14.11.2017 15:46
Иворъёс
Татарстанысь удмуртъёс ӝыны ар куспын 32 ужрад ортчытӥзы

Татарстанысь удмуртъёс ӝыны ар куспын 32 ужрад ортчытӥзы

Фото: Наталья Еркешева
Татарстан / Россиын

«Татарстанысь удмуртъёслэн йӧскалык лулчеберетъя автономизы» 2017-тӥ арлэн нырысетӥ палараз удмуртъёс понна 32 ужрадъёс ортчытӥз. 9-тӥ шуркынмонэ Ижкарын «Удмурт Кенешлэн» Пичи кенешлэн пумиськоназ тужгес тунсыкоосыз сярысь вераз бускель улосвылысь мер огазеяськонлэн кивалтӥсезлэн воштӥсез Марина Иванова.  

Одӥгез тужгес пусйымонэз ужрадзы — нылпи садэ ветлӥсь пиналъёслы «Мудорвай» вожвылъяськон. Кылем арын грант вормемен валче сое Татарстанысь 5 ёросъёсын ортчытыны луиз. Отчы 315 пиналъёс пыриськизы. 

«Анайёссы веразы туж бадӟым тау, милям нылпиосмылы туж кельшиз удмурт кылын кылбуръёс лыдӟыны шуыса. Вуоно арын таӵе конкурс луоз-а, уз-а шуыса юазы соос. Туэ ми витиськом ни сюрс пала адями. Отчы пыриськыны быгато удмурт нылпиос сяна, мукет выжыысь пиналъёс но, кудъёсыз удмурт лулчеберетэн тунсыкъясько. Кылем арын ми грант вормим, туэ конкурсэз асьме кужыменымы ортчытӥськом», — пусйиз Марина Иванова.

Инвожое Татарстанысь удмурт егитъёслэн «БиГерд» форумзы 40 адямиез люказ. Марина Ивановалэн кылъёсызъя, сое Удмуртия шоры учкыса радъязы.

«Валамон, ми дышетскиськом тӥлесьтыд, Удмуртилэсь, малы ке шуоно татын егитъёсын ужан политикая азинскон зэмзэ но туж умой мынэ. Со ӧръёсты, кудъёсыз ужазы форумын, соосты ми татысь но пунэмам
Марина Иванова

Эшшо одӥгез шумпотымон ужрад, кудзэ Камсьӧр удмуртъёслэн йӧскалык центрзы Удмуртиысь Йӧскалык политикая министерство юрттэмен ортчытӥз — со удмуртъёслэн вашкала гуръёссыя «Чакара» улосвылкуспо фестиваль. Туэ со Татарстанысь Кукмор карын радъяськиз.

Дышетон удысын но Татарстанысь удмуртъёслы Удмуртиысь юрттэт лыктэ. Кылсярысь, азьвыл удмурт нылпи садъёсын анай кылэз дышетонъя программаос ӧй вал. Удмуртиысь Йӧскалык политикая министерствоен ӵош ужаса, табере 13 нылпи садъёсын удмурт кылъя занятиос ортчо.

«Ми кылдытӥм семинар, отын вал туж бадӟым юан — малы удмурт садикъёсын удмурт кылын уг дышето шуыса. Паймымон, садик но удмурт кадь, дышетон но удмурт кылын мынэ, но программа ӧвӧл. Озьыен, министерствоен ӵош вераським, табере милям 2 час удмурт кыл пыре садикъёсын но одӥг час бигер кыл», — шуиз Марина Иванова.

Солэн верамезъя, сыӵе юн ужаны луонлык кылдӥз автономилы тӧрое Андрей Герасимовез быръемен валче. 

«Андрей Сергеевич — со милям ужбергатонысь адями, соин ик кивалтон сӧзнэт, шуом — солэн валтӥсь ужпумез. <…> Котькуд ёрос кыӵе ке ужрад ортчытэ ке, милемлы вань ивортодэтсэ сётэ. Ми со ивортодэтэз сайтъёсы но понӥськом, валтӥсез уж милям мерлыко вотэсын мынэ. Ваньзэ сое учкыны быгатоды #бигерысьудмуртъёс хештэгъя», — вераз Марина Иванова

Татарстанысь удмуртъёслэн автономиенызы кивалтӥсьлэн воштӥсез ивортэмъя, одӥг но ӝыны ар куспын выль тӧрозы огазеяськонлэн ужрадъёсызлы 1 миллион но 200 сюрс аслэсьтыз коньдонзэ сётӥз. Со огшоры меценат гинэ ӧвӧл, Андрей Герасимов сюлмысь удмурт лулчеберет понна висе, пусйиз Марина Иванова но ватсаз, таӵе пайдаё уж командаен ӵош ужаса гинэ пӧрме шуыса.

Ватсалом, Ижкаре вуылыкуз, Татарстанысь удмуртъёслэн автономиенызы кивалтӥсьлэн воштӥсез «Удмурт Кенешлэн» тӧроеныз Татьяна Ишматоваен нимысьтыз пумиськылӥз. Соос Елабугаын научно-практической конференция ортчытон пумысен кенешизы. Ужрад Удмуртъёслэн нырысетӥ ӧтчамзы дырысен 100 ар тырмонлы сӥземын луоз.

Тодэ вайытом, «Удмурт Кенешлэн» Пичи кенешаз нимысьтыз вераськизы удмурт кылэз школаосын дышетон сярысь. Та ужпумъя юанъёслы валэктонъёс сётыны Удмуртиысь дышетонъя но тодосъя министерствоысь йӧскалык дышетонъя ёзэтлэн кивалтӥсез Валентина Корепанова ӧтемын вал. Со сяна, пумиськонын «Удмурт Кенешлэн» Данъян книгаяз пыртэм муртъёсты сӥё-дано пусйизы

Партнеры

Загрузка...
Иворъёс

Устоосыз авторъёс Удмуртиысь кивалтэтлэсь литературая премиоссэ басьтӥзы

13.11.2017 18:27
Иворъёс

Дышетӥсь Пётр Давыдов: удмурт гуртмы пумен ӟучоме шуыса сюлэм бӧрдэ

14.11.2017 11:12
Иворъёс

3 миллион манетлэсь трос коньдон люказы Ижкарын юрт куашкам сэрен шугадӟонэ шедемъёслы

14.11.2017 12:15