10.10.2017 11:59
Иворъёс
Коми-Пермяк округысь но Марий Элысь театръёс спектаклъёссэс Удмуртиысь учкисьёслы возьматозы

Коми-Пермяк округысь но Марий Элысь театръёс спектаклъёссэс Удмуртиысь учкисьёслы возьматозы

Фото: Григорий Фомин
Ижкар / Удмуртиын

Коньывуонэ но шуркынмонэ Удмуртие Коми-Пермяк округысь драмая М. Горький нимо йӧскалык театр (Кудымкар) но Марий Элысь драмая М. Шкетан нимо йӧскалык театр (Йошкар-Ола) вуылозы. «Бадӟым гастрольёс. Улосвылъёс» федерал программа улсын соос асьсэлэсь ужъёссэс Удмуртиысь йӧскалык театрлэн сцена вылаз возьматозы. Иворъёсъя «Удмуртия» агентстволы со сярысь ивортӥз Удмуртиысь йӧскалык театрысь ӧнерчи Наталия Панфилова.

Коньывуон пумын вуоз Коми-Пермяк театр. 28-тӥ коньывуонэ Николай Колядалэсь «Уйди-уйди» трагикомедизэ  (ӟуч кылын) возьматозы, сое пуктӥз Пермь шаерлэн лулчеберет но искусство удысысь премиезлэн лауреатэз Станислав Мещангин. Спектакль Туала драматургияя ««Коляда-Plays-2009» III калыккуспо фестивальын гран-при утӥз (Екатеринбург). Россиысь каръёсысь покчи театръёслэн VIII фестивалязы вормисе потӥз. (16+)

29-тӥ коньывуонэ пиналъёслы Адольф Шапиролэн «Датская история» пьесаезъя «Гадкий утёнОК» спектакль (ӟуч кылын) возьматозы. Хип-хоп skazka ӧръя сое пуктӥз Москваысь режиссёр Анна Потапова. Спектакльын шудозы театрысь егит артистъёс — Санкт-Петербургысь театр искусствоя академиын дышетскем муртъёс. Соос асьсэос но возьматонэз дасянэ пыриськизы, рэп амалэн кӧня ке кырӟанъёс гожтӥзы. (9+)

11-тӥ шуркынмонэ Марий Элысь театр Владимир Гуркинлэн «Любовь и голуби» спектакленыз тодматоз, со пор кылын пор шӧмын пуктэмын. Спектакльын яратон, вордскем юрт но сюлэм куремъя гинэ улӥсь адямиос сярысь верамын. (12+)

12-тӥ шуркынмонэ Удмуртиысь учкисьёс «В некотором царстве…» крезьгуро спектаклез ( ӟуч кылын) адӟозы. Быдэс семьяен учкыны чаклам ужын ӟуч калык выжыкыл но туала улон пӧлэстӥськизы. Кылдытӥсьёсыз — Россиысь егит но таланто авторъёс: тодмо крезьгурчи но аранжировщик Егор Шашин но кырӟанъёслы кылбур гожъясь Наталья Кузьминых, пуктӥз Станислав Васильев. (6+)

Вераны кулэ, спектакльёсты бырйыку Удмуртиысь театр Кудымкарысь но Йошкар-Олаысь театръёслэсь аспӧртэмлыксэс но репертуарзэс лыдэ басьтӥз. Асьме учкисьёслы возьматон понна тужгес устооссэ, калык пӧлын тужгес бадӟым тунсыкъяськон ӝутыны быгатэм постановкаосты бырйизы. 

Шуркынмонэ Удмуртиысь йӧскалык театрлэсь ужъёссэ дунъяны быгатозы Марий Элысь но Коми-Пермяк округысь учкисьёс.

Удмурт театр вошъяськон гастрольёсы нырысьсэ пыриське, пусъемын ужъюртлэн ивортоназ. Со театръёслэсь быгатонлыкъёссэс но луонлыкъёссэс, режиссёръёслэсь ужамзэс дунъяны но ӵошатыны, Ижкарысь, Йошкар-Олаысь но Кудымакрысь учкисьёсты асьсэ творчествоенызы тодматыны, кылъя ӵыжы-выжы луись улосвылъёсысь театръёслэсь кусыпъёссэс азинтыны луонлык сётоз.

ВАТСАН

«Бадӟым гастрольёс» огъяросси программа ньылетӥ арзэ ортчытӥське ни. Россиын улӥсьёс оштолэзьысен шуркынмонозь быдэс кунысь театръёслэсь устооссэ спектакльёссэс адӟыны быгато — учкисьёслы кельшемъёссэ но, чылкак выль ужъёсты но. Гастрольёс Россиысь лулчеберетъя министерство но Гастроль ужлы юрттонъя федерал центр юрттэм улсын радъясько.


Партнеры

Загрузка...
Иворъёс

Венгриысь ансамбль этнокультурая «Палэзян» финн-угор фестивале пыриськоз

05.10.2017 11:17
Статьяос

Философской но лирической кырӟанъёс но рэп чузъяськозы «Элькуновидение» вожвылъяськонын Ижкарын

09.10.2017 12:50