Понедельник, 21 августа 2017
Ижевск +24 °C
09.08.2017 16:32
Иворъёс
Ижкарысь Кызьпу арамаысь тросэз али ужась площадкаос интыязы ик кылёзы

Ижкарысь Кызьпу арамаысь тросэз али ужась площадкаос интыязы ик кылёзы

Фото: Майя Бывальцева
Ижкар / Удмуртиын

«Удмурт Кенешлэн» Ижысь азьветлӥсьёсыз но Горький нимо садлэн ыстэм муртэз 8-тӥ гудырикошконэ шоркарысь Кызьпу арамаетӥ ортчизы но вераськизы, кытын но кыӵе площадкаос луозы.

Тодэ вайытом, «Удмурт Кенеш» «Кызьпу арама» этнопаркез кылдытонъя учкетэз дасяз. Соя нокыӵе пуктӥськемъёс чакламын ӧвӧл. Паркын семьяен, нылпиосын шутэтскон, мугорез кыдатон но тазалыко улонэз вӧлмытон, трос калык понна ужрадъёс ортчытон интыос висъямын луозы.

Тросэз али ужась площадкаос интыосазы ик кылёзы. Кылсярысь, сцена, баскетболэн шудон инты, озьы ик кафе, но отын удмурт сиён-юонъёсты пӧралозы. Вӧзаз ик пичи нылпиослы шудон площадка луоз. Уллапалазгес кыллись из но отчы ик кылёз, со доры пичи сюрес гинэ лэсьтыны кулэ шуыса вераськизы.

«Кин ке православной осконэн уг оскы, кин ке но язычествоез уте на, сыӵе адямиослы, кудӥз, шуом, сӥлы каре язычествоез, отын вань туж бадӟым из, со излэн но интыез милемлы кельшиз, ми ӵектӥськом со изэз озьы ик кельтыны. Нош ик шуим, одӥг кылэ вуиськом, куала отын медаз луы вал, малы ке шуоно <...> семья кусыплэн со, семьяен пыро со куалае. <...> Герберын, шуом, сыӵе бадӟым праздникъёсын, Вылез пумитанын, шуом, удмурт калык котьку но инкуазьлы вазиське вал, со кытын ке но липет улын ӧвӧл, со кырын — нюлэс кушын-а шуом, кыӵе ке но арамаын, со ласянь со (из - ред.) интыяз шуыса ми учким», — вераз «Удмурт Кенешлэн» Октябрь ёросысь ёзэтэлэн кивалтӥсез Валентина Ившина.

Со сяна, учкетын эшшо одӥг сцена лэсьтыны чакламын. Сое нюк палагес, улыг интые пуктыны ӵектон вань. Гурезь бамалаз ӟусъёс пуктыса, сцена ваньмызлы умой адӟиськоз. Но та пумысен одӥг малпанэ ӧз вуэ на, гуд-огез кыкетӥзэ сценаез вырйылэ ик пуктыны дэмлало.

Эшшо одӥг лэчыт ужпум — ошмес. Эскеронъёс возьматӥзы, отысь вуэз юыны уг тупа, но котырзэ одно ик утялтыны, чебертыны кулэ. Али быдэс нюк кузя но туж трос жуг-жагез. Писпуос но куакъёс сое вато, но озьы кельтыны уг яра.


«Туж паймыса ачим но, эшъёсы но учкизы — тани шуиськом парке ке, асьмеос сое адӟиськом пыронтӥ азьын гинэ, трамвай линия дорысен, кытын улоно коркаос, со одӥг куиньмос люкетэз но вылымтэ. Зэмзэ но та парк туж бадӟым вылэм. Но туж жаляса ми котырак учким, вань сэрегъёсыз, ӝыныезлэсь бадӟым инты, куштӥськем интылы тупа. Сое ваньзэ-ваньзэ утялтоно ке, эскероно ке, <…> тани ошмес котырын со сыӵе чебер инты вылэм, <… > сое чеберъясал ке, мон малпасько, со одӥгез туж чебер инты луысал», — пусйиз Валентина Ившина.

Кӧня коньдон кулэ луоз аналтэм паркез учкетъя тупатыны, отын зэмос этнопарк лэсьтыны, рос-прос лыдъямын ӧвӧл на. Котьма ке но, тырмыт уксё висъяны луонлыкез Ижкарлэн ӧвӧл. Татын инвесторъёслэн но элькунлэн юрттэтсы кулэ луоз. Нош кенешчиос оско, уж матысь дыре йылаз-пумаз вуттэмын луоз шуыса.

«Та парк котырын куинь ар ветлӥськомы ни. <…>Туннэ мон эшшо одӥг пол валай, интыысьтыз та ужрад вырӟе ни шуыса. Ваньмы ӵош, сыӵе бадӟым бригадаен эшшо одӥг пол ортчыса валаськомы, асьмеос шуиськом ке этнопарк, удмурт калыкен ке сое асьмеос герӟаськомы — со Ижкарлэн шор паркез шуиськомы, <…> со удмурт шӧмо луыны кулэ. Тани кӧня куноос лыктӥзы, асьмеос татчы пыртӥмы ке, пырыку ик асьмеос мед адӟомы татын шӧмлыксэ. Мон сое весь малпасько, мылкыд но капчи — татӥ Калашников ульча ортчиз ке, сыӵе паськыт ульча, со ульча вӧзы асьмелэн удмурт паркмы кылдӥз ке, со, мон малпасько, самой бадӟым вормон луоз удмурт калыклэн, Ижкарысь удмурт калыклэн», — паркез ортчем бере вераз журналистъёслы «Удмурт Кенешлэн» Устинов ёросысь ёзэтэзлэн кивалтӥсез Елена Ленцова.

Кызьпу арамаен али кивалтӥсь Максим Горький нимо гужем садлэн администрациез «Удмурт Кенешен» дасям учкетлы дурбасьтэ. Паркез умоятонэ пыриськыны но дась. Садлэн кивалтӥсез Андрей Самуськов верамъя, кылсярысь, баскетболэн шудон площадкаез тупатыны быгатозы.

«Кызьпу арама» этнопарклэн учкетэз вань. Табере интывылэз радъянъя ӵектос дасяны кулэ. Тупамонзэ быръёнэ «Удмурт Кенеш» огазеяськонлэсь ёзчиоссэ но пыртозы шуыса оско. Пумен инвестор но шедьтоно. Котькуд площадкалэн со нимаз но луыны быгатоз.

Партнеры

Загрузка...
Журналист утчаськомы
Иворъёс

Кызьпу арамаез умоятон-утялтонъя ӵектосэз дасян ужъёс Ижкарын таяз арын кутскозы

17.07.2017 09:56
Статьяос

Шутэтскон, шулдыръяськон, вӧсяськон: мар луыны кулэ Ижкарысь Кызьпу арамаын

28.07.2017 12:47