Ижкар+1 °C
13 -тӥ оштолэзь 2021 Пуксён
18+

Меӵ удмурт Семён Бухарин: «Котькыӵе ужын кылкутон луыны кулэ»

  • 439
  • 0
Ижкар / Удмуртия
Меӵ удмурт Семён Бухарин: «Котькыӵе ужын кылкутон луыны кулэ»
Туспуктэм: Анжелика Тихонова

Ижкарын улӥсь юрт котырез утялтӥсь Семён Бухарин школа азбарын лымы вылын суредъёсыныз тодмо луиз. Кемалась ик ӧвӧл воргорон федерал телеканалын «Я почти знаменит!» шоуэ пыриськиз но вормиз. Суредась котькыӵе ужын кылкутон луыны кулэ шуэ.

«Я почти знаменит!»

Телевожвылъяськонэ Семён Бухарин малпамтэ шорысь сюриз шуыны луоз. Толсуре одӥг нуналэ солы жингыртӥсь луиз: али Казаньын улӥсь ӵош ужам тодмоез номерзэ курисьёс вань, сётыны яра-а, уг-а юаз. Семён Викторович телефон пыр интервью басьтыны медо, дыр, малпаса, «сёт» гинэ шуиз. Жингыртэмзэс кема возьмано ӧз луы.

Соос шуо: «Милям тӥледыз съёмкаосы ӧтеммы потэ вал». Кыӵе съёмкаосы? Мылкыд уг ӝутскы ни. «10 нуналлы съёмкаосы лыктоно луоз». Мон, шуисько, кӧня? Вождэн эн вае, уждун тӥ-а мыным тыроды? Мынам уже вань, шуисько, уг, уг лыкты. Ми тӥледлы берен жингыртом шуо
Семён Бухарин, лымы вылын суредась

Кӧня ке нунал ортчыса, нош ик жингыртӥсь луиз. Табере тямыс нуналлы лыктоно, пе. Семён Викторович нош ик чутрак пумит луиз, даслы но, тямыслы но уг лыкты шуиз. Трубкалэн мукет пумаз выльысь жингыртыны оскытӥзы.

Табере арнялы гинэ, шуо. «24-е съёмкаосы лыктоды, 27-е берен кошкоды». Ярам, шуисько... Поездэн, пе. Кыӵе поезд? Мон шуисько, французъёс монэ нуизы но вайизы но самолётэн. Школа монтэк ышоз татын шуисько, уже татын. Эшшо ик толалтэ, лымы усе
Семён Бухарин, лымы вылын суредась

Огкылэ вуизы ик. Программаез радъясьёс самолётэ билетъёс басьтӥзы. Сюрес вылэ мултэс дыр но, кужым но уз быры. Егит дыръям пыдын но, поездэн но мынысал, но али ӝуткаськем уг поты ни, шуэ воргорон.

Озьы Семён Бухарин лопатказэ, ӵужонзэ, гынсапегзэ кутыса, Москвае шонтӥз.

Шоу дасянын тросэз режиссёръёс бордысь потэ, шуэ суредась. Кылсярысь, ӵапак соос нырысетӥ турын Александр Пушкинлэсь Наталья Гончароваен поръямзэс суреданы ӵектӥзы. Семён Викторович соглаш луиз. Ачиз ик Микаэл Таривердиевлэсь «Ирония судьбы, или с Лёгким паром!» кинофильмын чузъяськем крезьгурзэ бырйиз.

Суредзэ лэсьтыкуз Семён Бухарин туж тулкымъяськем, уго сое быдэс Россилы возьматозы. Озьы ке но, номерез удалтӥз, сюлме пырымон пӧрмиз, крезьгур но туж юрттӥз. Жюрилэн ёзчиез, тодмо фигурист Алексей Ягудин синвуоссэ ик ватыны ӧз быгаты. Улосчимы но синкылияськемзэ адӟи шуиз.

Но финалэ потоз шуыса ӧз ик малпа вал, уго аслыз солы суред лэсьтон туж капчи потэ, номыр паймымонэз ӧвӧл кадь, соин адямиослэсь синмаськемзэс воксё уг вала.

