Ижкар+6 °C
18 -тӥ коньывуон 2021 Вордӥськон
18+

Тодмо удмурт кырӟасьёс, кудъёссэ одно ик кылзоно

  • 970
  • 0
Ижкар / Удмуртия
Тодмо удмурт кырӟасьёс, кудъёссэ одно ик кылзоно
фото: karaokekontrol.com

Удмурт егитъёслэн кырӟанъя лулчеберетсы огвыллемгес луэ. Но отын но, котькытын сямен, аспӧртэмлыко адямиос вань. Соослы нимысьтыз саклык висъяны луэ. Иворъёсъя «Удмуртия» агентство удмурт кылын кырӟась егит артистъёсын тодматскыны ӵектэ.

1. Богдан Анфиногенов

Богдан — кылбурчи, солэн кылбуръёсаз огдыре 3–4 кылъёс сурасько-пожасько; со литературая калыккуспо премилэн лауреатэз; историк; Россиысь тодосъя академилэн Урал ёзэтысьтыз Историяя, кылъя но литературая Удмурт институтысь аспирант; тодмо кырӟась. Крезьгур удысын но Богдан ассэ пӧртэм сямен возьматэ. Пӧртэм вакытъёсы солэн нимыныз герӟаськемын вал Amiso Wott, Ullapala Boy, Мурӝол Undergroung, «Малыми» проектъёс. Нош нимыз эшшо но паськытгес вӧлмиз «Суперудмурты» кырӟанэзлы луыса. Отын со удмурт калыкез «засиженной юртаысь» потыны ӧтиз.

Огъя учконо ке, троссэ кырӟанъёссэ, оло, ваньзэ но, удмуртлыкен герӟаськем мерлык ӧр висъя. Но 18 аресозяз егит пияш удмуртъёслэн кылынызы но, лулчеберетэнызы но воксё тунсыкъяськымтэ. Сыӵе мылкыдыз УдГУ-ысь историяя факультетэ пырем бераз сайкам.

«Маргарита Гришкиналэсь «Удмурты. Этюды из истории IX—XIX вв.» книгазэ лыдӟем бере, мынам сюлэмам кыӵе ке вӧсь кылдӥз. Книгаын туж трос шугадӟонэн, лулпушлы секыт учыръёсын герӟаськем югдуръёс верамын. Соку мон ас поннам малпай: адямиос Иван Грозный Казанез ас улаз басьтыку бырылӥллям, нош тон кылзэс но уд тодӥськы», — тодаз вае Богдан.

Мурӝол Underground & T.-D.A.B feat. Дыдыкай - Super Удмурты


2. Ladi Sveti

Ladi Sveti — Silent Woo Goore группаын кырӟасьлэн, Светлана Ручкиналэн нимаз проектэз. Группаын Светлана рок амалэн кырӟанъёсты быдэстэ ке, Ladi Sveti — со поп-крезьгур, ненег, яратон сярысь кырӟанъёс.

«Ladi Sveti — со Светӥлэн крезьгурчи но кырӟась устолыкъёссэ (кудъёсыз пӧртэм вакытэ синмаськытӥзы туала лулчеберетын бадӟым инты басьтӥсь Артемий Троицкиез, Марат Гельманэз но Леонид Бурлаковез), Ксения Евсеевалэсь кылбурчи быгатонлыксэ но Дмитрий Якимовлэсь саунпродюссер устолыксэ огазеян», — пусйиз лулчеберет удысэз эскерись Александр Старков.

2015-тӥ арын гужем Светлана «Веръя» нимо макси-синглзэ поттӥз, отчы 6 кырӟанъёсыз пыризы. Куд-огъёссэ соос пӧлысь радио пыр кылзыны луэ, Ижкарысь ӟуч кылын ужасьёсысьтыз но.

Ladi Sveti «Выль кен»


3. Ксения Ахметханова

Ксения Ахметханова — йӧно нылаш. Со история но политология удысъёсын ӧнерчи, кылем арын Удмурт кун университетэз йылпумъяз, нош али Удмуртиысь Кун Кенешын ужа. Концертъёс но кырӟанъёс бордын ужан — тунсыкъяськон гинэ, шуэ Ксения. Калыке шер пота ке но, нылаш удмурт сцена вылын ас интызэ шедьтӥз. Тодманы луоно аспӧртэмлыко куараез, ас сяменыз кырӟамез но сабырлы, но со вакытэ ик лулысь-сюлмысь быдэстэмез висъяло сое мукет кырӟасьёслэсь.

