07.11.2017 12:36
Иворъёс
«Элькуновидениын» вормись Павел Смирнов: кырӟанэз яратон атаелэсь пыӵамын

«Элькуновидениын» вормись Павел Смирнов: кырӟанэз яратон атаелэсь пыӵамын

Фото: Стас Иванов
Сигаево / Удмуртиын

4-тӥ шуркынмонэ удмурт кырӟанъя «Элькуновидение-2017» вожвылъяськонлэн йылпумъян люкетэз ортчиз. Ёрос но удысужлыко жюрилэсь баллъёссэс ватсаса, устозэ кырӟась луиз Сарапул ёросысь Павел Смирнов

Со та вожвылъяськонэ куинетӥзэ пыриське ни, кылем аръёсы Шаркан ёрослэсь данзэ утиз, нош туэ — Сарапул ёрос понна кырӟаз. Иворъёсъя «Удмуртия» агентство «Элькуновидениын» вормисен вераськиз но тодӥз, кытын вордскемын Павел Смирнов, кыӵе удысын со ужа но кинлы вормемез понна тау каре.

«Элькуновидение» тӥ куинь пол пыриськиды ни. Азьвыл Шаркан ёрослэсь, нош туэ — Сарапул ёрослэсь. Кытысь бен тӥ асьтэос?

 — Быдэс Удмуртиысь-а, мар-а шуоно. Мон вордӥськемын Уддяди гуртын (Кияса ёрос — ред.), 10 аресозь отын будэмын. Собере Шарканэ кошким, 16 аресозь отын улӥ. Собере Сарапулэ кошки. Сарапулын 10 ар улӥ, 7 ар ужай лулчеберет удысын Сигаевоын <…> собере кошки Шарканэ, отын кык ар ужай. Али нош ик татын, Сигаевоын. <…>

(Удмурт элькунысь лулчеберетъя — ред.) колледжын дышетскыкум, практикае сюри вал Сарапул драмтеатре. Мынам туганэ но Сарапулысь вал. Практика мыным Сарапул драмтеатрын кельшиз, монэ ӧтизы отчы ужаны. Туганэ но татысь бере, татчы ик кылим улыны, кышнояським но ми.

Тӥ дышетскемын-а кырӟасьлы? Кытысь крезьгурез яратонды?

 — Мон дышетскемея «режиссёр театрализованных мероприятий». Кырӟан — со огшоры кельше, атаелэсь со пыӵамын эшшо. <…> Вал сыӵе кырӟан гожъясь Николай Николаевич Уткин. Солэн пиосыз али ВИА «Мылкыдын» шудо. <…> Вот Николай Николаевич Уткин доры атае монэ ваиз вал (атаелэн эшез со), 5 арес вал мыным соку. Со дорын мон кырӟаны кутски. Со мынам крезьгурен дышетӥсе вал школаын. Нырысетӥ кырӟанэ вал мынам «Эх, каллен мон будӥсько, Тэшкыли кадь улӥсько...». Мыным маиз кельшиз — мыным соку шудӥзы вал улэп инструментэн 10-тӥ классын дышетскисьёс, пияшъёс. Туж тунсыко вал мыным.

Нош асьтэос кемалась-а кырӟан гожъяськоды ни?

 — Мынам нырысетӥ удмурт кырӟанэ вордӥськиз 2015-тӥ арын, «Чузъяське» кырӟан. Трос кырӟанэ ӧвӧл, али мынам эшшо кык кырӟан потын кулэ на, ӝоген. Антон Васильевен ӵош та кык кырӟан бордын ужаськом. Ольга Перевозчиковалэн («Элькуновидение-2017» вожвылъяськонлы устозэ кылбурез гожтӥсь - ред.) со братэз, нялтас вераса. Мон ӵем уг гожъяськы, мынам, кызьы шуод, йырам лыктэ ке, сюлэмам мар ке лыктэ ке, гожтӥсько. Мон ведь уг пуксиськы, тани али пуксёно, кырӟан гожтоно шуыса. Мон озьы уг быгатӥськы. Мынам мылкыд вань ке, ачиз вордӥське.

Кырӟан — со валтӥсь ужды ӧвӧл ке, кытын ужаськоды?

