06.12.2017 11:44
Иворъёс
Олимпи чемпионка Тамара Тихонова: нейтральной флаг улын Олимпиадае пыриськонлэсь номыр уродзэ уг адӟиськы

Олимпи чемпионка Тамара Тихонова: нейтральной флаг улын Олимпиадае пыриськонлэсь номыр уродзэ уг адӟиськы

Фото: ajssarimg.mediatriple.net
Ижкар / Удмуртиын

5-тӥ толсуре Калыккуспо олимпи комитет Россилэсь сборнойзэ допинглы пумитъяськон куронъёсты тӥям понна 2018-тӥ арын Пхёнчханын ортчоно Олимпи шудонъёсы пыриськонлэсь палэнтӥз. Сыӵе пумкылъянэз нимысьтыз пресс-конференциын шараяз Олимпи комитетлэн кивалтӥсез Томас Бах.

Со дыре ик Россиысь спортсменъёс шудонъёсы нейтральной куншет улын пыриськыны быгато — йӧскалык кункрезьтэк, тодметлыктэк но Россиысь олимпи атлет ним улсын. Но со понна но котькуд спортсмен нимаз лэзён басьтыны кулэ. Допинг вылын кутылэм спортсменъёсты Олимпиадае уз лэзе.

Мыноно-а Россиысь спортсменъёслы таӵе югдурын тол Олимпиадае яке ӧвӧл? Спортысь кивалтӥсьёс, спортсменъёс, политикъёс та пумысен пӧртэм мылкыдъёссэс верало. Ивортодэтъя «Удмуртия» агентстволы аслэсьтыз малпанзэ шараяз куасэн бызьылонъя кык полэс олимпи чемпионка, дуннелэн кык полэс чемпионкаез, СССР-ысь спортъя дано мастер, Удмуртиысь Куасэн бызьылонъя федерацилэн кивалтӥсез Тамара Тихонова.

Солэн кылъёсызъя, Калыккуспо олимпи комитетлэн пумкылъянэз туж урод мылкыд кылдытэ. Озьы ик сюлмаськыто асьме кунамы пуромем споръяськонъёс: мыноно яке ӧвӧл, патриот яке ӧвӧл.

«Мон малпасько, ас кунэзлэсь данзэ утись котькуд спортсмен — патриот. Но куке со патриот азе сыӵе юан пукто — патриот тон яке ӧвӧл — мыным потэ, сыӵе юан луыны кулэ ӧвӧл. Мон малпасько, котькуд спортсмен но тренер решение кутыны кулэ — кулэ-а соос мыныны яке ӧвӧл, со соослэн эрикрадзы», — пусйиз Тамара Тихонова.

«Зэмзэ вераса, мон спортсмен луысал ке, мон мынысал нейтральной флаг улын. Мон номыр уродзэ отысь уг адӟиськы. Со адямилэн улонэз, мынам сямен ик одӥг Олимпиадаез луоз, оло. Мон малпасько, олимпи чемпион вань ке — со вань
Тамара Тихонова, кык полэс олимпи чемпионка

Озьы ик со сюлмаськемзэ вераз: спортсменъёсмы нейтральной куншет улын но вормылӥзы ке, нош ик уз-а шедьтэ пробиркаос вылысь кыӵе гожмамъёсты. Нокыӵе санкциос уз луэ ни шуыса верамзылы бадӟым оскон ӧвӧл, шуиз олимпи чемпионка. Угось спортсменъёслэсь «чылкыт» луэмзэс тодыса но соосты палэнтӥзы. «Кытын зэмлык, мон али уг валаськы, луоз-а со?», — ватсаз Тихонова.

Пусйыны кулэ, Удмуртиысь спортсменъёс пӧлысь Олимпи шудонъёсы шедьыны луонлыкъёссы вал Ижкарысь фигуристкалэн Алина Загитовалэн, Можгаысь биатлонисткалэн Ульяна Кайшевалэн но Шарканысь куасэн бызьылӥсьлэн Максим Вылегжанинлэн. Но шуркынмон кутсконын Вылегжанинэз Олимпиадаослэсь пыраклы палэнтӥзы.

Россиысь спортсменъёслэн Паралимпи шудонъёсы пыриськемзы яке пыриськымтэзы сярысь пумкылъян али кутымтэ на. Но бадӟым луонлык, соосъя но та выллем ик санкциос луозы шуыса.

Тодэ вайытом, Лымшор Кореяысь Пхёнчхан карын тол Олмипи шудонъёс 2018-тӥ арын 9-25 тулыспалэ ортчозы. 

Партнеры

Загрузка...
Иворъёс

Россиысь финн-угор егитъёслэн форумзы ортчоз Удмуртиын 2018-тӥ арын

05.12.2017 10:34
Иворъёс

Егит драматургъёслы вожвылъяськон ялӥзы Удмуртиын

05.12.2017 16:48