04.12.2017 11:38
Иворъёс
Удмурт егитъёслэсь устооссэ ӵектосъёссэс быдэстыны коньдон висъялозы Удмуртиын

Удмурт егитъёслэсь устооссэ ӵектосъёссэс быдэстыны коньдон висъялозы Удмуртиын

Фото: Наталья Еркешева
Ижкар / Удмуртиын

Удмурт егитъёслэн «Удмурт-а мон?» улосвылкуспо форумысьтызы тужгес устоосыз ӵектосъёс коньдонэн юрттэт басьтозы. Со сярысь форумез одӥгез радъясь, «Удмурт Кенеш» огазеяськонлэн кивалтӥсез Татьяна Ишматова ужрадлэн йылпумъян пумиськоназ ивортӥз.

Тодэ вайытом, «Удмурт-а мон?» кыкетӥез форум Ижкарын 1-тӥ толсуре ортчиз, со проект кылдытонъя ужлы сӥземын вал. Со улсын 5 секциос ужазы: дышетон, лулчеберет, туризм, котырез умоятон-утялтон но ивортодэт вӧлмытонъя ёзэсъёс. Котькуд секциын пыриськисьёс асьсэ ӵектосэнызы тодматон сяна, проект кылдытонлэсь валтӥсь куронъёссэ тодыны быгатӥзы.

Удмуртиысь йӧскалык политикая министр Лариса Буранова верамъя, туннэ нуналлы асьме элькунын ӵектос гожтонъя пӧртэм семинаръёс ортчо, соин ик шонер проект кылдытон понна калыклы шаплыгес кариськыны кулэ.

«Ми али пичи ке но вамыш лэсьтӥськом ке, ми сое проект шуиськом. Со туж шонер ӧвӧл. Проект — со нимысьтыз организм, кудӥзлэн вань ас, мон шуысал, катъёсыз, кызьы со улыны кулэ. Соин ик солы дышетскыны кулэ
Лариса Буранова

Ӵапак куронъёсъя гожтэм проектъёс вормисе потӥзы котькуд секциын, соосын форумлэн йылпумъян ужрадаз тодматӥзы. Отчы Удмуртиысь кивалтэтлэн тӧроез Ярослав Семёнов, коньдон сётыны быгатӥсь депутатъёс но ужбергатӥсьёс пыриськизы.

«Туж умой, куке егитъёслэн синъёссы ӝуало, куке сюлэмшугъяськытӥсь юанъёс чузъясько. Озьыен, таӵе пумиськонъёс, тазьы вераськонъёс юнме уг ортчо. Милемлы егитъёсын туж кулэ ог-огмес кылыны но валаны, мон малпасько, ми одӥг кылэ вуимы», — пусйиз Ярослав Семёнов. 

«Удмурт-а мон?» форумын вормем ӵектосъёс:

  • Котырез умоятон-утялтон секциын — «Удмурт аттракционъёсын парк», Светлана Назарова, Кез каргурт
  • Лулчеберет секциын — гурт возёсын ужась егит ӧнерчиос пӧлын «Удысужлыкъя устоез» конкурс, Елена Чернова, Вавож черкогурт
  • Туризм секциын — туризмъя «Аббатские пещеры» маршрут, Татьяна Симакова, Кизнер ёрос
  • Ивортодэт вӧлмытонъя ёзэсъёс секциын — «Дарт: ватсам дунне», Мария Векшина
Дышетон секциын вормисез ӧз быръе, коньдонэз Эгра ёросысь Чемошур гуртысь клубе литература басьтонлы, элькунысь дышетсконниос понна семинаръёс радъянлы но пиналъёслы фестиваль кылдытонлы кутыны ӵектӥзы.

Тросэз та проектъёс быдэстӥсько ни, озьы ке но соосты пайдаёгес карон но умоятон понна коньдон кулэ. Кылсярысь, Вавож ёросысь егитъёслэн «Югдон» центрзылэн кивалтӥсез Елена Черновалэн гурт возёсын ужасьёс пӧлын «Удысужлыкъя устоез» конкурслэн ӵектосэз дась ни. Та дыре сэртто-пертчо, кӧня коньдон кулэ луоз сое быдэстон понна.

Кызьы вераз ивортодэтъя «Удмуртия» агентстволы Елена Чернова, гурт возёс удысын ӧнерчиос уг тырмо шуыса юанъёсты ёрос администрациын ялан ӝуто. Ужасьёслэн гуртэ кыльыны мылкыдзы мед луоз шуыса, соослы ӵошатсконъёсын асьсэдыз возьматыны луонлык сётоно, пусйиз ӵектослэн авторез.

«Тани дышетӥсьёс вожвылъяськонъёсы кыӵе ке пырисько, нош кин музъем вылын яке гидын ужа, соос уг адӟо со конкурсъёсты. Ӟуч сямен верано ке, карьерный ростэз адямиос, эшшо ик егитъёс, адӟыны кулэ
Елена Чернова

«Югдон» центрлэн кивалтӥсез малпамъя, «Удысужлыкъя устоез» ӵошатскон быдэс элькунысь ӧнерчиос понна радъяськыны кулэ. Матысь дыре Елена Чернова министерствоосын но ёрос администрациосын кенешыны ӧдъя. Ваньзы огкылысь луизы ке, конкурсэз вуоно сӥзьыл ортчытыны чаклало.

Тодэ вайытом, удмурт егитъёслэн «Удмурт-а мон?» форумазы туэ Удмуртиысь, Башкортостанысь, Татарстанысь, Киров улосвылысь но Екатеринбургысь 100-лэсь ятыр адямиос люкаськизы. Секциосъя уж кутскон азьын элькун кивалтэтлэн тӧроезлэн нырысетӥ воштӥсезлэсь ужзэ быдэсъясь Александр Свинин егитъёслы тодон-валан сётонъя сессия ортчытӥз, коммерци луисьтэм огазеяськонъёслы юрттэт сётон сярысь вераськиз. 

«Таяз арын Удмуртиысь коммерци луисьтэм 30-лэсь трос огазеяськонъёс Азьмуртлэсь грантъёссэ утӥзы. Вуоно арын Азьмуртлэн грантъёсызъя фондлэн быдӟалаез 8 миллиард манет луоз, со пӧлысь миллиардэз егитъёслэн ӵектосъёссылы чакламын. Тӥледлы, тӥляд огъёзъёстылы юрттон понна ми элькунын но та выллем фонд кылдытыны луонлыкез азьланяз эскерыны малпаськомы
Александр Свинин, Удмуртиысь кивалтэтлэн тӧроезлэн воштӥсезлэсь ужзэ быдэсъясь

Ватсалом, егитъёслэн та форумлэсь возьманъёссы пӧртэмесь вал. Кин ке ӵектосэныз тодматыны но ӵош ужан эшъёс шедьтыны лыктӥз, нош кин ке — дышетскыны.

Партнеры

Загрузка...
Иворъёс

«Меми дор сяськаос» вожвылъяськонын вормисьёсты пусйизы Ижкарын

01.12.2017 12:14
Иворъёс

Егитъёслэн эскеронъёсъя финн-угор экспедицизы ортчоз Удмуртиын

01.12.2017 14:41
Иворъёс

«Удмурт-а мон?» форум: мар возьмало солэсь егитъёс

01.12.2017 17:54