Понедельник, 21 августа 2017
Ижевск +24 °C
07.08.2017 16:31
Иворъёс
Перепеч «Россилэн сиён-юонъя картаяз» нырысетӥез удмурт сиён луоз

Перепеч «Россилэн сиён-юонъя картаяз» нырысетӥез удмурт сиён луоз

Фото: Алёна Селезнёва
Ижкар / Удмуртиын

Удмуртия луиз куинетӥез Россиысь улосвыл, кытчы «Россилэн сиён-юонъя картаез» ӵектослэн экспедицияз пыриськисьёс лыктӥзы. Элькунэ соос арнянуналэ, 6-тӥ гудырикошконэ, вуизы но татын куинь нунал улозы. Куноос шаерысьтымы сиён-юонъёсын тодматскозы, куд-огзэ нимысьтыз картае пыртозы, сое котькуд турист уже кутыны быгатоз.

6-тӥ гудырикошконэ куноос «Нечкиное» но «Бобровая долина» этнокомплексэ вуылӥзы. Юри соос понна улосвылысь сиён-юонъёсты пӧразы. Экспедицие пыриськисьёсты пумитаны Ижкаре вуизы «Брангуртысь песянайёс», соослы луыса но удмурт перепеч туж тодмо луиз.

Ӵапак перепеч сиён-юонъя картае нырысь ик пыртэмын луоз, — вераз ӵектослэн кивалтӥсез, Россиын агроэкотуризмез азинтонлы мылкыд сётӥсь Екатерина Шаповалова.

Нимысьтыз вераны кулэ, картае пыртэм рецептъёс — интыысь сиён-юонъёслэсь пӧраськемъёс. Картаын пусъемын луозы туризмъя интыос яке кафеос, кытын котькуд адями, кунгож сьӧрысь лыктэм яке Россиысь, со сиёнъёсты веръяны быгатоз. «Россилэн сиён-юонъя картаез» ӟуч, англи кылъёсын, азьланяз мукет кунсьӧр кылъёсын гожтэмын луоз, озьы ик мобильной ватсэтъёс луозы.

Интыысь сиён-юонъёсын тодматон улсын куноослы ӵектӥзы зыретэн табань, пӧртэм пушкесэн перепеч, ӵынатэм стерлядь, кирень куарын пыжем чипей, вож помидорлэсь сылалтӥськемъёс, борылэсь варення, турынъёслэсь парем чай, виртырем, ӟег пызьлэсь шулэсь кутэмнянь, Шаркан палъёсысь коньыгуби, пельнянь.


«Удмуртиын туж дунъясько горд кушман но солэсь пӧраськемъёс — ми сое пыжиськом, пӧзьтӥськом, нелькиськом. Одӥгез сиён — кузятэмен пыжем горд кушман», — вераз тодматон дыръя ресторатор Кирилл Барков.

Экспедицие пыриськисьёс туннэ Сарапулэ мынӥзы, отын соос понна «гастрономической бродилка» ортчытозы.

«Со сиён-юонъёсъя экскурсиос понна нимысьтыз кылдытэм технология. Со нимаз радлыкъя мынэ. «Гастрономической бродилкаын» эскериськод сое, мае нокытын уд быгатӥськы ни, угось со куремъя лэсьтӥське. Со кухняез мукет палтӥз усьтон. Со нимысьтыз та тематикая лэсьтӥське», — валэктӥз Удмуртиысь Кластеръёсын азинскон центрлэн кивалтӥсез Полина Павлова.

Сиён-юонъя туризм Удмурт Элькунын азинске, — пусйиз улосвылысь лулчеберетъя но туризмъя министр Владимир Соловьёв. Со сяме пыӵам ужрадъёсты тодэ вайытӥз — «Пельняньлэн дунневыл нуналэз»фестиваль но Шаркан ёросын финн-угор сиён-юонъя «Быг-быг» фестиваль. «Со выллем ӵектосъёслы луыса милям эшшо тросгес луонлыкъёсмы, <…> кичӧлтӥсьёсмы луозы, соос улосвыллэсь сиён-юонъёсъя луонлыкъёссэ азинтыны выль кичӧлтонъёсын потозы», — пусйиз Владимир Соловьёв.

«Удмуртия агро- но экотуризм азинскон интывыл сямен Россиын тодмо ни. Милям туж трос экогуртъёс кылдо, вань фермеръёс, кудъёсыз сиён-юонъёс поттэм сяна, туристъёсты но ӧтё, доразы интыяло но соос понна ваньзэ радъяло
элькун тӧролэн Росси азьмурт бордын ялан ужась оскем муртэзлэн нырысетӥ воштӥсез Ирина Теслева

«Ростуризмлэн ӵектосаз сиён-юонъёсты сьӧрло вузаны луонлык но, гастрономия но пыртэмын, кунын котькуд улосвылын аслаз кухняез мед луоз. Котькуд улосвылын мар ке но сыӵезэ верьяны мед луоз, мае нокытын уз ӵектэ ни», — пусйиз со.

Экспортэз, ужбергатонэз но лулчеберетэз вӧлмытонъя «Лэсьтэмын Россиын» йӧскалык стратеги улсын ӵектосэз быдэстэ Туризмъя федерал агентство Россиысь экспортъя центрен но Рестораторъёслэн но отельеръёслэн федерациенызы ӵош. Со 2017-тӥ арын 3-тӥ гудырикошконэ Суздальын кутскиз.

Сиён-юонъя интерактивной картаез Ростуризмлэн нимлыко сайтысьтыз, russiatravel порталысь учкыны луоз.

Партнеры

Загрузка...
Журналист утчаськомы
Иворъёс

Эгра ёросысь Сеп гуртын горд сюйлэсь арбериос лэсьтон киужез улӟытыны малпало

30.05.2017 11:29
Иворъёс

Туризмъя ужрадъёсын огъя календарь кылдытозы Удмуртиын

19.07.2017 16:27
Иворъёс

Бесерманъёслэн юртъерзы кылдоз «Лудорвай» музейын 2018-тӥ арын

25.07.2017 09:27