Суббота, 29 апреля 2017
Ижевск +4 °C
USD 56.98EUR 62.04
17.03.2017 16:46
Новости
«Будӥсь писательлэн ӝӧк сьӧраз» литературая конкурслы йылпумъянъёс лэсьтӥз Геннадий Красильниковлэн музей-квартираез

«Будӥсь писательлэн ӝӧк сьӧраз» литературая конкурслы йылпумъянъёс лэсьтӥз Геннадий Красильниковлэн музей-квартираез

Фото: Музей-квартира Г.Д. Красильникова
Ижкар / Удмуртиын

Удмурт гожъясьлэн Геннадий Красильниковлэн Ижкарысь музей-квартираез (Кузёбай Герд нимо йӧскалык музейлэн ёзэтэз — ред.) литературая «Будӥсь писательлэн ӝӧк сьӧраз» ньылетӥ элькун конкурслы йылпумъянъёс лэсьтӥз. Вормисьёсты сӥё-дано пусъён 17-тӥ южтолэзе ортчиз. Иворъёсъя «Удмуртия» агентстволэн корреспондентэзлы со сярысь вераз музей-квартиралэн кивалтӥсез Оксана Москова.

Вожвылъяськонэ студентъёс но ужасьёс пыриськизы. Ваньмыз 13 уж вуиз. Ӵектэмын вал удмурт яке ӟуч кылын проза яке кылбур гожтыны. 

«Арысь аре номинациос милям одӥг кадь луо: «Чурысь чуре ми проза кылдытом» но «Рифма». Тросгес пырисько арысь аре поэзие, прозаен ӧжытгес луэ. Пиналъёс пӧлын но озьы ик», — вераз Москова.

«Рифма» ӧръя вормисьёс:

  • 1-тӥ инты — Оксана Бисар (Ижкар)
  • 2-тӥ инты — Ольга Николаева (Шаркан ёросысь Пашур-Вишур гурт) но Марина Парвазетдинова (Тюменьысь эм кун университетын дышетскись)
  • 3-тӥ инты — Никита Иванов (Пичи Пурга ёросысь Чокал гурт, али армиын служба нуэ)
Фото: Музей-квартира Г.Д. Красильникова
«Рифма» ӧръя вормись Оскана Бисар                                                                      Фото: Музей-квартира Г.Д. Красильникова ©

«Чурысь чуре ми проза кылдытом» ӧръя вормисьёс:

  • 1-тӥ инты — Людмила Шамаева — «Инву-ныл», фэнтэзи (Шаркан ёросысь Быгы гурт)
  • 2-тӥ инты — Людмила Корепанова — «Удмуртия — вордскем доре», эссе (Шаркан ёросысь Мувыр гурт)
  • 3-тӥ инты — Любовь Широбокова — «Анай кылмы но шаермы — люконтэм», эссе (Якшур-Бӧдья ёросысь Варовай гурт)

Пусъёмы, вормисьёслэн ужъёссы удмурт кылын гожтэмын вал. 

Оксана Московалэн верамезъя, конкурслэн ужпумез — гожъясьёсты шарае поттон, ужъёсынызы тросгес лыдӟисьёсты тодматон.

«Тросэз соос «мон ас понна гинэ гожъясько» шуо… Но туннэ мон шӧдӥ ни, азьло аръёсы сыӵе ӧй шӧдылы вал, туннэ соос мукет мылкыдын кошкизы. Адске, соос валазы соослэн произведениоссы асьме шаерысьтымы литературалэсь пӧртэмлыксэ узырмытыны, мар ке выльзэ пыртыны быгато отчы шуыса. Кудъёсыз писательёсын но тодматскыса кошкизы, соослэн азьланезлы чакланъёссы кылдӥзы ни. Сыӵе герӟет луон — конкурсмылэн валтӥсь ужпумез», — пусйиз музей-квартиралэн кивалтӥсез.

Вожвылъяськонэ вуэм ужъёс интернетын, озьы ик газетъёсын но журналъёсын печатламын луозы.

Ватсалом, «Будӥсь писательлэн ӝӧк сьӧраз» вожвылъяськон 2015-тӥ арын кутскиз но кык люкетэн ортчиз. Нырысетӥяз (2015–2016 аръёсы) школаын дышетскисьёс пыриськизы. Оксана Московалэн верамезъя, соослэсь 46 ужъёс вуизы. Кыкетӥ люкетэз 2016–2017 аръёсы мынӥз, отчы студентъёс но ужасьёс пыриськизы.

Партнеры

Загрузка...
Журналист утчаськомы
Иворъёс

Удмурт кылын литературая устозэ ужез быръёнъя вожвылъяськон ортчоз 2017-тӥ арын

02.02.2017 12:23
Иворъёс

Чеберлыко литература ужъёс кылдытонъя семинаръёс радъя «Кенеш» журналлэн редакциез

08.02.2017 15:58