01.12.2017 14:41
Иворъёс
Егитъёслэн эскеронъёсъя финн-угор экспедицизы ортчоз Удмуртиын

Егитъёслэн эскеронъёсъя финн-угор экспедицизы ортчоз Удмуртиын

Фото: Михаил Шустов
Ижкар / Удмуртиын

4-тӥ толсуре Удмуртиын Егитъёслэн эскеронъёсъя нырысетӥез финн-угор экспедицизы ужаны кутскоз. Кызьы иворто ӵектосэз радъясьёс, солэн ужпумез — Россиысь финн-угор калыкъёслэсь улон-вылонзэс, йылолъёссэс, лулчеберетсэс эскерон но со сярысь тодонлыкъёсты егитъёс пӧлын вӧлмытон.

24 финн-угор калыкъёс пӧлысь 17-ез Россиын уло, огъя лыдзы 2 миллион 650 сюрс адямилэсь трос. Тужгес трос лыдъемъёсыз (2010-тӥ арын калыкез лыдъян-гожтонъя) луо мордваос, удмуртъёс, поръёс но комиос. 30 процентэз удмуртъёс Удмурт Элькунын уло.

Экспедицие пырозы Липецк, Астрахань, Вологда, Волгоград, Москва улосвылъёсысь но Удмуртиысь студентъёс, аспирантъёс, егит тодосчиос. Соослэн тодосъя но ӧнеръя тунсыкъёссы этнологиен, антропологиен, культурологиен, этнопсихологиен, озьы ик йӧскалык но политика ужъёсын но технологиосын герӟаськемын.

Арня ӵоже соос удмуртъёслэн улон-вылонзы, сям-йылолъёссы сярысь ивортодэтъёсты люкалозы. Егитъёс музейёсын утиськись вашкала арбериосты эскерозы, тунсыко адямиосын пумиськозы. Соос Тол Бабай доры, «Эгра» этнопарке, Каракулиное, Брангурт песянайёс доры ветлозы, Якшур-Бӧдьыясь «Тӧдьы Юсь» ансамблез кылзозы, перепеч веръялозы.

Экспедиция 10-тӥ толсуре йылпумъяськоз. Солы йылпумъянъёсъя тодосчиос финн-угор калыкъёслэн улон-вылонзы, йылолъёссы сярысь фото- но видеоматериалъёсын бичет лэсьтозы. Россиысь финн-угор калыкъёслэн лулчеберетъя кылёсбурзы сярысь ивортодэтэз егитъёс пӧлын вӧлмытон понна ужрадэ пыриськисьёс нимысьтыз медиавӧлмет (медиапространство) кылдытозы.

Партнеры

Загрузка...
Иворъёс

Удмурт егитъёслэн «Удмурт-а мон?» улосвылкуспо форумзы усьтӥськиз Ижкарын

01.12.2017 11:38
Иворъёс

«Меми дор сяськаос» вожвылъяськонын вормисьёсты пусйизы Ижкарын

01.12.2017 12:14