13.10.2017 13:12
Иворъёс
Кык сюресэз тупатозы Вавож ёросын

Кык сюресэз тупатозы Вавож ёросын

Фото: Николай Кузнецов
Вавож / Удмуртиын

Вавож ёросысь Ӟозлуд — Ӟозлудпочинка но Водӟи — Брызгал — Мӧнья сюресъёсты 2018-тӥ арын тупатозы. Удмуртиысь транспортъя но сюрес возёсъя министрлэсь ужзэ быдэсъясь Алексей Горбачев верамъя, соосты ресайклинг амалэн лэсьтозы.

«Со нимысьтыз немец машина, дуныз 600 миллион манет пала. Со сюрес вылэ потэ, вылзэ изэ, отчы цемент но битум ватсаське, ваньмыз со юнматӥське но выль сюрес шобрет пӧрме», — вераз Алексей Горбачёв.

Со дыре ик ёросын улӥсьёс Мӧньяысен Выль Бияозь но Выль Бияысен Чудӟалудозь сюресъёс урод шуыса веразы. Нырысетӥез «Колос» возёслы ужаны кулэ, нош кыкетӥез — нылпиосты школае нуллыны. Удмуртилэн тӧроез Александр Бречалов элькунысь Транспортъя но сюрес возёсъя министерстволы Мӧнья — Выль Бия сюресэз выльдонэз матысь дырлы ужанрадлыке пыртыны косӥз.

Александр Бречалов верамъя, азьланяз сюресъёсты тупатъян 2018-тӥ арын коньдэтэ вуэм уксёлэн быдӟалаеныз герӟаськемын. Озьы ик соин, кызьы ассэ возьматоз ресайклинг амалэн ужан, ужпум пуктэмын росгес сюресъёсты вылӥ ӟечлыкен выльдыны. Оглом со пусйиз, сюрес выльдонлы коньдонэз люкылыку, нырысь ик саклык висъяськоз дэри дыръя тужгес шуг ветлон люкетъёсы.

«Нырысь ик ми лэсьтыны кулэ со люкетъёсты, соос милям 87, кытӥ сӥзьыл яке тулыс МЧС-лэн спецтехникаеныз но ортчыны уг луы. Соос милям одӥг, кык, куинь толэзьлы цивилизацилэсь палэнтэмын
Александр Бречалов

Тодэ вайытом, та арня вискын Эгра ёросысь Унтэмысь Годэкшурозь сюресэз усьтӥзы. Таяз арын гурт сюресъёсты тупатонлы элькун оглом 800 миллион манет быдтӥз.

Партнеры

Загрузка...
Иворъёс

Вавож ёросын гурт сюреслэсь 10 иськемзэ тупатъялозы

03.10.2017 16:47
Иворъёс

Гурт возёсъя министерство: Удмуртиын котькулэсь трос ю-тысь октэмын

12.10.2017 16:31