Воскресенье, 22 октября 2017
Ижевск -1°C
16.05.2017 13:29
Иворъёс
Татьяна Ишматова: удмурт азьветлӥсьёсмы Россиын улӥсь финн-угор калыкъёсты огазеяны быгатӥзы

Татьяна Ишматова: удмурт азьветлӥсьёсмы Россиын улӥсь финн-угор калыкъёсты огазеяны быгатӥзы

Фото: Григорий Фомин
Ижкар / Удмуртиын

25 ар талэсь азьло, 15–16 куартолэзе 1992-тӥ арын, «Удмурт Кенеш» огазеяськонлэн кичӧлтэмезъя Ижкарын Россиысь финн-угор калыкъёслэн нырысетӥ ӧтчамзы ортчиз. Отын кылдытэмын вал Россиысь финн-угор калыкъёслэн ассоциацизы (АФУН).

Удмурт Элькун Россиын мер ужын данъяськымон луэ, малыке шуоно одӥгъёсыз нырысетӥосыз пӧлын удмуртъёс асьсэ мер огазеяськонъёссэ кылдытӥзы — удмурт лулчеберетъя «Дэмен» огазеяськон, вань удмуртъёслэн «Удмурт Кенеш» огазеяськонзы, удмурт егитъёслэн «Шунды» дэменлыксы, вераз иворъёсъя «Удмуртия» агентстволы «Удмурт Кенеш» огазеяськонлэн тӧроез Татьяна Ишматова.

«25 ар талэсь азьло удмурт азьветлӥсьёсмы, кудъёсыз пӧлын Михаил Иванович Шишкин, Карл Александрович Пономарёв, Маргарита Владимировна Гришкина но трос-трос мукетъёсыз, быгатӥзы огазеяны Россиын улӥсь финн-угор калыкъёсты. Трос уж нуэмын вал финн-угор кусыпъёсты шедьтон но асьме ӵыжы-выжы луэммес шараян понна. Шумпотымон, удмурт музъем вылын вордӥськиз Россиын улӥсь калыкъёслэн фин-угор семьязы. Вылӥ мылкыдын, синкылиосын, лемлет малпанъёсын кутскиз та уж. Солы луыса Росси Федерациын туннэ нуналозь ужа финн-угор калыкъёслэн Ассоциацизы. Туннэ но тау кариськом асьме тодосчиосмылы, азьветлӥсьёсмылы, со дыре ужась кивалтӥсьёслы, соос та кулэ но секыт ужез вырӟытӥзы но азинтӥзы шуыса», — пусйиз Татьяна Ишматова.

Ватсалом, Россиысь финн-угор калыкъёслэн ассоциацизы кичӧлтэмъя 1992-тӥ арын ик Сыктывкарын Финн-угор калыкъёслэн нырысетӥез калыккуспо конгрессы ортчиз. Со дырысен та быдӟым пумиськонъёс ньыль арлы одӥг пол радъяськыло. Солэн ужаз мыло-кыдо пырисько удмурт азьветлӥсьёс но. Берлоез дунневыл конгресс ортчиз 2016-тӥ арын 15–17 инвожое Финляндиысь Лахти карын.

Партнеры

Загрузка...