15.05.2017 16:56
Иворъёс
Пешниклы сӥзем «Pest-Fest» фестивальлы дасясько Кез ёросын

Пешниклы сӥзем «Pest-Fest» фестивальлы дасясько Кез ёросын

Фото: Дом дружбы народов Удмуртии
Кез / Удмуртиын

20-тӥ куартолэзе Кез ёросысь Мыркчиньыпи (Сосновый Бор) гуртысь «Живица» куно пумитан юртын пешниклы сӥзем кыкетӥез «Pest-Fest» элькун фестиваль ортчоз. Ужанрадлыкез дасямын ни, ӵуказе, 16-тӥ куартолэзе, пешник бичаны потозы. Иворъёсъя «Удмуртия» агентстволы со сярысь вераз Кез ёросысь лулчеберетъя юртысь туризмъя ёзэтлэн кивалтӥсез Ирина Бабина.

«Пешник али гинэ потэ. Ӵуказе ми РДК-ысь быдэс лулчеберетъя огъетэн бичаны мыном. Соосты фестивальын вузалозы, сиёнъёс — пельнянь, перепеч, кутэмнянь — ваньмыз пешниклэсь. Озьы ик ми ялон сётӥмы, калык пешник мед бичалоз шуыса, ассэ пешникез но вузан луоз», — вераз Ирина Бабина.

Фестивальын пешниклэсь пӧртэм сиёнъёсты веръяны луоз, со пӧлын окрошка, салат, шуккем курегпуз, шыд, табань. Ирина Бабиналэн верамезъя, туж ческыт луэ йӧлвылын пуштыртэм пешник.

Ужрадэ Удмуртиысь 12 ёросъёсысь творчествоя коллективъёс ӧтемын, озьы ик Пермь шаерысь куноосты возьмало.

«Со Верещагино ёрос, кык коллективез возьмаськомы. Соос но пешникез бичало, тодо, мар со сыӵе, соин ик дорамы лыктыны шумпотыса соглаш луизы. Лымшор ёросъёс уг тодо, соос тунсыкъяськыса лыкто. Тросэз уг тодо, мар со сыӵе, шӧмъямзы но ӧвӧл, нош уйпалъёс тодо — бичало но, сиё но», — пусйиз Кез ёросысь лулчеберетъя юртысь туризмъя ёзэтлэн кивалтӥсез.

Куноос понна чакламын йӧскалык вожвылъяськонъёс но шудонъёс, уйпал удмуртъёслэсь сиёнзэс пӧранъя мастер-классъёс, арганэн шудӥсьёслэн но такмакъёсты быдэстӥсьёслэн конкурссы. Таяз арын нырысьсэ пельнянез ӝог кутонъя вожвылъяськон ортчоз. Со сяна, этномодая конкурс луоз. Ирина Бабиналэн верамезъя, отчы пыриськозы чеберлыко киужъёсъя юртъёс, ӧтемын Дэбесысь но Красногорскысь усточиос, но мукет мылкыд карисьёсты но уз палэнтэ. 

Куноосты пумитаны кутскозы 9 час 30 минутысен. Шулдыръяськон 16 часозь мыноз. Кез ёросысь лулчеберетъя юртысь туризмъя ёзэтлэн кивалтӥсез верамъя, ужрад котькыӵе куазен ортчоз.

Ватсалом, пешниклы сӥзем «Pest-Fest» фестивалез Кез ёрос но Удмуртиысь Калыкъёслэн эшъяськон юртсы Йӧскалык политикая министерство юрттэмен радъяло. Со «Пельняньлэн дунневыл нуналэз» фестиваль улсын ортче.

Партнеры

Загрузка...
Иворъёс

«Киужъёсъя арня» ортчоз Удмуртиысь чеберлыко киужъёсъя йӧскалык центрын

12.05.2017 17:56
Иворъёс

Пӧртэм удысъёсын азинсконъёс басьтэм Удмуртиысь пиналъёсты «Артеке» но «Сменае» путёвкаосын пусйизы

15.05.2017 12:45