30.11.2017 16:16
Иворъёс
«Дарт» газет нырысетӥез Удмуртиын ватсам дуннеен потӥз

«Дарт» газет нырысетӥез Удмуртиын ватсам дуннеен потӥз

Фото: VK.COM/UDMDART
Ижкар / Удмуртиын

Удмурт егитъёслэн «Дарт» газетсы нырысетӥез Удмуртиын ватсам дуннеен (дополненная реальность) потӥз. Берло номерысь туспуктэмъёсты «улӟытыны», озьы ик видео учкыны луэ, вераз ивортодэтъя «Удмуртия» агентстволы газетлэн редакторез Мария Векшина.

Солэн кылъёсызъя, газетэ туала амалъёсты пыртыны ӵектос сётӥз удмурт android-ватсэтъёс кылдытӥсь но газетлэн редколлегиезлэн ёзчиез Григорий Григорьев. Редакциын ужасьёс кичӧлтонлы соку ик солы дурбасьтӥзы.

«Газетэз усьтӥськоды ке, отын котькуд суред вылын вань английский D буква. Со пусэн туспуктэм вылэ телефонэз пуктӥськод ке, со «улӟе»
Мария Векшина

«Дарт: ватсам дунне» нимын ватсэтэз Google Play магазинысь кыскыны луэ. Суредэз «улӟытон» понна телефон интернетэн герӟамын луыны кулэ.

«Валамон, милемлы азинсконо, нокинлэсь бере кылёно ӧвӧл. Кызьы вера Гриша Григорьев, солэн потэ удмурт культураез азинтэмез, удмурт культура бере медаз кыльы шуыса. Сыӵе ик ужпум ми пуктӥськом «Дарт» газет бордын ужасьёсын но. Малпаськом, егитъёсты нош ик кыскоз «Дарт» газет та приложение потэм бере, милям лыдӟисьёсмы тросгес луозы. Малы ке шуоно со приложение ужа «улэп» газетэн гинэ али», — пусйиз Мария Векшина.

Вераны кулэ, «Дартын» эшшо одӥг выльдӥськон вань — вотэсын электрон амалэн потэм газет буёло луиз. Сое лэсьтӥз дизайнерзы Вера Штыкова.

«Таиз газет бордын ужаз редколлегия шуыны луоз. Ми люкам со котыре егитъёсты, кытын кутскись журналистъёс, егит писательёс, суредаськисьёс, туспуктылӥсьёс, дизайнеръёс, программистъёс. Валче, ӵошен лэсьтыны ӧдъяськом та газетэз азьланяз», — вераз газетлэн редакторез.

Туала технологиос пала воштӥськонъёс азьланяз но луыны быгатозы на.

«Али приложение видеосуредъёсын гинэ ужаны быгатэ, азьланяз, малпасько, сое мукет медиа-контентэн но ужаны дышетом: Интернет чӧлсконъёсын, аудиоен но мукет. Озьы ик, пӧрмиз ке, та ватсэтэз iOS сӧзнэт вылын ужась телефонъёслы но лэсьтыны быгатом», — гожтӥз газетэ Григорий Григорьев.

Партнеры

Загрузка...
Иворъёс

Ӟуч кылын шонер гожъяськыны быгатэмез эскеронлы текст гожтоз Гузель Яхина

30.11.2017 12:24
Статьяос

Анай кылъя дышетӥсь-усточи Светлана Хлебова: удмурт кылтэк сыӵе узыр лулчеберетмы, историмы быроз

30.11.2017 15:44