07.11.2017 14:40
Иворъёс
Удмурт кылбурчиез Анастасия Шумиловаез финн-угор премиен пусйизы

Удмурт кылбурчиез Анастасия Шумиловаез финн-угор премиен пусйизы

Фото: vk.com («ДЫР-ЭКТОН» кылбур бичетэн тодматскон)
Таллин / Эстония

Егит удмурт кылбурчилэсь Анастасия Шумиловалэсь «Дыр — эктон» бичетсэ Эстониысь Ӵыжы-выжы калыкъёслэн программаенызы кылдытэм литературая премиен пусйизы. Со сярысь иворъёсъя «Удмуртия» агентстволы кылбурчи ачиз вераз.

Премиез Эстониысь дышетонъя министерство но Финн-угор литератураослэн ассоциацизы 11-тӥ пол радъяло ни. Конкурслы йылпумъянъёс котькуд ар 1-тӥ шуркынмонэ, Кузебай Гердэз буре ваён нуналэ, тодмо луо, шуиз Анастасия Шумилова.

Кылбурчи ивортэмъя, премия сярысь со азьвыл ик тодӥз но удмурт гожъяськисьёс пӧлысь лауреатъёсты чаклалляз. Кылбур бичетэз потэм бере, тодмоосыз Анастасия Шумиловалы кылем арын ик сое конкурсэ ыстыны ӵектӥзы вал. Соку кылбурчи ӧз пӧрмы, нош туэ одно ик вожвылъяськонэ пыриськыны малпаз. Бичетэзлы рецензия кылтодосъя кандидат Вера Пантелеева гожтӥз.

«Мон ноку озьы малпаса уг улӥськы, вормоно вал, вормоно вал шуыса. Кызьы луоз — луоз. Таяз арын озьы луиз
Анастасия Шумилова

Премилэн быдӟалаез 833 евро. Та коньдонэн Анастасия Шумилова выль бичетсэ поттыны малпа. Отчы пырись кылбуръёсыз туннэ нуналлы радъямын ни, вёрстка но дизайн бордын уж мынэ, шуиз кылбурчи.

«Ми возьмаськом вал кыӵе ке коньдон сое поттыны. Вот как раз та премиез басьтӥ. Мон малпасько со коньдонэн поттыны выль бичет», — ивортӥз Анастасия Шумилова.

Ватсалом, Эстониысь Ӵыжы-выжы калыкъёслэн программазылэн литературая премиеныз проза номинациын пор писатель Светлана Бессонова пусъемын, нош нылпи литература удысын — коми гожъясь Нина Обрезкова. Конкурсэ ваньмыз 19 финн-угор писательёс пыриськизы.

Тодэ вайытом, Анастасия Шумиловалэн «Дыр — эктон» бичетысьтыз 2 кылбурез — «Идентификация» но «Бызе Тибр, бызе Нил, бызе Чупчи шур…» — Россиысь калыкъёслэн кылбуретсылы сӥзем антологие пыриз.

Партнеры

Загрузка...
Иворъёс

Удмуртилэн фестивалез ортчоз Санкт-Петербургын

07.11.2017 11:03
Иворъёс

«Элькуновидениын» вормись Павел Смирнов: кырӟанэз яратон атаелэсь пыӵамын

07.11.2017 12:36