01.12.2017 12:14
Иворъёс
«Меми дор сяськаос» вожвылъяськонын вормисьёсты пусйизы Ижкарын

«Меми дор сяськаос» вожвылъяськонын вормисьёсты пусйизы Ижкарын

Фото: Майя Бывальцева
Ижкар / Удмуртиын

30-тӥ шуркынмонэ Ижкарын «Удмурт нылкышно кенешлэн» «Табань-клубезлэн» пумиськоназ «Меми дор сяськаос» интернет-вожвылъяськонын вормисьёсты пусйизы. Ужрад Калыкъёслэн эшъяськон юртазы ортчиз.

Вожвылъяськон куартолэзе кутскиз но ньыль ӧръёсъя мынӥз: меми дор сяська, анайлэн сяськаосыз, удмурт сяська тырон, паймымон сяська. Конкурсэ 200 пала ужъёс вуизы, туспуктэмъёсысь арлыдоосты но, пиналъёсты но адӟыны луиз. Вотэсын куара сётонэ 6 сюрслэсь трос адями пыриськиз, соослэн куараоссыя устооссэ 28 ужъёсты бырйизы. 

Сьӧлта ёросысь Югдон гуртысь Маргарита Трофимоваез «Меми дор сяська» ӧръя нимысьтыз дипломеныз пусйизы. Нылкышнолэн ивортодэтъя «Удмуртия» агентстволы верамезъя, со понна меми дор сяська — фуксия.

«Чугунын соос будо вал укно вылын туж трос. Собере ми соосты угы карыса пелямы тыриськом вал, киосамы гижымес красить кариськом вал! Меми дор сяська шу оке, мыным со сяська тодам лыктэ
Маргарита Трофимова

Солэн верамезъя, гуртын ужлы ноку но уд ёрмы, но сяськаосын вырыны дыр котьку шеде. Сяськаос юртъер котырзэс вазь гужемысен лымы усьытозь чеберто.

«Мынам со висёнэ-а, мар-а! Кузпалы куд-ог дыръя шуэ, ма, пе, тани та сяська интые татчы кубиста мерттоно вал. Ма, кубистаед ӧвӧл-а, мар-а тынад шуисько, кубиста толбыт сииськом. <…> Али ачиз но яратэ ни сяськаосты: малы, пе, татын интыез буш, малы сяська ӧд мертты. Корка котырмы сяськаосын тырмемын», — вераз кышномурт.

Трослыкез сьӧры уг уйиськы, валтӥсез — со чебер лэсьтэмын, чебер интыямын мед луоз. Озьы ас понназ туала вакытэ модае пырем ӧнерез — ландшафтной дизайнэз — асэстӥз шуыны луэ.

«Туэ лэсьтэмын вал мынам пичи шур лобелия сяськаослэсь: гурезьысь, ведраысь, потэ сяська но бызе вал быдэс убоос дортӥ бакчаын, ӵужкушман котыртӥ шур сямен бызе вал. Отын ик кык каксяос (цапляос) сыло. Кузпалы но юрттэ ни, <…> мунё лэсьтӥмы, бадьлэсь керттӥмы сое, собере удмурт дӥськутэн дӥсяса, котыртӥз чисто сяська. Карнан понӥм солы, ведраын будто ке со ву — сяська — нуэ. Губиос лэсьтэмын, лӥялъёс вылын оломар но. Тыршисько, чебер мед луоз», — вераз Маргарита Трофимова.

Солэн кылъёсызъя, Югдонын ньыль кузя сыӵе «сяськалы ёрмем муртъёс». Соос ог-огенызы кидысъёсын вошъясько, сяська будэтон амалъёс сярысь кенешо. Со дыре ик котькудзы азбарзэс аспӧртэм чебертыны тыршо.


Нош интернет-конкурс ортчытон сярысь малпан кылдӥз Ува ёросысь Петровской (Петропавлово) гурты «Меми дор сяськаос» ёроскуспо семинар ортчон дыръя. «Удмурт нылкышно кенешлэн» ёросысь азьветлӥсез Валентина Яковлева нырысь ик асьсэ гуртазы вожвылъяськон ортчыны кичӧлтӥз вал, собере ёросын радъяны ӵектӥзы. Нош семинар дыръя нылкышноослэн элькун огазеяськонзылэн кивалтӥсез Надежда Степанова быдэс Удмуртиез со уже кыскыны дэмлаз. Собере ужрад борды итӥськисьёс мукет улосвылъёсын но шедизы — кылсярысь, Башктортостанын. «Табань-клубе» отысь Татышлы ёросысь удмурт гуртъёсысь нылкышно клубъёслэн кивалтӥсьёссы вуизы.

Пумиськонэ биологи тодосъя докторез Виктор Туганаевез но ӧтизы. Со удмуртъёслэн инкуазен кусыпъёссы, эмъюм турынъёс сярысь вераськиз.

Шулдыр кырӟанъёсын мылкыдэз ӝутӥзы Шаркан ёросысь куноос — арганчиос но кырӟасьёс Павел Кутергин но Татьяна Хохрякова.

Нялтас вераса, «Меми дор сяська» вожвылъяськонлы луыса тросэз кышномуртъёс вотэсын асьсэлэсь бамъёссэс кылдытӥзы. «Удмурт нылкышно кенешлэн» но огинэз соин валче будӥз. Озьыен интернетын удмурт кылэз кутон но паськытаз.  

Партнеры

Загрузка...
Статьяос

Профессор Виктор Туганаев: адями инкуазез трос уг ке сӧсырмыты, инкуазь ачиз ассэ тупатэ

18.01.2017 17:19
Иворъёс

Удмурт егитъёслэн «Удмурт-а мон?» улосвылкуспо форумзы усьтӥськиз Ижкарын

01.12.2017 11:38