14.03.2017 17:46
Новости
«Театр но нылпиос» Росси фестиваль нырысьсэ ортчоз Ижкарын куартолэзе

«Театр но нылпиос» Росси фестиваль нырысьсэ ортчоз Ижкарын куартолэзе

Фото: пресс-служба "РДНТ - Дом молодёжи"
Ижкар / Удмуртиын

12-14 куартолэзе Ижкарын нырысьсэ ортчоз «Театр но нылпиос» Росси фестиваль. Отчы нылпиослэн но егитъёслэн йӧслык театр коллективъёссы пыриськозы. Со сярысь иворъёсъя «Удмуртия» агентстволэн корреспондентэзлы вераз «Калык творчествоя элькун юрт — Егитъёслэн юртсы» ужъюртлэн кивалтӥсезлэн калык творчествоя воштӥсез Вероника Шалавина.

Фестиваль ас мылкыдзыя шудӥсь йӧслык театръёсты ӝутон понна радъяське. Коллективъёслэн репертуаразы Россиысь калыкъёслэн кылынызы яке йӧслык литературая пуктэм спектакль луыны кулэ. Фестивальлэн ужанрадлыказ конкурс улсын возьматонъёс, творческой пумиськонъёс, мастер-классъёс чакламын. 

«Вань конкурс ужъёсты Ижкарын учкозы, Йӧскалык театрын но Мунё театрын. Нош фестиваль улсын пумиськонъёс Сарапулын но Вотка карын ортчозы
Вероника Шалавина

Ужрадэ, чакламъя, Удмуртиысь 3 коллектив пыриськоз. Со сяна, мукет улосвылъёсысь 7 пала коллективъёсты возьмало на. 

Росси фестиваль усьтӥськоз 12-тӥ куартолэзе. Ужрадэз радъясьёслэн малпанъёссыя, сӥё-дано усьтон Шор площадьын кутскоз, собере калыкъёслэн эшъяськонзылы сӥзем синпелет доры театр шествие мыноз. Бӧрысь ваньзы Йӧскалык театре вамыштозы, отын одӥгзэ спектаклез возьматозы.

Фестиваль кык люкетэн ортче. Али элькун люкетаз куриськонъёсты куто. Вероника Шалавиналэн верамезъя, соосты 20-тӥ южтолэзёзь басьтозы.

«Быръён видеотуръя ортчоз. Соин ик али куриськонъёс, видеоматериалъёс лыкто. Нош 20-тӥ южтолэзь бере ини, 21-тӥ числое ик, видеоматериалъёс учкемын луозы. Тужгес усто спектакльёсты Москвае, фестивале пыриськисьёслэсь валтӥсь лыдметсэс кылдытон понна келялозы», — шуиз со.

Театр фестивалез Россиысь «Калык творчествоя кун юрт» но Удмуртиысь «Калык творчествоя юрт — Егитъёслэн юртсы» ортчыто. 

Партнеры

Загрузка...
Журналист утчаськомы
Иворъёс

«Куарагур» вожвылъяськонэ пыриськон понна куриськонъёсты кутон йылпумъяське

14.03.2017 14:34
Иворъёс

Дон выжыысь чуньы вордӥськиз Удмуртиысь зоопаркын

14.03.2017 15:19
Иворъёс

Муниципалитетъёсын депутатъёслэсь лыдзэс кулэстыны быгатозы Удмуртиын

14.03.2017 17:19