Сергей Минаев (шоуэз нуись – ред.) но вералляз, валаськод-а, шуэ, мар тон вайид, кыӵе номер. Милемлы, шуэ, кемалась эктӥсьёсты, акробатъёсты, картаосын фокус возьматӥсьёсты учкыны акыльтӥз ини, нош тон сыӵезэ вайид, ми сыӵезэ ноку ӧм адӟылэ! Таӵеез ноку но ӧй вал на, шуиз
Семён Бухарин, лымы вылын суредась

Семён Викторович понна туж трос учкисьёс дурбасьтӥзы, соос, телевозьматон мыныку, трос гинэ ӟеч комментарийёс гожъязы. Со сяна, нырысетӥ тур дыръя со понна ӵош ужась эшъёсыз но висизы. Соос съёмкаосы ZOOM пыр пыриськизы. Суредась соосты адӟыса, вераськыса, пушкыз ик тыриз, ньылоназ комок кылдӥз но синкылиосыз васькизы шуыса пусйиз.

Семён Викторович 34 финалистъёс пӧлы сюриз. Йылпумъян программаын Николай Цискаридзеез суредаз.

Мон серекъяса верай вал, тӥледыз (Николай Цискаридзеез – ред.) малпасько вал суреданы шуыса. Со шуэ, ярам, вуонояз монэ ик суредалод. Мон серекъяны серекъяй, нош режиссёръёс со борды кырмиськизы. Соос шуо, давай, тон Цискаридзеез суредало шуид ук, давай суреда
Семён Бухарин, лымы вылын суредась

Нырысь ик со Николай Цискаридзеез шарж амалэн суреданы ӵектӥз вал. Режиссёръёс пумит луизы, валантэм луиз ке, артистлэн кӧтыз ӝож луоз шуизы но сцена вылын туспуктэмъёсыз пӧлысь бырйыны дэмлазы.

Ярам малпасько, мон тонэ бурдъёсын лэсьто ай. Суредай, тэтчон сыӵе, бурдъёс но умой тупазы. Отчы вуи но, режиссёръёс шуо, тае лэсьтоно ӧвӧл, тае лэсьтоно ӧвӧл. Паймыса учкисько соос шоры. Таиз уг кельшы, соиз уг кельшы. Марлы уске, шуисько, мон татчы вуи. Соос шуо, возьмалэ, валам, вождэс эн вае, суредалэ, мар йырады лыктэ
Семён Бухарин, лымы вылын суредась

Суредзэ пӧрмытэмез бере Николай Цискаридзе бызьыса дораз вуиз но сое нокин бурдъёсын ӧз на суредалля шуыса пусйиз. Кызьы валэктӥз Семён Бухарин, соос артист сцена вылын эшшо мед «лобалоз», учкисьёссэ эшшо мед шумпоттоз шуыса малпамын.

Павильонын съёмкаос 8 час 30 минут ӵукнаысен 6 час ӵукнаозь мынӥзы. Семён Викторович пусъе, сыӵе график телевидениын ужасьёсты но катьтэммытэ, нош огшоры адямиос сярысь веранэз ик номыр.

Малпаськыса сылӥсько ас поннам, чалякгес мед быроз вал ини шуыса. Изем но потэ ини. Собере веразы Бухарин Семён шуыса. 30-40 арес луысал ке, мон шумпотысал, нош мон понна со кыӵе ке рабочей югдур вал. Ворми но ворми, Инмарлы тау малпай
Семён Бухарин, лымы вылын суредась

Статуэтка
Телевожвылъяськонын вормемез понна Семён Бухаринлы 3 миллион манетлы сертификат вӧзы таӵе статуэтка кузьмазы Фото: Анжелика Тихонова ©

Вормонэныз ӟечкыланъёс али ке но вуо, шуэ Семён Бухарин. Ялан жингырто, гожто. Но со ини вожвылъяськонлэсь финалзэ телевидение пыр возьматэм бере. Со дырозь нокин номыре ӧз тодылы.

