11.10.2017 16:59
Иворъёс
Алнаш ёросысь нылпиос Герман Ходырев нимо премия понна вожвылъясько

Алнаш ёросысь нылпиос Герман Ходырев нимо премия понна вожвылъясько

Фото: Ульяна Колмогорова
Алнаш / Удмуртиын

Алнаш ёросысь школаосын дышетскись пиналъёс Герман Ходырев нимо литературая ёрос премиез басьтон понна вожвылъясько. Ужъёсты Алнашысь нылпи лыдӟетъюртын 1-тӥ шуркынмонозь возьмало. Со сярысь иворъёсъя «Удмуртия» агентстволы ужъюртлэн кивалтӥсез Елена Губкина вераз.

Герман Ходырев нимо премия 2010-тӥ арын юнматэмын вал. 2011-тӥ арысен кутскыса котькуд ар ёросысь 1–11 классын дышетскись нылпиос литературая ужъёссэс ыстыны быгато. Ужез радъясьёс конкурсэ веросъёсты, кылбуръёсты, эссеосты но журналистикая ужъёсты куто. Елена Губкиналэн верамезъя, арлы быдэ вожвылъяськонэ 18–34 пиналъёс пырисько, куиньзэ тужгес усто гожъяськисьёсты премиен пусъё.

«Та литературая премия нылпиослэсь удмурт кылэз но удмурт литератураез дышетыны мылкыдзэс ӝутон понна малпамын. Асьмелэн удмурт кылын премиос ӧжыт, нылпиос пушкын уката но, соин ми сое малпам вал
Елена Губкина

Алнашысь нылпи лыдӟетъюртлэн кивалтӥсез пусйиз, тросэз нылпиос премия понна вожвылъяськонэ арысь аре пырисько. Нылпи лыдӟетъюрт «Ошмес син» литературая кружокен ӵош гожъяськись нылпиосты будэтэ. Премия басьтэмен валче, пиналъёслэн литература бордын ужан мылкыдзы эшшо но ӝутӥське. Кылсярысь, 2013-тӥ арын премиен пусъем Анна Бурдина та дыре Удмурт кун университетын журналистлы дышетске. Егит кылбурчилэн ужъёсызъя кырӟанъёс но кылдо. Нош «Шунды» огазеяськонлэн «Куарагур» ӵектосаз пыриськон Анналэсь «Гочатыса» кылбур бичетсэ поттыны луонлык сётӥз.

Со книгаеныз Анна Бурдина Алнаш ёросысь лыдӟисьёсты 17-тӥ шуркынмонэ Алнаш литературалэсь Удмуртиын нуналъёссэ ворсан ужрадын тодматоз. Соку ик Герман Ходырев нимо литературая премилэсь лауреатъёссэ но пусъёзы.

Тодэ вайытом, Алнаш литературалэн Удмуртиын нуналъёсыз элькунысь йӧскалык лыдӟетъюртлэн ӵектосэз улсын ортчо. Ар ӵоже Алнаш ёросысь кылбурчиослэн, гожъясьёслэн но тодмо адямиослэн книгаосынызы, туспуктэмъёсынызы адӟытонъёс, пумиськонъёс, конференциос но мукет ужрадъёс радъяськыло. 

Партнеры

Загрузка...
Иворъёс

Удмуртиын паласькись лек вирус инфекция сэрен нылпи садэз карантинэ ворсазы

11.10.2017 10:37
Иворъёс

Гуртысь маскарчиослэн «Шӧкычкар» фестивальзы ортчоз Удмуртиын 13-тӥ коньывуонэ

11.10.2017 13:52