куштом, пе, мон ас сямен нимало. Александра, Агата, Люба, Алёна но Италмас гожтӥмы. Ачим ик кыски пусъёсты но поттӥ Италмасэз! Ох, кыӵе Рома шумпотӥз: «Учкы, мон верай ук, Инмар даже монэн соглаш!» <…> Кыкетӥ пиналэным мон сразу тодӥ ни, мынам нылы луоз но со одно ик Айно луоз шуыса.

oooo.plus_1248.pngОльга Тойдорова: Пиелэн нимыз Балян. Мынам аслам потӥз сое озьы нимаме. Семьяын нырысьсэ 25 ар талэсь азьло удмурт нимын пизэ агае нимаз. Камай ним понӥз. Соин, дыр, мынам но пиме удмурт сямен нимаме потӥз. <…> Мон лыдӟи со нимлэсь валэктонзэ, со рысь шуыса. Лыдӟи сямъёссэ, кыӵе нылпи луоз шуыса, малы ке шуоно кызьы кораблез нималод, озьы ик уялоз.


oooo.plus_1353.png

Лукерья Шихова: Малпамы кыкнамы ик, но ним бордын мон ачимгес малпаськи, малы ке шуоно пиос уг малпасько кыӵе ке сыӵе нылпи юанъёс сярысь трос. Соослэн мар — кызьы ке шуид, озьы ик карозы. Соин ик мон шуи, Герд нималом-а, кышкасагес, пумит луоз шуыса. Ну, ойдо, пе, нималом.



Кызьы ӵыжы-выжыосты пумитазы пиналъёстылы удмурт ним сётыны малпандэс?

Марина Ходырева: Умоен пумитазы. Мон ачим тодӥсько — ӵыжы-выжыослэсь, песянайёслэсь-песятайёслэсь нимъёссэс ӵем гинэ сётъяло пиналъёслы. Татын вань сыӵеез — соослэн улонзы пинал вылэ выже кадь шуыса. Нош пиналъёслэн али мукет со сярысь теориос вань — егитъёслэн, пиналъёслэн асьсэлэн улон-вылонзы луыны кулэ, улон сюрессы. Соин ним, валамон, татын туж бадӟым инты басьтэ. Ним кулэ шедьтыны туж мур малпаса. Соин ми сыӵе удмурт ним мед луоз шуыса, туж трос малпаса сётӥм.

Наталия Романова: Италмаслы ваньзы пумит луизы: «Мар тӥ татчы малпады, нунымес шудтэм карыны турттӥськоды, дыр. Садикын но, школаын но серекъялозы. Будӥз ке ачиз ик нимзэ воштоз. Паспортной ӝӧкын тӥледыз нокин озьы ниманы уз лэзьы. Мар тӥ вералоды пиналды будӥз ке? Йырды кошкем ни кадь. «Италмас» поэмаын но нылаш кыӵе шудтэм, шуд уз вай та ним».

Таӵезэ ми котькудӥзлэсь ик кылӥмы. Мон курадӟи озьы веракузы. Кытын ке но пушкам оски, Рома учкоз на выль сямен та югдур шоры, аслэсьтыз малпанзэ воштоз шуыса. Озьы ик, йырам малпанъёс но берганы кутскизы: малы ми ваньзы сямен одӥг тӧлъя ик лобыны кулэ?

Из семейного архива
Романовъёслэн семьязы Фото: vk.com (Роман Романов) ©

Ольга Тойдорова: агае пизэ Камай нимакуз ик, ваньзы пумит кариськизы. Собере дышизы но, кельшыны но кутскиз. Мон пиелы удмурт ним сёто шуыса тодӥзы но, туж пӧртэм сямен пумитазы та иворез. Тросэз пумит кариськизы. Шуизы, озьы нокин но уг нима ни, со вунэм нимъёс шуыса, исалозы шуыса.

Лукерья Шихова: Шуо ук, кызьы нималод тани, озьы ик корабль мыноз. Соос шуизы вал, (Кузебай — ред.) Герд репрессиос улэ сюриз, сое виизы, вазь кулӥз, кема ӧз улы. Вот со понна кышкаса шуизы. Собере ми вераны вырим ни, Герд ним — со интернациональной ним шуыса. Трос пӧртэм калыкъёслэн Герд нимо адямиоссы вань, милям гинэ ӧвӧл. Собере озьы карысагес вераны тыршим, медаз ни куаретэ шуыса. Нош асьмелэн, валамон, малпанамы — асьме удмурт Кузебай Гердлэсь нимзэ басьтӥм шуыса.

Нылпидылэсь нимзэ ЗАГС-ын пусйыкуды шуг-секытъёс вал-а?

Марина Ходырева: Регистрациын, кытын регистрировать карим вал, весь веразы, малы тӥ сыӵе ним понӥськоды шуыса, <…> сыӵе секыт пиналъёстылы луоз. Но валэктӥм, ваньмызлы валэктӥськом, <…> со удмурт вашкала нимъёс шуыса. Конечно, адямиос ваньзы паймо, неужели удмуртъёслэн вань асьсэлэн нимъёссы. Вань шуисько, туж трос, быдэс книга гожтэмын.

oooo.plus_1075.pngРоман Романов: Катъя, пиналлы котькыӵе кылэз ним сётыны луэ. Со адямилэсь данзэ гинэ медаз ултӥя. ЗАГС-ын нылпидылы удмурт ним гожтыны пумит луизы ке, кышкатэк ӝӧк борды мыжыкеныды шукке, но косэ ужасьёсты мултэс куанытэк курондэс быдэстыны. Мыным но заявление гожтоно луиз: «1-тӥ южтолэзе вордскем нылылы Италмас ним сётыны курисько». <...> Нош Айнолы ӧз куре ни номыр, ӵемгес пумиськылӥсь ним, лэся.

