10.11.2017 17:05
Иворъёс
Валентина Корепанова: удмурт кылэз дышетӥсь пиналъёслэн лыдзы кулэсмоз шуыса кышкытлык вань

Валентина Корепанова: удмурт кылэз дышетӥсь пиналъёслэн лыдзы кулэсмоз шуыса кышкытлык вань

Фото: Наталья Еркешева
Ижкар / Удмуртиын

9-тӥ шуркынмонэ «Удмурт Кенеш» огазеяськонлэн Пичи кенешезлэн пумиськонэз ортчиз. Отчы 85 ёзчиос пӧлысь 65-ез люкаськизы. Пумиськонлэн кутсконаз Удмуртилэн Кун Кенешезлэн кивалтӥсез Алексей Прасолов но элькун тӧролэн но кивалтэтлэн администрацизылэн Сергей Смирнов кенешчиослы пайдаё уж сӥзизы.

Сергей Смирновлэн кылъёсызъя, «Удмурт Кенеш» туэ туж ӟеч ужаз. Озьы ик Удмуртилэн кунлыкезлы 100 ар тырмонлы дасяськыны кулэ шуыса пусйиз.

«Та куинь ар туж ӝог ортчоз. Кызьы тӥ тодӥськоды, милям бадӟым малпанъёсмы. <…> Нырысь ик со Удмурт лулчеберетлэн центрез, кудӥз сярысь, кызьы тӥ тодӥськоды, «Удмурт Кенеш» Александр Владимировичен (Бречаловен — ред.) вераськиз ни. <…> Мы туж тыршом со дырлы (2020-тӥ арлы — ред.) Йӧскалык лыдӟетъюртэз тупатыны», — шуиз Сергей Смирнов.

«Удмурт Кенешлэн» тӧроез Татьяна Ишматова верамъя, элькунлэн кивалтӥсьёсыз огазеяськонлэн ёзчиосыныз ӵош ужаны дась. Со пусйиз, куарусён толэзе выльдӥськем парламентын 60 депутатъёс пӧлысь 12-ез удмуртъёс шуыса. Озьы ик Ишматова ар куспын огазеяськонэн лэсьтэм ужъёслы йылпумъянъёс лэсьтӥз.

Пичи кенешлэн пумиськонэз
Пичи кенешлэн пумиськонэз
18 ФОТО

«Удмурт кылэз азинтонын но дышетонын трос кужымзэс сётыса тыршо асьме удмурт кылъя но литературая дышетӥсьёсмы, озьы ик мон нимысьтыз котьку тау карисько кенешчиосмылы. Трос лэсьтӥськом ужрадъёс но, фестивальёс но, конференциос но. Ортчо удмурт лулчеберетлы сӥзем толэзьёс котькуд ёросын. Анай кыллы сӥзем нуналэз пусйыса, туж пӧртэм акциос малпаськом, пӧртэм пумиськонъёс», — шуиз Татьяна Ишматова.

Удмурт кылэз школаосын дышетонъя юанъёслы валэктонъёс сётыны Пичи кенешлэн пумиськоназ Дышетонъя но тодосъя министерствоысь йӧскалык дышетонъя ёзэтлэн кивалтӥсез Валентина Корепанова ӧтемын вал. Со ивортэмъя, берло вить ар ӵоже анай кылэз дышетӥсь пиналъёслэн лыдзы 1 сюрс 800-лэсь трослы будэмын.

«Туннэ нуналэз басьтоно ке, 198 школаын 18 сюрс пала пиналъёс дышето удмурт кылэз предмет чотын, фактультатив чотын — 166 школаын 10 сюрс пала пиналъёс дышето
Валентина Корепанова

Россилэн азьмуртэз Владимир Путин косэмъя, али школаосын анай кылэз но кун кылъёсты дышетонъя эскеронъёс мыно. Валтӥсез, марлы саклык висъяло,  ӟуч кылъя урокъёслэн часъёссы йӧскалык кылъёсынлэсь ӧжыт медаз луэ.

«Азьмуртлэн поручениосаз косэмын, верамын — анай кылэз дышетон анай-атайёслэн мылкыд каремзыя но быръемзыя луыны кулэ шуыса. <…> Кыӵе анай кылэз быръёз (дышетоз — ред.) пинал, сое быръе анай-атай», — вераз йӧскалык дышетонъя ёзэтэн кивалтӥсь.

Соин валче, та дырлы удмурт кылэз дышетӥсь пиналъёслэн лыдзы кулэсмоз шуыса кышкытлык вань. Нырысь ик со анай кылын вераськисьтэм удмурт дышетскисьёс. Со сяна, ӟуч кылъя огъя кун экзамен сётоно бере, сое тросгес час дышетон понна удмурт анай-атайёс но нылпизылы ӟуч кылэз анай кыл шуыса бырйыны быгатозы, лыдъя Валентина Корепанова. Солэн верамъя, федерал ёзын та юан рос-прос эскеремын ӧвӧл на, со уж али мынэ. Вуоно дышетскон арозь рос-прос валэктонъёс луозы, дыр, малпа ӧнерчи.

«Йӧскалык кылъёсты школаосын, нылпи садын дышетон — со ноку но капчи юан ӧй вал, дыр, шуасал. Но али кадь секыт, мыным потэ, ӧй вал ноку но. Соин ик милем туж али юрттэтты кулэ, «Удмурт Кенешлэн» но, Кун Кенешлэн но, Йӧскалык политикая министерстволэн но
Валентина Корепанова

Дышетонъя но тодосъя министерствоысь йӧскалык дышетонъя ёзэтлэн кивалтӥсез кенешчиосты анай-атайёслы удмурт кылэз дышетонъя юанъёслы валэктонъёс сётыны но соосын юнгес кусыпъёсты тупатыны куриз.

Удмурт кылэз дышетонъя юанъёсты эскерем сяна, «Удмурт Кенеш» огазеяськонлэн ёросъёсысь но улосвылъёсысь ёзэтъёсыныз кивалтӥсьёс асьсэ ужзы сярысь ивортӥзы, Экспертно-консультативной кенешлэн кивалтӥсез, Фин-угор калыкъёслэн огазеяськонзылэн азьвалтэтэзлэн ёзчиез Игорь Семёнов Россиысь финн-угор калыкъёслэн 6-тӥ ӧтчамзылы йылпумъянъёс лэсьтӥз.

Со сяна, Пичи кенешлэн пумиськоназ «Удмурт Кенешлэн» Данъян книгаяз туэ пыртэм 5 муртэ ӟечкылазы.

Партнеры

Загрузка...