19.05.2017 11:12
Иворъёс
Вить удмурт кылбурчиослэн ужъёссы Россиысь калыкъёслэн кылбуретсылы сӥзем антологие шедизы

Вить удмурт кылбурчиослэн ужъёссы Россиысь калыкъёслэн кылбуретсылы сӥзем антологие шедизы

Фото: labirint.ru
Ижкар / Удмуртиын

Вить удмурт кылбурчиослэн ужъёссы Россиысь калыкъёслэн кылбуретсылы сӥзем антологие шедизы. Со сярысь ивортэ «Удмурт дунне».

Бичетэ пыризы Сергей Матвеевлэн, Пётр Захаровлэн, Татьяна Черновалэн, Анастасия Шумиловалэн, Василий Ванюшевлэн кылбуръёссы.

Сергей Матвеевлэн 1990-тӥ аръёс пумын-2000-тӥ аръёс кутсконын гожтэм куинь кылбуръёсыз быръемын: «Ъ (Чурыт пус)», «Поль Гоген» но «Мон сьӧсь. Ӧрӟи. Бурдъёсыным…» (яратон сярысь).

«Маин соос герӟасько? Нырысь ик, яратон сярысь гожъятэк уг луы, яратон — со котьку но асьмедыз улонтӥ нуэ. Нош чурыт пус образ пыртӥ вераны турттӥсько - мон асме улонын озьы возьматыны турттӥсько, шуом. Малы ке шуоно асьмелэн улон чебер но, югыт но сяна, отын туж трос, шуом, кырсез но, секытэз но, соин ик сое вормон понна кызьы ке но астэ чурыт пуктыны тыршоно-а мар-а. <…> Нош малы «Поль Гоген», мон литератураен сяна, туж тунсыкъяськисько живописен. Соин ик мынам Поль Гоген одӥгез яратоно суредасе», — быръем кылбуръёсыз сярысь иворъёсъя «Удмуртия» агентстволы вераз Сергей Матвеев.

Кылбурчилэн верамезъя, со ассэ востэмгес адямиен лыдъя, со дыре ик ассэ дунъяны но быгатэ. «Гожтэм кылбуръёсты ас пушкад гинэ возьыны умой ӧвӧл, дыр, соку солэн нокыӵе пуштросэз, смыслэз ӧвӧл». Котькуд гожъясьлэн ужъёссэ калыклы возьматэмез потэ.

«Та антология потӥз, быдэс Россие вӧлмоз шуыса малпасько мон. Соин ик кин ке адӟиз ке, мукет калыкъёс, мукет кылын вераськись, мукет пуш дунеен адямиос, адӟозы но учкозы — удмурт адями но та дунне вылын маке но тунсыкозэ малпаськыны быгатэ, маке но тунсыкозэ вераны быгатэ. Со сюлэмез буйгатэ но мылкыд кылдытэ, тон вань дунне вылын шуыса, тон мар ке но аслэсьтыдзэ вераны быгатӥськод шуыса
Сергей Матвеев

Егит кылбурчилэн Анастасия Шумиловалэн 2 кылбурез антологие пыриз: «Идентификация» но «Бызе Тибр, бызе Нил, бызе Чупчи шур…». Соос 2015-тӥ арын потэм нырысетӥ кылбур бичетаз — «Дыр — эктонын» — печатламын вал, вераз иворъёсъя «Удмуртия» агентстволы Шумилова.

«Мон бер гожъяськыны кутски, 24 арескам, вань кылбуръёс со сборникысь одӥг ар куспын гожтэмын. Соин мон туж пайми, куке мынэсьтым, кутскись авторлэсь, кылбуръёсме антологилы бырйизы, мон понна со бадӟым дан. Али мон дышетсконме азьланьтӥсько, удмурт литературая диссертация гожтӥсько, кылбуръёсты удмурт кылэ берыкъясько, озьы ик таяз арын выль кылбур бичетэ потыны кулэ
Анастасия Шумилова

Антологие кылбуръёсты быръён понна Удмуртиын Печатья но калыке ивортодэт вӧлмытонъя агентствтолэн бурд улаз ӧри люкамын вал. Отчы литератураен вырисьёс сяна. литератураез эскерисьёс, тодосчиос пыризы.

«Москва ласянь ми азе курон пуктэмын вал: быръёно 5 кылбурчиосты но соослэсь 2–3 кылбуръёссэс. Ми тыршим, отчы егитъёс но, арлыдоос но, воргорон но нылкышно кылбурчиос мед сюрозы шуыса», — вераз кылбур быръёнъя ӧрилэн ёзчиез Зинаида Рябинина.

Антологие пыризы Россиысь 57 кылъёсын гожъяськись 229 кылбурчиослэн 751 произведениоссы. Книгаез лэсьтон бордын ужаз 800 пала адями, 142-ез соос пӧлысь — кылысь кылэ берыктӥсьёс, котькуд кылбур ӟуч кылэ берыктэмын на. Озьы ик отын вань литературной кылъёс но Россиысь калыкъёслэн кылбурет йылолъёссы сярысь очеркъёс.

Та выллем бичетъёс Россиын но, кунгож сьӧрын но поттылэмын ӧй вал на.

Али Россиысь Литературая, книга поттонъя но лыдӟиськонъя комитет прозая, нылпи литературая но драматургияя таӵе ик антологиос дася. Нош Россиысь калыкъёслэн кылбуретсылы сӥзем книгаен тодматскыны луоз 3–6 инвожое Москваын литературая «Красная площадь» фестивальын.

Партнеры

Загрузка...
Иворъёс

23 градусозь шуныт луоз Удмуртиын 19-тӥ куартолэзе

19.05.2017 09:02