07.12.2017 12:49
Иворъёс
Удмуртия 2017-тӥ ар понна Туризмъя йӧскалык рейтингын 54-тӥ инты басьтӥз

Удмуртия 2017-тӥ ар понна Туризмъя йӧскалык рейтингын 54-тӥ инты басьтӥз

Фото: Григорий Фомин
Москва / Удмуртиын

2017-тӥ ар понна Туризмъя йӧскалык рейтингын Удмуртия 54-тӥ инты басьтӥз. Кунысь улосвылъёслэсь туристъёслы кельшымон луэмзэс Ивортодэт коммуникациосъя «Рейтинг» центр но «Отдых в России» журнал эскеризы. Йылпумъянъёс ӵектослэн сайтаз шараямын.

Элькунэн люкам баллъёс — 49,7. Ӵектослы удысысь югдуръя валэктонъёс сётӥз Удмуртиысь лулчеберетъя но туризмъя министрлэн воштӥсез Денис Утробин.

«2017-тӥ арын Удмуртиысь туризм азьлане бадӟым вамыш ӧз лэсьты, но ми удысъя возьматэтъёсты огсыр возьыны но бадӟым вамыш лэсьтыны кужым люканы быгатӥмы. 514 сюрс туристъёс, 290 ужрадъёс, туризмъя 172 маршрутъёс — туризмъя вузпӧрын Удмуртия понна умой инъет
Денис Утробин, Удмуртиысь лулчеберетъя но туризмъя министрлэн воштӥсез

Со пусйиз, али туризмез элькунысь мер но экономика удысъёсты азинтон понна шӧдскымон амал карыны ужпум сылэ. Со понна аспӧртэм улосвыл маршрутъёсын сӧзнэт кылдытыны чакламын.

Рейтингез кылдытыку лыдэ басьтэмын кунокуа ужбергатонлэн но инфраструктуралэн азинскемез, улосвыллэн экономикаяз туризм удыслэн интыез, туризмлэн табыш ваемез, Россиысь но мукет кунъёсысь туристъёслы кельшымон луон, инкуазь, аспӧртэмлык, эрикрадъя югдур, улосвылэн шутэтскыны интыен сямен вотэсын тунсыкъяськон, ивортодэт вӧлметын туризмъя луонлыкъёсты вӧлмытон.

5 устоосыз улосвылъёс пӧлы пыризы Краснодар шаер, Москва, Москва улосвыл, Крым, Санкт-Петербург.

Ватсалом, 6-тӥ толсуре Егитъёслэн нырысетӥ финн-угор экспедицизы улсын этнотуризмлы сӥзем котырес ӝӧк ортчиз. Кылсярысь, отын пусйизы егит туристъёсты элькунэ кыскон понна удысын выль технологиосты кутоно шуыса.

Тодэ вайытом, 21-тӥ шуркынмонэ Удмуртиын Ужрад туризмъя дырпусэн тодматӥзы, отчы элькунысь муниципал кылдытэтъёсын ортчытъяськись 100-лэсь трос ужрадъёс пыризы.

Партнеры

Загрузка...
Иворъёс

Егит туристъёсты Удмуртие кыскон понна выль технологиосты кутоно

07.12.2017 09:42
Иворъёс

Александр Бречалов «Кышкыттэмлыко но ӟечлыко сюресъёс» ӵектосэз быдэстонъя кенешонэ пыриськиз

07.12.2017 10:53