13.11.2017 16:43
Иворъёс
Санкт-Петербургын Удмуртилэн фестивалез минут ӵоже чус улыса кутскиз

Санкт-Петербургын Удмуртилэн фестивалез минут ӵоже чус улыса кутскиз

Фото: vk.com (Удмурт Кенеш в Санкт-Петербурге)
Санкт-Петербург / Россиын

11-тӥ но 12-тӥ шуркынмонэ Санкт-Петербургын «Бадӟым Шаерлэн покчи калыкъёсыз» ӵектос улсын «Невалэн ярдураз Удмуртилэн фестивалез» («Фестиваль Удмуртии на берегах Невы») ортчиз. Ижкарын улон юртлэн люкетэз куашкамен сэрен быремъёсты буре вайыса, кӧснуналэ Йӧслыкъёслэн юртазы ужрад минут ӵоже чус улыса кутскиз. Со сярысь ивортэ «Удмурт Кенеш» огазеяськонлэн Санкт-Петербургысь но Ленинград улосвылысь ёзэтэз «ВКонтакте» вотэсысь бамаз.

Йӧслыкъёслэн юртазы лымшор но уйпал удмуртъёслэсь йылолъёссэс Вавожысь «Гербер» но Дэбесысь «Шудбур» коллективъёс возьматӥзы. Яркыт концертэз «Супер-удмурты» кырӟанэныз Богдан Анфиногенов йылпумъяз.

12-тӥ шуркынмонэ фестиваль «Рыбацкий» культура дворецын азьланьтӥськиз. Ужъюртысь режиссёрлэн Валентина Морозовалэн ивортэмезъя, ужрадэ 400-лэсь трос адями пыриськиз.

Санкт-Петербургын Удмуртилэн фестивалез
Санкт-Петербургын Удмуртилэн фестивалез
14 ФОТО

«Удмурт Кенешлэн» ёзэтэз «Удмурт гуртлэн улон-вылонэз», «Удмуртилэн инкуазез», «Удмурт Элькунысь тодмо адямиос» фотоадӟытонъёс дасяз. Ижкарысь шаертодонъя музей чеберлыко киужъёсын адӟытон радъяз.

«Удмуртия — ошмесо шаер» конференциын «Удмурт Кенешлэн» ёзэтэзлэн кивалтӥсез Татьяна Серебренникова Санкт-Петербургын улӥсь удмуртъёслэн улон-вылонзы сярысь вераськиз, но ӵектосъёсынызы тодматӥз. Люкаськем калыклы вазиськизы Удмуртилэн тӧроезлэн Санкт-Петербургъя но Ленинград улосвылъя ужоскето муртэз Валерий Просвирнин, пӧртэм выжы калыкъёслэн ыстэм муртъёссы.

Мылкыд карисьёс пӧртэм мастер-классъёсы пыриськыны, Удмуртиысь, Москваысь но Санкт-Петербургысь артистъёсын но коллективъёсын дасям концертэз учкыны быгатӥзы. Пумиськон шулдыр эктонъёсын но удмурт сиён-юонъёсын — перепечен, табанен, ӝуко мильымен, шунянен — чай юонэн йылпумъяськиз.

«Туж шуныт ужрад, мон сюлмаськонъёсме но вунэтӥ. Мукет сямен луыны но уг быгаты вал, угось фестивалез радъясьёс мыло-кыдоесь, покчи шаерзэс туж зол яратӥсь адямиос. Вордскем шаермес котькудмы сыӵе ик яратысалмы ке, ӝыныезлы ке но, кунамы ужъёс но ӟечгес луысалзы…», — гожтэ «ВКонтакте» вотэсысь бамаз Аня Кателина.

«Аслым но, нунокъёсылы но фестиваль туж кельшиз! Кыӵе шумпотӥ Дэбесысь улосчиосме пумитаса, вунонтэм шӧдон», — мылкыдъёссэ гожтэ Ирина Хохрякова.

Партнеры

Загрузка...
Иворъёс

Россиын улӥсь калыкез лыдъян-гожтон 2020-тӥ арын ортчоз

10.11.2017 17:23
Иворъёс

«Пичи Чеберайёс но Батыръёс» элькун фестиваль йылпумъяськиз Удмуртиын

13.11.2017 12:15