Съёмкаос 26-27 тулыспалэ вал, нош соос (ӟечкыласьёс –ред.) алигес тодӥзы. Ваньмыз юало, тон тодӥськод ни вал-а мар-а шуыса. Конечно, тодӥсько, шуисько. Мон нокинлы верантэм вылысь маке мында бумагае гожтӥськи
Семён Бухарин, лымы вылын суредаськись

Тодмо луэмезлы Семён Викторович туж ик уг шумпоты. Укыр бадӟым саклык висъямзы солы кулэ ӧвӧл.

Утэм коньдонзэ суредась сузэрезлы юрттӥськыны, школае, кытын со ужа, маке басьтыны но аслыз коркалы кутыны малпа.

Дядяе весь шуэ вал тымет дорын мед луоз шуыса. Мынам но сыӵе ик мылкыды. Шур бадӟым мед луоз вал вӧзам
Семён Бухарин, лымы вылын суредась

Лэсьтӥськись, шахтёр, тылпу кысӥсь

Семён Бухарин Пичи Пурга ёросысь Гужношур гуртын вордӥськиз. Атаез лэсьтӥськись луыса тыршиз, нош анаез колхозын ужаз. Семьяязы куать нылпиос будӥзы: кык пиос но ньыль нылъёс.

Лукерья анайзы туж умой кырӟа вылэм, арганэн шудыны но быгатэм.

Пичи арган басьтӥзы но, мемей шуэ вал: «Вай ай, пие, мон но утчало, оло, мынам но пӧрмоз». Собере сюан гуръёс но шудыны дышиз. Куддыръя эшъёсыз лыкто но, малпаськыса, вераса, арган кыскаса шудыса, бӧрдыса-бӧрдыса, тӥни озьы пуко вал
Семён Бухарин, лымы вылын суредась

Нош Виктор атайзы туж ӟеч лэсьтӥськись вылэм. Бригадазэс олокытчы но командировкаосы лэзьяло вылэм. Семён Бухарин но, армие ветлыса, атаез вӧзы интыяськылӥз. Но кема ужаны ӧз кылды.

Дядяе монэ отысь улляз. Мын, шуиз, дышетскы, мынам уг поты, тон ялан стройкаын мед ужалод шуыса. Косӥз дышетскыны мыныны. Мон шуисько, дядяй, кытчы мон мыном, тон монэ улляськод бригадаысь август толэзе, ваньмыз тырмемын ини дышетскисьёсын. Номыре уг тодӥськы, ужаны уд мыны, шуиз. Со звеньевой вал. Ӧз лэзьы ни монэ
Семён Бухарин, лымы вылын суредась

Атаезлэн ӵектэмезъя, Чайковскысь профтехучилищее вамыштӥз.

Соос шуо, милям тырмемын ини. Мон шуисько, монэ дядяй гуртэ пырыны уз лэзьы, мар ке но каре, мон татысь нокытчы уг кошкы. Соос мыным бумага но карандаш сётӥзы но мар ке но суреданы косӥзы. Собере ярам шуизы, вераськом, малпаськом. Озьы монэ пыртӥзы
Семён Бухарин, лымы вылын суредась

Чайковскын Семён Бухарин кык ар ӵоже оформитель-декораторлы дышетскиз. Собере ужаны Пичи Пургае интыяськиз. Басьтэм уждунэз егит ӧнерчилэсь мылкыдзэ уськытӥз.

Практикаын ужаса мон 90 манет басьтӥ. Мар со мыным, пинал, таза пияшлы? Шудэм но потэ, серектэм но потэ, нылъёсын но поръям потэ. Малпасько, кошко ай мон «на заработки»
Семён Бухарин, лымы вылын суредась

Озьы Семён Викторович Воркутаысь огаз шахтае вуиз. Отын 10 ар тыршиз. Нош 36 аресказ берен вордӥськем гуртаз бертӥз.