Ксения вордскиз но будӥз Башкортостанын. Сцена вылэ нырысьсэ 2 аресказ семья ансамбленызы потӥз. Кырӟаны но, крезьгуро инструментъёсын шудыны но нокытын ӧз дышетскы, но пичи дырысеныз кунгож сьӧрысь англи кылын кырӟанъёсын тунсыкъяськиз, со ик солэсь крезьгур шӧдонзэ но кылдытӥз. Али солэн яратоно кырӟасьёсыз луо Sia, Ed Sheeran, Sam Smith но One republic группа. Ксения соослэсь кырӟанъёссэс удмурт кылэ берыктэ но каверъёс кылдытэ.

«Туж потэ выль, ас кырӟанме, но со выллем стилен. Валасько, со ваньмызлы уз кельшы, сыӵе кырӟанъёсын мон аслым ним но уг лэсьты. Но мон азьланьто кырӟаны сое, мар мыным кельше, собере учком. Бадӟым ужпумъёс со ласянь мон уг пуктӥськы», — шуэ нылаш.

Гужем пумын Ксениялэн нырысетӥ клипез потӥз. Со удмурт вотэсын пукисьёс пӧлын туж вӧлмемын.

Ксения Ахметханова - Тонэ Веръян


4. Иван Белослудцев

Кез Ёросысь Иван Белослудцев Удмурт кун университетэ дышетскыны пырем бераз ик ас факультетаз «кизили» луиз. Кылбуръёс но крезьгур гожъя, ас кырӟанъёссэ ас шудэмез улсын ик быдэстэ. Иван тросэзлы (тужгес но нылъёслы) тодазы кылиз яратон сярысь балладаосыныз — ненег но небыт кырӟанъёсыныз. Куд-огъёсыз соос пӧлысь «Пузкар» удмурт фильмлы саундтрекъёс луизы. Ӵапак Иванлэн куараеныз ик кырӟаз фильмысь валтӥсь герой но.

2012-тӥ арын Белослудцев но солэн «4 чебер пиос» группаез Удмуртилэсь данзэ Испаниын калыккуспо конкурсын — пичи калыкъёслэн Liet International Евровидениязы утизы. Пиос 9-тӥ инты басьтӥзы. 2015-тӥ арын соослэн Финляндиын пичияк гастрольёссы вал. Учкисьёс соосты туж шуныт пумитазы.

2015-тӥ арын сӥзьыл Иван армие кошкиз, нош кемалась ик ӧвӧл дораз бертӥз. Озьыен, матысь дыре выль кырӟанъёссэ возьмано.

Иван БЕЛОСЛУДЦЕВ - «Тау тыныд»


5. Анастасия Иванова

Быдэ вуымтэ вакытлэн романтикаез, дӥсьтӥсь метафораос, удмурт крезьгурлы аспӧртэмлыко луись поп но рэп ӧръёсты герӟан. Кырӟась, кылбурчи но крезьгурчи Анастасия Иванова кӧня ке ар талэсь азьло тодмо луиз. Соку Алнаш ёросысь школаын дышетске вал ай. Со ас понназ гитараен шудыны, видео гожъяны дышетскиз но гожтэмъёссэ вотэсэ поттаз. Соку сое Ижкарысь продюссеръёс синйылтӥзы, кӧня ке кырӟанъёссэ гожтыны ӵектӥзы. Озьы соос удмурт радиоын шудыны кутскизы.

Туннэ нуналлы Анастасия УдГУ-ын 2-тӥ курсын дышетске. Дышетсконэн сэрен кырӟаны дырыз уггес кыльы ни шуэ. Эшшо туж востэм но ас кужымезлы оскисьтэм шуыса ватса. Озьы ке но, Настя азьланяз улонзэ крезьгурен герӟалоз шуыса малпанэз уг палэнты. Но со понна «чебер, шонер но ӧнерлыко» кырӟаны дышетскемез потэ.

«Удмурт эстрадаын шоро-куспо кырӟасьёс (нош мон асме ӵапак сыӵеос пӧлы пыртӥсько) озьы но трос», — валэктэ нылаш.

 



Наверх
Вниз