12.10.2017 18:26
Иворъёс
Москваысь удмуртъёс «Песянайёслы сӥзем праздник» ӵектоссылы шоркарлэсь субсидия басьтыны чаклало

Москваысь удмуртъёс «Песянайёслы сӥзем праздник» ӵектоссылы шоркарлэсь субсидия басьтыны чаклало

Фото: vk.com (Мускоысь удмуртъёс/Удмурты в Москве)
Москва / Россиын

Москваысь удмуртъёслэн «Герд» огазеяськонзы «Песянайёслы сӥзем праздник» ӵектосэныз Москвалэн кивалтэтысьтыз Мер герӟетъёсъя комитетлэн субсидиосъя конкурсаз пыриське. Со сярысь иворъёсъя «Удмуртия» агентстволы вераз ӵектосэз кылдытӥсь, «Герд» огазеяськонлэн кивалтӥсезлэн воштӥсез Маргарита Сельченкова.

«Со (Мер герӟетъёсъя комитет — ред.) котькуд ар ортчытъя сыӵе конкурсъёс, ми туэ нырысьсэ пыриськимы та конкурсэ. «Конкурс субсидий» нимаське, конкурс «Душевная Москва». Отын трос пӧртэм номинациос вал, ми пыриськимы «Семья» номинацие», — ивортӥз Маргарита Сельченкова.

Солэн верамезъя, юан кылдӥз, кызьы меда Москваын улӥсь удмурт нылпиослы удмурт калыклэсь сям-йылолъёссэ сётоно, удмурт лулчеберетэз пыӵатоно? Озьы песянайёслы сӥзем праздник ортчытыны малпан лыктӥз. 

«Соин ик ортчытӥмы праздник, дышетӥмы пиналъёсты удмурт кылбуръёслы, удмурт эктонлы, та репетициос дыръя трос вераськимы удмурт сямен, асьмеос лэсьтӥмы удмурт чыртывесьёс нылпиосын ӵош: анайзы, атайзы — быдэс семья
Маргарита Сельченкова, Москваысь «Герд» огазеяськонлэн кивалтӥсезлэн воштӥсез

Шулдыръяськонэз туэ 3-тӥ инвожое ортчытӥзы. Праздниклы дасяськон дыръя анай-атайёс нылпиоссылы асьсэ семъязы, Удмурт Элькун сярысь мадизы. «Песянайёслы сӥзем праздник» улсын 5–12 аресъем нылъёс но пиос удмурт кылбуръёс веразы, удмурт эктон пуктӥзы. Солы Удмуртиын вордскем хореограф дышетӥз.

«Милям туж умой дышетӥсьмы вал, Удмуртиысь нылаш Алёна Терокова. Со татын Москваын дышетскиз Лулчеберетъя университетын. Кык толэзь куспын та удмурт пиналъёсты дышетӥз удмурт эктонлы. Ноку но та пиналъёс эктонъя кружоке ветлэмын ӧвӧл, одӥгез ныл сяна. Вот быгатӥз Алёна коллектив кылдытыны, ваньзы быгатӥзы эктыны», — пусйиз Маргарита Сельченкова.

Тужгес но тунсыкоез вал «Брангуртысь песянайёсын» телемост, озьы коллективен меӵак эфирын вераськыны но песянайёслэсь кырӟамзэс кылзӥськыны кылдӥз.

«Сыӵе милемлы со умой вал. Тани та пичи пиналъёс но 30 аресъем удмуртъёс сыӵе шумпотыса вераськизы та песянайёсын <…> Ваньмы праздник бере ӟеч мылкыдын кылим, малпамы та праздникез котькуд ар ортчытъяны», — вераз «Герд» огазеяськонлэн кивалтӥсезлэн воштӥсез.

Ватсалом, песянайёслы сӥзем празднике 120–130 адями пыриськиз. Вуоно аръёсы ужрадэз ортчытыны юрттэт басьтон понна, Москвалэн кивалтэтысьтыз Мер герӟетъёсъя комитетлэн конкурсаз вормоно. Та дыре вожвылъяськонлэн нимлыко сайтаз проектъёс понна куара сётон мынэ

2012-тӥ арын 26-тӥ куартолэзе Бакуын «Евровидение» вожвылъяськонын «Брангурт песянайёс» ансамбль кыкетӥ инты басьтэм бере Удмуртиын выль праздник юнматӥзы – табере котькуд ар 26-тӥ куартолэзе Песянайлэн нуналэз пусйиське.


Партнеры

Загрузка...
Иворъёс

Ньыль черкъёсы вуылоз Москваысь но быдэс Россей кунысь Патриарх Кирилл Удмуртиын дыръяз

12.10.2017 11:23
Иворъёс

Грак ёросысь поръёслэн вӧсяськон арамазы синпелет инлык басьтыны быгатоз

12.10.2017 13:21