Анай-атайёсын аламагес луиз, мемее ракен висьыса кулӥз, дядяе ӧз чида. Соку бертоно кариськи ини мон, дядяйлы юрттыны шуыса. Мон шуисько, дядяй, кызьы ке но улом ини, мон копаклы бертӥ
Семён Бухарин, лымы вылын суредась

Но ӝоген атаез но улонысь кошкиз. Семён Бухарин Ижкаре улыны выжиз. 15 ар ӵоже тылпу кысӥсь луыса ужаз. Котькытын ассэ рос-прос, ужез гажась, валась воргоронэн возьматӥз.

Мылкыд мед луоз. Котьмар тон ужа, мылкыдын лэсьтыны кулэ. Озьы ик котьку кылкутон луыны кулэ
Семён Бухарин, лымы вылын суредась

Суредась

Семён Викторович пичи дыръяз ик суредаськыны яратылӥз. Ӵемысь танкъёс, самолётъёс суредалляз, суредаса «ожмаськонъёс» ортчытъялляз. Геройёсыз ӟучъёс но немецъёс вал – кин кинэ вормоз.

Дядяе мыным, мар ужаськод шуэ вал, мон шуисько - урокме лэсьтӥсько. Эскерыны лыкто ке, тетрадьме чаляк гинэ вылаз понӥсько вал
Семён Бухарин, лымы вылын суредась

Бӧрысь суредаськон улонысьтыз кемалы кошкиз но, трос аръёс ортчыса, малпамтэ шорысь берытскиз.

2011-тӥ арын Семён Викторовичез Ижкарысь 25 номеро лицейысь ӧсъёсты выльдыны ӧтизы. Мыло-кыдо тыршемзэ синйылтыса, дышетон юртлэн кивалтӥсез Елена Вечтомова сое доразы ужаны кыльыны куриз. Нырысь котырез утялтӥсь луыса, бӧрысь юртъерез но учкыны оскизы. Ӵапак отын ик нырысетӥ суредъёссэ лэсьтылыны кутскиз. Асфальт вылэ лымылэсь бабля пужыос кылдытъяз.

Со школа азьын маке быдӟа ик площадка. Кызьы ке но 100 метр кузьдалаем но 60 метр пасьталаем. Туж умой инты вал
Семён Бухарин, лымы вылын суредась

Семён Бухаринлэн ужъёсыз

27 фото

Лицейын дышетскись пиналъёс, суредъёссэ адӟыса, юатэк-вератэк интернетэ поттӥллям. Со сяна, «Инстаграм» мерлыко вотэсэ суредъёсыныз бам но усьтӥллям. Нялтас вераса, Семён Викторович али ке но уг тоды, кин сое нуэ. Но нуэ бере, мед нуоз, шуэ, аламазэ номыр уг гожты ук.

Бӧрысь со доры лачак журналистъёс ветлыны кутскизы.

Мон ачим но паймыны кутски ини, мар мон лэсьтӥсько. Нош куке йылэ тубыса учкиськод, чебер адӟиське вылэм! Татын музъем вылын со туж уг адӟиськы. Ачид но рос-прос уд валаськы мар лэсьтӥськод, кызьыгес суред пӧрмоз
Семён Бухарин, лымы вылын суредась

Лымы вылэ собыдӟа суредэз лэсьтыны туж секыт кадь. Кызьы валалод, кытын соиз, кытын таиз луыны кулэ, пӧрме-а, уг-а? Но суредась отын номыр секытэз ӧвӧл шуэ, со понна ваньзэ син азе пуктоно.

Мынам ужпуме чалякгес суреданы, нокин но медаз адӟы, мукет сямен яке урокъёсты куспетӥ карисько, яке эшшо мар ке
Семён Бухарин, лымы вылын суредась

Озьы со суредъёссэ 5-7 минут ӵоже лэсьтэ, нокинлы медаз люкеты шуыса сюлмаське.

