16.03.2017 15:44
Иворъёс
Удмуртилэн командаез спортъя Росси тол гурт шудонъёсын укмысэтӥ инты басьтӥз

Удмуртилэн командаез спортъя Росси тол гурт шудонъёсын укмысэтӥ инты басьтӥз

ФОТО: ЦЕНТР СПОРТИВНОЙ ПОДГОТОВКИ УДМУРТИИ (ГРУППА В ВК)
Бердск / Россиын

Удмуртилэн командаез Бердскын (Новосибирск улосвыл) спортъя тямысэтӥ Росси тол гурт шудонъёсын укмысэтӥ инты басьтӥз. Со сярысь журналистъёслы ивортӥз Удмуртиысь Мугорез кыдатонъя, спортъя но егитъёслэн политиказыя министрлэн нырысетӥ воштӥсез Павел Вечтомов.

«Вормонъёсыныды милемыз шумпоттӥды. Ми шӧдӥськом, азьланяз азинскыны луонлыкмы вань шуыса. Зэм, кытын ке, мар ке ӧз пӧрмы, кытын ке янгышъёс вал, но со спорт. Озьы ке но, асьмелэн вань вормисьёс пӧлы шедёнъёсмы, кудъёсыныз ми одно ик данъяськом», — шуиз Вечтомов.

Удмуртилэн командаяз Дэри, Эгра, Можга, Шаркан но Юкаменск ёросъёсын улӥсьёс пыризы. Шудонъёсы Россиысь 58 улосвылъёсысь сюрслэсь ятыр спортсменъёс пыриськизы. Соос куасэн бызьылонын, полиатлонын, гира ӝутканын, шахматэн но  шашкиен шудонын, озьы ик трактор нуллон устолыкез возьматонын но механизаторъёс куспын конкурсын ӵошатскизы.

Механизаторъёс пӧлын Юкаменск ёросысь Алексей Невоструев куасэн бызьылонын куинетӥ но кужымез мертан гимнастикаын кыкетӥ луиз, но трактор рулез бергатыкуз лэсьтэм янгышез куатетӥ инты гинэ басьтыны луонлык кельтӥз на. Скал кыскисьёс пӧлын Юкаменск ёросысь Галина Ившина скал кыскон аппаратэз сэрттон-бичанын кыкетӥ луиз.

Эгра ёросысь спортсменъёс полиатлонъя ӵошатстконын ньылетӥ луизы, Удмуртилэн командаяз пыриськись Владислав Леконцев спортъя мастерлэсь куронъёссэ быдэстӥз. Можга ёросысь шахматэн шудӥсьёс 30 командаос пӧлын 7-тӥ инты басьтӥзы, Юкаменск ёросысь шашкиен шудӥсьёс — 34 командаос пӧлын 8-тӥ луизы. 10–12 аресъем нылпиен семьяос куспын ӵошатсконын Дэри ёросысь Малыхъёслэн семьязы кыкетӥ инты басьтӥз.

Якшур-Бӧдьяын ортчем элькун гурт шудонъёсты но Росси шудонъёсты ӵошатыса, спортсменъёсмы Бердскын ӵошатсконъёсысь кӧня ке тырмымтэосты пусйизы. Кылсярысь, Малыхъёслэн семьязылы суро эстафетаез бызьыкузы мултэс 30 секунд гожтыны медӥсь эскерись-чотасьёс вылэ ӝожтӥськизы. Интыысь телеканаллэн вазиськемезлы луыса гинэ Удмуртиысь спортсменъёс азьвыл результатзэс утизы. Со сяна, ӵошатсконъёс бере спортсменъёсты медальёсын но дипломъёсын ӧз пусъе.

Вераны кулэ, мукет улосвылъёсысь пыриськисьёс асьме командамылэсь дӥськутсэ пусйизы. Со та шудонъёсын тужгес чеберез шуыса вераллязы.

Спортъя тямысэтӥ Росси тол гурт шудонъёс Бердскын 2–5 южтолэзе ортчизы. Огъя зачётын вормисе потӥз ӵошатсконъёсты туэ ортчытӥсьёслэн, Новосибирск улосвыллэн командаез. Вормисьёс пӧлы пыризы Челябинск улосвыл но Пермь шаер.

Тодэ вайытом, вуоноосыз спортъя Росси тол гурт шудонъёс 2019-тӥ арын Удмуртиын ортчыны быгатозы.

Партнеры

Загрузка...
Журналист утчаськомы
Иворъёс

Спортъя Росси тол гурт шудонъёс 2019-тӥ арын Удмуртиын ортчыны быгатозы

16.03.2017 14:41
Иворъёс

Устозэ инвесторез быръёнъя конкурс ортчытозы Удмуртиын

16.03.2017 15:11