 — Мон бадӟым ужрадъёсын вырисько — ёрос, элькун, улосвылкуспо. Тани мон Шарканысь кошки ке но, мон ведь Шарканын но ужасько. Али тани шарканъёсын ӵош 10-тӥ шуркынмонэ мынӥськом Киясае концертэн. Собере ортчытыны дасяськом «Фестиваль сказочных героев», Шарканын луоз. Шарканъёсын ӵош мон пуктӥсько сое. Соин ик мынам дыры ӧвӧл, жаляса верано, коллектив кыӵе ке нуыны. Мынам кышное хореограф, солэн коллективеныз мон тани «Актёрское мастерство» урокъёс нуисько куд-ог.

Кытысь мылкыд но кужым куинь пол «Элькуновидение» пыриськыны шедьтӥды?

 — Нырысетӥзэ пыриськи но пӧрмиз кадь но, ӧз но пӧрмы кадь. Вормыны ӧй быгаты бере, эшшо кулэ на. Собере нош ик ӧй быгаты бере, нош ик эшшо кулэ на. Вот озьы, сётӥськонтэм понна-а, мар-а шуод.

Кыӵе мылкыдды вал вормиды шуыса тодэмды бере?

— Оскон сразу ӧз лыкты. Отын мынам кышное, анае шумпотӥзы золгес кадь. Соос сразу тэтчаны кутскизы, валазы, ворми шуыса. Мынам особо сыӵе ӧй вал, али ке но.


Вожвылъяськонын утэм 40 сюрс манетэз кытчы кутыны малпаськоды?

— Мынам квартираям али ремонт, укно пукто.

Мар сётӥз конкурсын вормон но кызьы улонды табере воштӥськоз?

— Концертъёсын мон кылем арысен ветлыны кутски ни «Куинь Светӥосын» ӵош. Али но концертъёсын ветлыны кутском, нырысетӥез Можгаын луоз. Со ласянь, со мыным туж зол кельше. Мыным вообще кельше адямиослы аслэсьтым кырӟанъёсме адӟытыны, эшшо ик, куке соос со кырӟанъёсме умоен пумитало. <...> Кызьы ужасько вал, озьы ик ужало. Кырӟанъёс тросгес гожъяны кутско, оло. 

Кинлы тау каремды потэ вормемды понна?

 — Мон кырӟанэз куке гожтӥ, малпай, мыным аранжировка кулэ луиз. Нырысьсэ мон келяй вал одӥг кырӟанэз, малы ке шуоно одӥг кырӟанэн кулэ вал пыриськыны. Собере мон (Анатолий — ред.) Эркишевлы жингыртӥ но юай, вуттод-а, уд-а аранжировка гожтыны шуыса. Со малпаськиз, малпаськиз но ярам, пе, гожто ни. Туж сыӵе чаляк аранжировказэ гожтӥз. <…> Ноку но озьы ӧй малпа вал, но Толик, мукет адями, мыным юрттӥз аслэсьтым кырӟанме мургес, шонергес валаны. Соин ик али студийной записьын мукет сямен со кырӟан кылӥське, мукет сямен со чузъяське. Со ласянь туж зол юрттӥз со.

Тау шуысал мон одно ик кышноелы но анаелы, малы ке шуоно соослы мон кырӟанме адӟытӥ. Соос мыным шуизы, та кырӟанэз конкурсэ ыстоно шуыса. Мон мукетсэ малпасько вал. Озьы ик вань адямиослы, кин сюлмаськиз, кин юрттӥз дасяны костюмез.

Тодэ вайытом, 4-тӥ шуркынмонэ «Мынам Удмуртие» телеканаллэн меӵак эфираз «Элькуновидение-2017» вожвылъяськонлэн йылпумъян люкетэз ортчиз. Финалэ потэм 14 кызанъёслы асьсэлэсь баллъёссэс удысужлыко жюрилэн ёзчиосыз пуктылӥзы. Сарапул ёросысь Павел Смирновлы соос тужгес вылӥ баллъёс ӧз ке но пуктэ, вожвылъяськонлэн кык люкетаз оглом 114 балл (94+20) люкамез вормыны луонлык сётӥз. 



Партнеры

Загрузка...
Статьяос

Удмурт нимын пиналъёс: туала анай-атайёслэн выжызэс гажамзы

03.11.2017 13:16
Иворъёс

Меӵак возьматон: «Элькуновидение-2017» вожвылъяськонлэн йылпумъян люкетэз

04.11.2017 17:00
Иворъёс

Павел Смирнов вормиз «Элькуновидение-2017» вожвылъяськонын

04.11.2017 19:31