Вал одӥг учыр, ӵапак Пушкинэз Гончароваен калгыкузы суредаку. Мон пушкам выйи. Кыштыр гинэ суредаськисько, 10 час ӵукна вал кадь. Таре суредаськыны кутскисько но, тыбыр сьӧрам учкисьёсты шӧдӥсько. Учкисько но, ваньмаз укноосын телефонъёсын сыло. Чаляк ӵужонъёсме, лопаткаосме басьтыса, кошки
Семён Бухарин, лымы вылын суредась

Лопаткаен, ӵужонэн сяна, Семён Бухарин газонокосилкаен но, триммерен но суреданы оскалтӥз ини. Суредъёссэ Иж тымет ярдурысь гурезь бамалэ но лэсьтылӥз. 2015-тӥ арын ужъёссэ Le Courrier de Russie француз газетлэн «Сирано» премиеныз пусйизы. Сое «Художник года» номинациын сётӥзы.

Сирано
«Сирано» преми вӧзы басьтэм статуэтка Фото: Анжелика Тихонова ©

Семён Викторовичлэн быгатонлыкез Иван пиезлы но пыӵаз. Со дуно кортъёсын ужаны но ювелирной арбериос лэсьтонъя дизайнерлы дышетскиз. Нош али Ижкарысь техникая кун университетын заочной амалэн «дизайн интерьера» ӧръя тодон-валан люка. Куке но атаез сямен ик, МЧС-ын ужа.

Италмас

2018-тӥ арын тулыспалэ суредась Дэри ёросысь Италмас каргуртысь элькун лицей-интернатэ ужаны выжиз. Отын со озьы ик котырез утялтӥсь луэ. Ваньмон дыръяз суредъёссэ кылдытъя. Пиналъёслэсь но дышетӥсьёслэсь мылкыдзэс ӝутон понна, вазь ӵукна лыктыса, нокин но адӟымтэ дыръя, кыӵе ке сяська яке мукет мар ке суреданы тырше.

Мар, шуисько, мылкыдыд ӧвӧл? Тани мон тонэ суредало уске. Соос серекъяло ини сэре. Монэ суредалод-а, шуо. Ыы, шуисько, малы бон ум. Малы мылкыдыд ӧвӧл? Соос сэре верало ини, тани «кык» пуктӥзы, тышкаськизы, шуо. Мон соослы валэктӥсько но, мынэсьтым уг кылзо соос, шуо, монэ кесясько. Мон собере шуисько, оло, тон ачид янгыш? Ӧд дышеты, ӧд дышеты но, табере ваньзы мед ушъялозы тонэ малпаськод? Озьы уг луы, шуисько
Семён Бухарин, лымы вылын суредась

Пиналъёс Семён Викторовичлэсь верам кылъёссэ пелязы поно. Уго элькун лицей-интернатын соос анай-атайзылэсь люкиськыса уло. Куд-огез солы Семонагай шуыса гинэ вазисько, арлыдо, тодӥсь-валась эш доры сямен бордаз кыстӥсько.

Мон соосын одӥг уровеньын вераськисько. Астэ бадӟым карыса возёд-а мар-а. <…> Уг шуиськы мон соослы, мон озьы-озьы, тынэсьтыд сомында арлы быдӟым но мон озьы быгатӥсько, мон тазьы быгатӥсько, тон пока уд быгатӥськы на, но озьы луэ со улонын, тазьы луэ. <…> Но шудэм потэ тон сяин ик, сием потэ тон сяин ик (кескич серекъя – ред.)
Семён Бухарин, лымы вылын суредась

Туала пиналъёс туж эрикоесь но мыло-кыдоесь, шуэ Семён Викторович, дышетскыны но мылкыдзы вань, сое синйылтыса гинэ вуыны кулэ.

Пока мылкыдзы вань, соосын вырыны кулэ, дышетыны. Учкыса ке но. Мынам дядяе тани, мон шуисько вал, дядяй, кызьы созэ лэсьтыны, кызьы тазэ, нош милям куать нылпиос вал бере, кык братъёс но ньыль нылъёс, со мыным шуэ вал, неку, пие, мыным тонэн вырыны, учкы но дышетскы
Семён Бухарин, лымы вылын суредась

Школа котырез утялтэм сяна, Семён Бухарин пиналъёслы суреданъя кружок нуэ. Со доры 16 пиналъёс ветло. Соосын валче ачиз но дышетске, шуэ.

