28.11.2017 18:11
Иворъёс
Удмуртиысь анай кылъя устоез дышетӥсь Лудорвай школаысь Надежда Мерзлякова луиз

Удмуртиысь анай кылъя устоез дышетӥсь Лудорвай школаысь Надежда Мерзлякова луиз

Фото: организаторов
Ижкар / Удмуртиын

Туннэ, 28-тӥ шуркынмонэ, Ижкарысь Кузебай Герд нимо гимназиын «Анай кылъя устоез дышетӥсь» вожвылъяськонлэн элькун люкетэз ортчиз. Отчы Алнаш, Шаркан, Юкаменск, Дэри ёросъёсысь но Ижкарысь удмурт но бигер кылъя но литературая куать дышетӥсьёс пыриськизы. Соослэн ужъёссы конкурслэн быръён люкетаз тужгес устоен лыдъямын вал. Нош усьтӥз вожвылъяськонэз Удмуртиысь Дышетонъя но тодосъя министрлэн воштӥсез Игорь Белозёров.

«Удысужлыко вожвылъяськон юрттэ шараяны анай кылъя творческой дышетӥсьёсты, кудъёсыз ужазы выль амалъёсты но технологиосты, лулчеберет кусыпъёсъя принципез куто. Озьы ик (конкурс — ред.) юрттэ дышетӥсь ӧнерлэсь данзэ будэтыны
Игорь Белозёров

«Анай кылъя устоез дышетӥсь» вожвылъяськон пыриськисьёсын тодматсконысен кутскиз. Котькудӥз дышетӥсь аслэсьтыз «Визитказэ» возьматӥз: кин ке видео пыр, кин ке ачиз сярысь кылбурен вераз, кырӟасез но, воршуд шыкыс возьматӥсез но вал.

Эшшо одӥгаз конкурслэн люкетаз — пресс-конференциын — ӵошатскисьёс журналистъёслэн юанъёссылы валэктонъёс сётӥзы. Анай кылъя дышетӥсьёслэн одӥгез ужпумзы — со анай-атайёсын валэктон ужез нуон. Соин ик ивортодэтъя «Удмуртия» агентстволэн корреспондентэз дышетӥсьёслэн но пиналъёслэн семьяоссылэн кусыпъёссы сярысь юаз.

Ижкарысь Дышетонъя «Гармония» калыккуспо огъетысь — 97 номеро школаысь удмурт кылъя дышетӥсь Вероника Иванова верамъя, «Гармоние» дышетскыны лыктэм пиналлэн анай-атайёсыныз вераськонъёс ортчытэм бере нокин но удмурт кыллы пумит уг кариськы, валало, со нылпизылы мултэс уз луы шуыса.

«Удмурт кылын туж трос пӧртэм луонлыкъёс вань, кылсярысь, кылбур но вераны, удмурт кылын лыдӟыны. Собере тани Эшъяськон юртын кыӵе ке постановкаос но пуктылыны. Со удмурт кылэз дышетон пиналлы ӟуч кыл вӧзы сётэ выль луонлык ассэ шедьтыны та улонын», — лыдъя Вероника Иванова.

Юкаменск ёросысь Бигерпочинка школаысь бигер кылъя дышетӥсь Марьям Арасланова верамъя, соослэн школаязы удмурт, бигер но бесерман пиналъёс дышетско, соин ик ужез но та аспӧртэмез чакласа нуыны кулэ. Кылсярысь, бигер кылъя урокъёсын но куд-ог дыръя удмурт кылын ужъёс лэсьтыны лэзиське, шуэ дышетӥсь.

«Анай-атайёсты ӧтисько но шуисько, ойдолэ, тазьы: тӥ удмурт сямен лэсьтэ, бигеръёс, ойдолэ, тӥ бигер кылын. Нош собере огъя люкетсэ — ваньзы бигер сямен, бигер кылэз дышетӥськом бере
Марьям Арасланова

Журналъёсты, газетъёсты, теле- но радиоматериалъёсты ужазы кутон сярысь «Ӟечбур!» газетын ужась Эльвира Симакова юаз. Ваньзы сямен ик дышетӥсьёс лыдъяло, изданиос соослы бадӟым юрттэт сёто шуыса.

