06.12.2017 17:26
Иворъёс
Эскеронъёсъя финн-угор экспедициысь егитъёс Удмуртиын этнотуризмез азинтон луонлыкъёс сярысь кенешизы

Эскеронъёсъя финн-угор экспедициысь егитъёс Удмуртиын этнотуризмез азинтон луонлыкъёс сярысь кенешизы

Фото: Наталья Еркешева
Ижкар / Удмуртиын

Туннэ, 6-тӥ толсуре, Егитъёслэн нырысетӥ финн-угор экспедицизылэн ёзчиосыз Удмуртиын этнотуризмез азинтон ужпумъёс но луонлыкъёс сярысь кенешизы. Котырес ӝӧк сьӧрын пумиськонэ элькунысь йӧскалык политикая министр Лариса Буранова, лулчеберетъя но туризмъя министрлэн воштӥсез, туризмъя ёзэтэн кивалтӥсь Денис Утробин, Кластеръя азинскон центрлэн кивалтӥсез Полина Павлова, улосвылысь Кун Кенешлэн депутатэз Сергей Буторин, элькунысьтымы экскурсоводъёс, азьветлӥсьёс но путешественникъёс пыриськизы.

Ужрадлэн кутсконаз котькудӥз вераз, маин соос герӟало Удмуртиез. Кин ке понна со крезьгур но Пётр Чайковский, мукетызлэн — кар лулчеберетлэн но гурт улонлэн сураськемзы, куинетӥез Удмуртиез йӧскалык пужыосын но горд, тӧдьы но сьӧд буёлъёсын герӟа. Озьы ик экспедицие палэнысь вуэм егитъёс элькунын улӥсьёслэсь куно пумитан сямзэс пусйизы.

«Мынам кылдэ ассоциация — удмурт калыклэн кыӵе ке усьтӥськемез, куноослы шумпотэмез. Озьы ик ӵошатонтэм ансамбль, кудаз пыре вашкалаез, али вакытэз но вуоноез
Мария, экспедицилэн Волгоградысь ёзчиез

Ог-огенызы тодматскем бере котырес ӝӧклэн ужаз пыриськисьёс темаосъя группаослы люкиськизы. Инкуазь, ужрадъёс, адямиос но аспӧртэмлык — маин та ӧръёсъя Удмуртия туристъёсты кыскыны быгатэ? Таӵе юанлы котькудӥз группа валэктон сётыны тыршиз.

Инкуазь:

  • шуръёс но ошмесъёс
  • нюлэсъёс но возьёс
  • Горд книгае пыртэм пӧйшуръёс но будосъёс
  • инкуазьлэн но адямилэн огъя улонзы

Ужрад:

  • «Гербер» йӧскалык праздник
  • «Пельняньлэн дунневыл нуналэз» фестиваль
  • «Выжыкыл геройёс Тол Бабайлэн шаераз» улосвылкуспо фестиваль
  • «П. И. Чайковскийлэн шаераз» фестиваль
  • Финн-угор сиён-юонъя «Быг-Быг» фестиваль

Адямиос:

  • крезьгурчи Пётр Чайковский
  • ыбылӥськон тӥрлыкез кылдытӥсь Михаил Калашников
  • куасэн бызьылонъя 4 полэс олимпи чемпионка Галина Кулакова
  • кометаез усьтӥсь Ибрагим Ахмаров
  • «Брангуртысь песянайёс»

Аспӧртэмлык:

  • трос йӧслыко элькун
  • сиён-юон
  • фольклор
  • сям-йылолъёс
  • каръёс-заводъёс

Экспедицилэн ужез куспын егитъёс малпаськозы, мар кароно та ӵектонъёссы туристъёслы тунсыкоесь мед луозы шуыса. Со понна соос асьсэос валаны кулэ, малы со ачиз лыктысал Удмуртие, мар понна со турист луыса коньдон тырысал, шуиз экспедицилэн координаторез Любовь Чижикова.

Тодэ вайытом, Егитъёслэн эскеронъёсъя нырысетӥез финн-угор экспедицизы Удмуртиын 4-тӥ толсурысен ужаны кутскиз. Асьме элькунэ финн-угор калыкъёслэсь улон-вылонзэс, йылолъёссэс, лулчеберетсэс эскерыны Липецк, Астрахань, Вологда, Волгоград, Москва улосвылъёсысь студентъёс, аспирантъёс но егит тодосчиос вуизы. Экспедицие озьы ик Удмуртиысь егитъёс но пырисько.  

Та дырлы егит эскерисьёс Глазкарысь шаертодонъя музее, историяя но лулчеберетъя «Иднакар» музей-заповеднике вуылӥзы ни, Балезино ёросысь Кестым гуртысь бигеръёслэн но Юнда гуртысь бесерманъёслэн улонзы сярысь тодӥзы. Со сяна, экспедицилэн ёзчиосыз Эгра ёросысь Сибирь трактвылысь «Этапный пункт» экспозициез адӟизы но Якшур-Бӧдьяысь «Тӧдьы юсь» ансамбльлэн творчествоеныз тодматскизы. Экспедиция 10-тӥ толсуре йылпумъяськоз. Солы йылпумъянъёсъя тодосчиос финн-угор калыкъёслэн улон-вылонзы, йылолъёссы сярысь фото- но видеоматериалъёсын бичет лэсьтозы. 

Ватсалом, финн-угор дуннеын этнотуризмъя ужпумъёсты куартолэзе Россиысь финн-угор калыкъёслэн VI ӧтчамазы но ӝутӥзы. Пӧртэм улосвылъёсысь та удысын ужась ӧнерчиос пусйизы, финн-угор этнотуризм аслаз сюресэзъя азинске шуыса. 

Партнеры

Загрузка...
Иворъёс

Россиысь финн-угор егитъёслэн форумзы ортчоз Удмуртиын 2018-тӥ арын

05.12.2017 10:34
Иворъёс

Удмурт лулчеберетъя центрлэсь вуоно юртсэ эскеризы Ижкарын 5-тӥ толсуре

05.12.2017 16:07
Иворъёс

Егит драматургъёслы вожвылъяськон ялӥзы Удмуртиын

05.12.2017 16:48
Иворъёс

Олимпи чемпионка Тамара Тихонова: нейтральной флаг улын Олимпиадае пыриськонлэсь номыр уродзэ уг адӟиськы

06.12.2017 11:44
Иворъёс

Удмуртиысь тазалыкез утёнъя министрлэсь ужзэ быдэсъясе Игорь Титов юнматэмын

06.12.2017 15:54