13.11.2017 12:15
Иворъёс
«Пичи Чеберайёс но Батыръёс» элькун фестиваль йылпумъяськиз Удмуртиын

«Пичи Чеберайёс но Батыръёс» элькун фестиваль йылпумъяськиз Удмуртиын

Фото: Наталья Еркешева
Ижкар / Удмуртиын

10-тӥ шуркынмонэ Ижкарын Калыкъёслэн эшъяськон юртазы «Пичи Чеберайёс но Батыръёс» элькун фестивальлэн йылпумъян люкетэз ортчиз. Отчы Удмуртиысь 19 ёросъёсысь но куинь каръёсысь вожвылъяськонлэн нырысетӥ люкетаз вормисьёс люкаськизы.

«Милям кыкетӥ арзэ ни быдэс элькун кадь пыриське. <…> Ӧз пыриське со ёросъёс гинэ, кытын уг дышето удмурт кылэз нылпи садъёсын. Мон шумпотӥсько, тани калыкез дышетонъя министерствоен ӵош кусып шедьтӥмы шуыса. Пыриськемзы потэ ни. Пыриськемзы потэ визьнодасьёслэн, пиналъёссэс дышетэмзы потэ, пыриськемзы потэ анай-атайёслэн», — пусйиз фестивалез радъясь, «Удмурт нылкышно кенеш» огазеяськонлэн кивалтӥсез Надежда Степанова.


Со верамъя, радъясьёс котькуд ар пиналъёсты шумпоттыны тыршо, мед соослэн азьланяз но удмурт кылэз дышетыны мылкыдзы луоз шуыса. Соин ик фестивальлэн йылпумъян люкетаз вормисьёсты уг висъяло ни. Соос ваньзы вормисьёс, шуэ Надежда Степанова.

«Удмурт нылкышно кенеш» огазеяськонлэн кивалтӥсез ивортэмъя, фестиваль нырысь ик удмурт кылэз азинтон понна радъяське. Вакчи дыр куспын конкурслы дасяськыса пиналъёс тодо, марлэсь удмурт сиён пӧрало, буёлъёслэсь удмурт нимъёссэс, вашкала удмурт батыръёс сярысь.

«Огшоры, шуом, эктон-кырӟан сяна, тыршиськом ини со (конкурс — ред.) удмурт кылэз мед азинтоз, удмурт кылэз мед азинтоз семьяын. Тани анай-атайёс туннэ трос, мон туж шумпотӥсько. <…> Мон оскисько, соос та конкурсын бере, соос семьяязы но удмурт кылын вераськозы шуыса
Надежда Степанова
 

Кызьы вераз иворъёсъя «Удмуртия» агентстволы Дэри черкогуртысь 1 номеро нылпи садысь крезьгуръя кивалтӥсь Елена Колеватых, пиналъёсты удмурт кыллы дышетыны та дыре туж шуг.

«Нырысь ужаку, кылъёссэс но умой уг верало вал <…>. Али выль кырӟанъёс дышетыку но чаляк дышето ни соос. Кылъёс тодмо, может соос берыктонзэ уг но тодо, но соос туж чаляк дышето ни. Кылбуръёс дышето но берыктон сразу мынэ, пыӵа кадь соослы. Али валалогес ини», — шуэ Елена Колеватых.

Нош каръёсын нылпиослы удмуртлыкез пыӵатыны секытгес ке но, куд-ог семьяосын пиналъёссы пичи дырысен ик кык кылэз тодо ни: удмуртсэ но, ӟучсэ но. Одӥгез соос пӧлысь Ижкарысь Кузебай Герд нимо нылпи садэ ветлӥсь Артём Сараматов. Солэн анаез Елена Сараматова верамъя, группаязы удмурт кылын вераськисьёс 2–3 сяна ӧвӧл бере, пизэ удмуртэ выжтыны берло дыре секытгес но секытгес йӧтэ. Анаез Артёмлы удмуртъёсын удмурт сямен, нош ӟучъёсын ӟуч сямен вераськон сямез пыӵатэ.

«Котькуд нылпимы милям выжыысь выжые удмурт кылын вераське. Кырын ке но 13 ар улӥськомы ни, малы ке но малпай, пиналмы ӟуч кылын вераськись луиз ке, сое ӵыжы-выжыос но уз валалэ. Аслым ачим малпаськи но шуи, солы улытозяз но удмурт кыл кулэ луоз на, соин ик удмурт мед будоз
Елена Сараматова

Нош 214-тӥ нылпи садысь Владимир Евдокимовлэн анаез Елена Евдокимова уг вала, мылы туала удмурт анай-атайёс пиналзэс удмурт кыллы уг дышето.

«Секыт-а, мар-а куспад вераськыны? Вообще-то секыт ӧвӧл. Ми сое (пимес — ред.) нимысьтыз ӧм дышетэ но, бон вераське но, шумпотӥсько. <…> Шумпотӥсько, таӵе конкурсэ пыриськыны луонлыкез вань шуыса. Ӟучъёс шаплыесь бере, мукет вожвылъяськонъёс уггес йӧто удмуртъёслы», — шуэ Елена Евдокимова.

Фестивалез радъясь Надежда Степанова малпамъя, вожвылъяськон анай-атайёслы оскон сётоз, соос шонер сюрес вылын шуыса. Нош пиналъёслы со, оло, азьланяз артист улонэ нырысетӥ вамыш луоз.

«Мон яратӥсько кырӟаны но, эктыны но, туж дышетскеме потэ арганэн шудыны. Мон быгатӥсько ини Николай Анисимов кадь кырӟаны, но эшшо умойгес потэ кырӟаме. Эшшо мынам потэ на Ашихмин Александр кадь зол арганэн шудэме
Егор Маштаков, Пичи Пурга черкогуртысь батырпи

Тодэ вайытом, «Пичи Чеберайёс но Батыръёс» фестиваль таяз арын куатетӥзэ ортчиз ни. Кыкетӥ ар отчы быдэс Удмуртиысь мылкыд карись нылпи садъёс пырисько. Ужрадлэн ёрос люкетаз вормись пиналъёсты Ижкарын Калыкъёслэн эшъяськон юртазы данъяло.

Партнеры

Загрузка...
Статьяос

Удмурт нимын пиналъёс: туала анай-атайёслэн выжызэс гажамзы

03.11.2017 13:16
Иворъёс

Валентина Корепанова: удмурт кылэз дышетӥсь пиналъёслэн лыдзы кулэсмоз шуыса кышкытлык вань

10.11.2017 17:05