«Газетъёсысь, журналъёсысь статьяосты мон сётӥсько, берыктыны но косӥсько, собере со туж мыным кружокын но юрттэ. Ми асьмеос али газет поттӥськомы, пиналъёс кружокын газет потто. <…> Адӟем кариськомы тӥлесьтыд: маргес сярысь тӥ отын гожъяськоды, кыӵегес темаос тӥ отын кутӥськоды», — валэктӥз Шаркан ёросысь Мувыр шоръёзо школаысь удмурт кылъя но литературая дышетӥсь Надежда Широбокова.

Озьы ик дышетӥсьёс удмурт но ӟуч кылъёс пӧлысь кудӥз валтӥсь, нош кудӥз юрттӥсь кыл юанъя малпанъёссэс веразы.

«Мон малпасько, удмурт кыл но ӟуч кыл ог-огенызы артэ кутскыса вамышъяны кулэ. Одӥгез золгез, одӥгез ляб шуыса вераны кулэ ӧвӧл, малы ке шуоно удмурт кылын ми дышетскиськом мае ке ӟуч кыллэсь, ӟуч кылын — удмурт кыллэсь
Надежда Голубина, Шаркан ёросысь Быгы шоръёзо школаысь удмурт кылъя но литературая дышетӥсь

«Визитная карточка» возьматэм но пресс-конференциын валэктонъёс сётэм сяна, вожвылъяськонэ пыриськисьёс мастер-класс ортчытӥзы, «Моё хобби» темая конкурсын ӵошатскизы. Вожвылъяськон программа куспын тужгес трос люкам баллъёсъя вормисе Дэри ёросысь Лудорвай гуртысь Совето Союзлэн Героез А. М. Лушников нимо школаысь удмурт кылъя но литературая дышетӥсь Надежда Мерзлякова потӥз. Солы вуоно арын конкурслэн огъяросси люкетаз Удмуртилэсь данзэ утьыны ӵектозы. 

Мукетъёсыз вожвылъяськисьёс пӧртэм номинациосъя устоосыз луизы:
  • «Учитель-новатор» - Ирина Евдокимова, Алнаш ёросысь Вуж Шудья гуртысь школаысь удмурт кылъя но литературая дышетӥсь;
  • «Учитель-исследователь» - Надежда Широбокова, Шаркан ёросысь Мувыр гуртысь шоръёзо школаысь удмурт кылъя но литературая дышетӥсь;
  • «Лучший мастер-класс» - Вероника Иванова, Ижкарысь Дышетонъя «Гармония» калыккуспо огъетысь — 97 номеро школаысь удмурт кылъя дышетӥсь;
  • «За высокое педагогическое мастерство» - Марьям Арасланова, Юкаменск ёросысь Бигерпочинка гуртысь школаысь бигер кылъя но литературая дышетӥсь;
  • «Учитель-наставник» - Надежда Голубина, Шаркан ёросысь Быгы гуртысь шоръёзо школаысь удмурт кылъя но литературая дышетӥсь.   

Анай кылъя дышетӥсьёс
Анай кылъя но литературая дышетӥсьёс Фото: радъясьёслэн ©
          

Партнеры

Загрузка...
Иворъёс

Дышетскисьёслэн Россиысь калыкъёслэн кылъёсынызы конференциязы удмурт кылын дасям ньыльзэ ужъёсты пусйизы

27.11.2017 13:12
Иворъёс

Свердловск улосвылысь удмуртъёс понна мастер-классъёс ортчытӥзы Удмуртиысь ӧнерчиос

27.11.2017 15:25
Иворъёс

Москваысь Некрасов нимо лыдӟетъюртын удмурт калыкен тодматон ортчиз

28.11.2017 09:46