01.12.2017 11:38
Иворъёс
Удмурт егитъёслэн «Удмурт-а мон?» улосвылкуспо форумзы усьтӥськиз Ижкарын

Удмурт егитъёслэн «Удмурт-а мон?» улосвылкуспо форумзы усьтӥськиз Ижкарын

Фото: Наталья Еркешева
Ижкар / Удмуртиын

Туннэ, 1-тӥ толсуре, Ижкарысь Калыкъёслэн эшъяськон юртазы удмурт егитъёслэн кыкетӥез «Удмурт-а мон?» форумзы усьтӥськиз. Туэ ӵектосъёс кылдытонлы сӥзем ужрадэ Удмуртиысь, Башкортостанысь, Татарстанысь, Киров улосвылысь но Екатеринбургысь 100-лэсь трос егитъёс люкаськизы.

Форуме пыриськисьёсты «Удмурт Кенешлэн» тӧроез Татьяна Ишматова, «Шунды» огазеяськонлэн кивалтӥсез Алина Чернова, Россиысь Кун Думалэн депутатэз Алексей Загребин, Удмуртиысь йӧскалык политикая министр Лариса Буранова, лулчеберетъя но туризмъя министр Владимир Соловьёв но мукетъёсыз ӟечкылазы. 

Удмуртилэн тӧроез Александр Бречалов та дыре ужезъя Москвае мынӥз, соин ик ужрадэ пыриськись егитъёслы со видео пыр вазиськиз. Пумитан кылъёсаз элькунлэн кивалтӥсез пайдаё ӵектосъёс понна дурбасьтыны дась луэмзэ пусйиз, азьланяз форумез паськытгес, калыккуспо инлыке поттыны луонлык сярысь вераз. 

«Форумлэн нимыз «Удмурт-а мон?» <…> Мон оскисько, тӥляд ӧвӧл шугъяськонды асьтэдыз кин шуыса валанэн. Тӥледлы мукетгес юанъёс пуктэме потэ: кыӵеен тӥ адӟиськоды асьмелэсь Удмуртимес? Кыӵеен тӥ адӟиськоды асьмелэсь черкогуртъёсмес но гуртъёсмес, асьмелэсь каръёсмес, асьмелэсь шоркармес – Ижкарез? Возьмасько тӥлесьтыд кичӧлтонъёстэс но ӵектосъёстэс
Александр Бречалов, Удмуртилэн тӧроез

Форумез сӥё-дано усьтэм бере люкаськем егитъёс проектэз быдэстон понна коньдон утчан амалъёс сярысь тодон-валанъёс басьто. Сессиез элькун кивалтэтлэн тӧроезлэн нырысетӥ воштӥсезлэсь ужзэ быдэсъясь Александр Свинин нуэ. Спонсоръёсты кыскон сярысь верамез сяна, со валэктӥз, кытысь ӵектосэз шонер гожтонъя ивортодэт шедьтыны луоз. 

Удмурт егитъёслэн «Удмурт-а мон?» форумзы усьтӥськиз Ижкарын
Удмурт егитъёслэн «Удмурт-а мон?» форумзы усьтӥськиз Ижкарын
5 ФОТО

Нуназе бере ужрад секциосъя ужен азьланьтӥськоз. Егитъёс дышетон, лулчеберет, туризм, иворъёсты вӧлмытон ёзэсъёс но котырез умоятон-утялтон (благоустройство) удысъёсъя кичӧлтонъёсынызы тодматозы, соосты тыраз-пыдаз вуттыны тыршозы. Пусъём, тросэзлэн егитъёслэн ӵектосъёссы огкадь ужпумлы сӥземын, кылсярысь, удмурт кылъя курсъёс радъянлы, удмурт лулчеберетэз вӧлмытонлы, гурт улонэз узырмытонлы но мукет. 

Егитъёслэсь малпанъёссэс дась проектозь вуттыны ӧтем ӧнерчиос юрттозы. Соос пӧлын Удмурт кун университетысь Удмурт кылъя, финно-угроведениея но журналистикая институтлэн кивалтӥсез Наталья Кондратьева, элькун тӧролэн но кивалтэтлэн администрациенызы кивалтӥсезлэн юрттӥсез Евгения Сундукова, Архитектурая но этнографияя «Лудорвай» музей-заповедниклэн кивалтӥсез Татьяна Шкляева, «Удмурт Дунне» газетлэн валтӥсь редакторез Зинаида Рябинина, Удмуртиысь лулчеберет кылёсбурез кун ласянь утёнъя агентстволэн кивалтӥсез Юрий Перевозчиков.     

Форумлэсь ужзэ туннэ ик пленарной заседание йылпумъялоз. Отын секциосысь тужгес усто ӵектосъёсын тодматозы. Тодэ вайытом, пумиськонэ спонсор луыны быгатӥсьёс но ӧтемын. Кельшем проект понна соос соку ик дурбасьтыны быгатозы. Озьы ик ӝытазе форумлэн ужез борды Удмуртиысь кивалтэтлэн тӧроез Ярослав Семёнов итӥськоз. 

Нунал пумын ужрадэ пыриськисьёсты «Куарагур» ӵектослэн концертэз шулдыртоз.

Партнеры

Загрузка...
Статьяос

Анай кылъя дышетӥсь-усточи Светлана Хлебова: удмурт кылтэк сыӵе узыр лулчеберетмы, историмы быроз

30.11.2017 15:44
Иворъёс

«Дарт» газет нырысетӥез Удмуртиын ватсам дуннеен потӥз

30.11.2017 16:16