05.12.2017 10:34
Иворъёс
Россиысь финн-угор егитъёслэн форумзы ортчоз Удмуртиын 2018-тӥ арын

Россиысь финн-угор егитъёслэн форумзы ортчоз Удмуртиын 2018-тӥ арын

Фото: fadm.gov.ru
Ижкар / Удмуртиын

2018-тӥ арын Удмуртиын Россиысь финн-угор егитъёслэн дышетон форумзы ортчоз. Москваын 29-тӥ шуркынмонэ пумиськон дыръя со пумысен огкылэ вуизы элькунысь йӧскалык политикая министр Лариса Буранова но Егитъёсын ужанъя федерал агентстволэн кивалтӥсез Александр Бугаев. Ивортодэтъя «Удмуртия» агентстволы со сярысь вераз улосвыл удысэтлэн кивалтӥсез.

«Вераськимы, кыӵе мылкыдмы, кыӵе малпанъёсмы вань. Огкылэ вуимы, сыӵе решение кутэмын ни — вуоно арын, 18-тӥ арын, татын, Удмуртиын, луоз Россиысь нырысетӥез сыӵе финн-угор калыкъёслы сӥзем форум
Лариса Буранова, Удмуртиысь йӧскалык политикая министр

Солэн верамезъя, форумез ортчытон дыр али тодмо ӧвӧл на, сое матысь нуналъёсы соглаштыны кулэ. Озьы ик матысь дыре тодмо луоз ужрадлэн пуштросэз. Лариса Бурановалэн чакламезъя, форум 3–4 нунал кыстӥськоз.

«Али малпаськом со 3–4 нунал пала луоз. Рос-прос программа али гожтэмын ӧвӧл. <…> Луоз, дыр, пӧртэм тунсыко адямиосын но пумиськыны, дышетон программа но мыноз. (Федерал — ред.) экспертъёс лыктэмын луозы, ужалозы егитъёсын, асьмелэнъёс но, оло, мукет финн-угор улосвылъёсысь лыктэмын луозы», — вераз Удмуртиысь йӧскалык политикая министр.

Быдэс Россиысь егитъёс дорамы лыктозы бере, соосты Удмуртиен матысьгес тодматыны кулэ, лыдъя Лариса Буранова.

«Толалтэ ке — Тол Бабай доры нуоно луоз, <…> гужем ке — Лудорвае но ветлом, дыр», — вераз со.

Ватсалом, Лариса Бурановлэн кылъёсызъя, финн-угор егитъёслэсь форумзэс Удмуртиын ортчытон сярысь кенешонъёс гужем ик нуизы ни вал. 2016-тӥ арын Егитъёсын ужанъя федерал агентство (Росмолодёжь) Уфаын тюрк егитъёслэсь «Золото тюрков» огъяросси форумзэс ортчытӥз вал. Соя ик финн-угор егитъёслы сӥзем бадӟым ужрад радъяны мылкыд кариз. Федерал агентстволэн но Удмуртиысь Йӧскалык политикая министерстволэн мылкыдъёссы та ласянь тупазы.

Россиысь финн-угор егитъёслэсь форумзэс радъялозы Егитъёсын ужанъя федерал агентство но Удмуртилэн кивалтэтэз.

Тодэ вайытом, 1-тӥ толсуре Ижкарын удмурт егитъёслэн «Удмурт-а мон?» форумзы ортчиз. Ӵектосъёс кылдытонлы сӥзем ужрадэ Удмуртиысь, Башкортостанысь, Татарстанысь, Киров улосвылысь но Екатеринбургысь 100-лэсь трос егитъёс пыриськизы. Йылпумъянъёсъя устооссэ ньыль ӵектосъёсты быдэстыны коньдонэн юрттэт висъялозы

Партнеры

Загрузка...
Иворъёс

Егитъёслэн эскеронъёсъя финн-угор экспедицизы ортчоз Удмуртиын

01.12.2017 14:41
Иворъёс

Удмурт егитъёслэсь устооссэ ӵектосъёссэс быдэстыны коньдон висъялозы Удмуртиын

04.12.2017 11:38