Ольга Тойдорова: Ӧй вал. Букваосъя гинэ гожтыны косӥзы, малы ке шуоно чузъяськемезъя озьы гинэ ӧз валалэ, кызьы шонер гожтоно. Нокыӵе шуг-секытъёс ӧй вал. Юазы, кыӵе-сыӵе ним шуыса, кытысь со. Нош собере агае, кудӥз пизэ Камай нимаз, радио пыр кылэм Удмуртиын сётэм шер нимъёсты. Соос пӧлын Балян но вылэм. Агае сыӵе шумпотӥз.

Из семейного архива Ольги Тойдородовой
Ольга Тойдорова Балян пиеныз Фото: Ольга Тойдоровалэн архивысьтыз ©

Лукерья Шихова: Шуг-секыт ӧй вал на, со ведь бӧрысьгес кутскиз ай, ми бӧрсьыгес, олокыӵе нимъёс сётканы уг яра шуыса. Мынам картэ ветлӥз, мон ачим ӧй но ветлы. Ӧйтӧд, кыӵе ке но шуг-секытъёс… нокыӵе но ӧвӧл.

Тупало-а нимъёссы пиналъёстылы сямзыя?

Марина Ходырева: Одно ик валэктыны тыршиськом вал пичи дырысенызы, мар со ним нуэ, кыӵе солэн энергетикаез, со нимлэн. Валамон, Зарина — со шунды. Со вордӥськиз вал оштолэзе, со овен, со сыӵе тигр, пӧсь нылаш, сыӵе туж шаплы — соин солэн Зарина нимыз туж умой тупа. Солы зарни тупа, со яратэ зарни. Донай — со сямъёсъя небытгес, со крезьгуро школаын дышетскемын. Балалайкаен но, дедушез кадь, дышетскиз шудыны. Искусство матынгес солы. Донай ним но со кыӵе ке небыт кылӥське.

Марина Ходыревалэн нылпиосыз бадӟымесь ни Фото: Марина Ходыревалэн архивысьтыз ©

Наталия Романова: Нылылэн туж аспӧртэмлыко нимыз. Ма, ачиз но со мынам огшоры нылаш ӧвӧл ук. Сыӵе нимен со одно удмурт йӧно адями луоз! Кызьы меда сое мукет сямен ниман луысал на? Италмас гинэ! <…> Кожасько вал вань пиналъёс Италмас кадь луо… Со ведь мынам бӧрдонлэсь мазэ уг вала али ке но, огназ шудэ, ассэ бадӟым адями сямен возе — ӟечоке, одӥг кылын вераса. Айное нош сыӵе нылашъёс кадь: акылес кечпи, куатапуйы. Ваньзэ мамаезлы но папаезлы возьматыса ужано! <…> Айномы йӧнтэмзэ роддомын ик возьматӥз. Тани али гинэ изьыто нылме, курадӟыса, стена кузя пыласькыны мыно, нош со кытӥ-мар сайкам ини — быдэс роддоме бӧрдэ!

Ольга Тойдорова: Та ним солы тупа. Балянъёс сыӵе асьсэ поннагес, со но огназ яратэ милям. Со, дыр, балянлэсь солэн. А так — визьмо!

Лукерья Шихова: Со милям туж сыӵе ваменэс, ош кадь. Мон шуисько, мынам кадь сямыз шуыса. Мае ке малпа ке карыны, ой, аслэсьтыз каре, ми шуиськом. Милемлы эшъёсмы серекъяса шуо: «Ну вот, Герд ведь нимады. Со но аслэсьтыз каре вал ялан, соин ик тӥляд но пиды аслэсьтыз ваньзэ каре».

Из семейного архива
Лукерья Шихова семьяеныз Фото: Лукерья Шиховалэн архивысьтыз ©

Удмуртиысь ЗАГС ужъёсъя комитетлэн кивалтӥсез Людмила Попова верамъя, анай-атайёс пиналзылы удмурт ним поныны малпазы ке, шугъяськонъёс кылдыны кулэ ӧвӧл. ЗАГС-ын ужасьёс алыны быгато, кылсярысь, лыдпусъёсын, вакчиятэмъёсын, тышкаськонъёсын нимъёс сётэмлэсь. Со сярысь Федерал катэз туэ 1-тӥ куартолэзе Владимир Путин юнматӥз.

«Пинал со нимын улонэз кузя мыноз, вань ужкагазъёсын со луоз, соин ик нылпизэс пусйыны ЗАГС-э лыктэмзылэсь азьвыл анай-атайёс туж мур малпаськыны кулэ. <…> Валамон, быдэ вуэм бераз пинал ми доры лыктыса (нимзэ — ред.) воштыны быгатоз. <…> Но эн вунэтэ, ваньмыз со ужкагазъёс вылын шӧдӥське, <…> сыӵе шуг-секытъёс, мон малпамъя, нокинлы но кулэ ӧвӧл», — шуэ Людмила Попова.

Ватсалом, нылпилэсь нимзэ гожтыку, ЗАГС-ын уг пусъё, кыӵе кылысь со ним кылдӥз. Соин ик, кӧня удмурт нимъёс пусъемын туннэ нуналлы, тодмо ӧвӧл.

Партнеры

Загрузка...
Иворъёс

Кузебай Гердэз буре ваизы Удмуртиын 1-тӥ шуркынмонэ

01.11.2017 16:20
Иворъёс

«Удмурт Кенешлэн» Пичи Кенешаз дышетонъя министерствоысь ӧнерчиосты ӧтьыны малпало

02.11.2017 15:46
Иворъёс

«Элькуновидениелэн» йылпумъян люкетэз ортчоз 4-тӥ шуркынмонэ

03.11.2017 11:59