Та лицейын туж продвинутоесь пиналъёс. Соослэсь выль ӵектонъёссэс но луэ кылзӥськыны. Куддыр кылзӥськиськод, дышетскиськод соослэсь но тани. Кызьы ке ӵошен дышетскиськом: соос мынэсьтым дышетско, мон соослэсь
Семён Бухарин, лымы вылын суредась

Семён Викторович пиналъёсызлэн ужъёсынызы аспӧртэм галерея кылдытӥз ини. Со соосты борддор вылэ суредаськыны дышетӥз.

Семён Бухаринлэн дышетскисьёсызлэн ужъёссы

21 фото

Суредась котькуд нылпилэсь ужзэ тодма. Оло, синъёссэ кыньыса но вералоз, кинлэн кудӥз ужез. Соослэн котькудзылэн ас амалзы, ас сямзы, ас мылкыдзы ук шуыса пусъе.

Таиз ӝынызэ суредаз но озьы кельтӥз. Мон шуисько, Тани, суредэд бӧрдэ ук, возьма тонэ мед быдтод шуыса. Пинал, шуисько, кызьы вордске, суред но озьы ик вордске. Со, шуисько, ӝыныыз потэмын, ӝыныыз потымтэ. Тон, Семён Викторович, оломар но вералод, шуэ (серекъя – ред.)
Семён Бухарин, лымы вылын суредась

Озьы Семён Викторович пиналъёсты чеберез адӟыны, кутскем ужзэс йылаз-пумаз вуттыны дышетэ.

Мон шуисько вань уждэс котьку но чебер лэсьтэ. Мед адӟозы, тӥляд ужды чебер лэсьтэмын шуыса
Семён Бухарин, лымы вылын суредаськись

Шудо адями

Семён Бухарин ассэ туж шудо адямиен лыдъя.

Малы бон шудо уд шуы меда. Тани учкы ай кыӵе шулдыр! Кудӥз ведь висё, ялан керетыса уло, кудӥзлы мар ке но уг тырмы та улонын. Но ваньмыз ведь тон бордысь потэ. Лэсьты ваньзэ ачид. Валан бордын ваньмыз. Яратон бордын
Семён Бухарин, лымы вылын суредась

Ваньмон дыръяз театре ветлыны яратэ. Вань умой пуктэм спектакльёс кельшо, шуэ. Солэн кылъёсызъя, артистъёс но аспӧртэм суредасьёс. Семён Викторович Ижкарысь удмурт театрысь вань артистъёсын тодмо ини. Та дыре Глазкарысь «Парафраз» театрлэн спектакльёсыныз тодматске.

Туж тунсыко. Туж умой артистъёс отын шудо. Сюрес кыдёкын. Мыным руль сьӧрын но ветлыны кельше. Огнам пуксисько но мынӥсько
Семён Бухарин, лымы вылын суредась

Со сяна, матысь эшеныз, театрысь артистэн Кадим Галихановен, Удмуртиысь ошмесъёсты утчаса ветло. Кытын вуэз ческытгес, кытын кезьытгес чаклало.

Милемлы верало, отын-отын сыӵе ошмес шуыса. Ми шутэтскон нуналъёсы кутӥськом но мынӥськом. Зуевы Ключие но, Дэбес пала но, Яр пала но вуылэммы вань ини. Быдэс Удмуртиетӥ ветлӥськом. Пыласькиськом, мараськом, выль адями кадь бертӥськом. Со бадӟым кужым сётэ
Семён Бухарин, лымы вылын суредаськись

Озьыен, меӵ удмуртъёс – со коньдон, кивалтон котыр бергась, бадӟым компаниосын ужась, удыссыя вылӥе ӝутскем адямиос гинэ ӧвӧл. Со калыклэн улоназ ӟеч пытьы кельтэм, лулпушсэс вырӟытэм, ужась, тыршись, кылкутӥсь, адӟем карымон муртъёс. Ӵапак сыӵе ик Семён Бухарин но. 



Наверх
Вниз