100 лет государственности Удмуртии
Ижкар+10 °C
25 -тӥ куартолэзь 2020 Вордӥськон
16+

Куиськон — удмурт калыклэн тусыз

  • 1137
  • 0
Ижкар / Удмуртия
Куиськон — удмурт калыклэн тусыз
Фото: Михаил Шустов

Туала улонын калыкын паськыт вӧлмемын киужен тунсыкъяськон. Кин ке керттӥське, кин ке вуриське, кин ке суредаське, майтал лэсьтэ. Нош пӧлазы вашкала удмуртъёслэн киуженызы — куиськонэн — тунсыкъяськисьёс но вань. Туннэ соин тросгес выро Чеберлыко киужъя юртъёсын, Кибашлыослэн юртъёсазы. Но вань доразы ужасьёс но.

Куиськонлэн аспӧртэмлыкез но шаерысьтымы удмуртъёслэн куиськон амалъёссы сярысь иворъёсъя «Удмуртия» агентство Удмурт Элькунысь Чеберлыко киужъёсъя юртысь ӧнерчилэсь Людмила Буяновалэсь тодӥз.

Людмила Буянова Чеберлыко киужъёсъя элькун юртысь удмурт куиськонъя ёзэтэн кивалтэ. Отын ньыль адями ужа. Соос пӧртэм ӵушконъёс, шобретъёс но мукет арбериос куо. Со сяна мылкыд карисьёсты дышето на


Уйпал, шор но лымшор удмуртъёслэн куиськон аспӧртэмлыкъёссы

Удмуртъёсты вераськетсыя уйпал, шор, лымшор туркымъёслы (группаослы) люко. Сое чакланы луэ дӥськутсыя, улон котырзыя но. Котькудӥзлэн аслаз тусыз, аслаз буёлэз, аслаз пужыез вань.

«Уйпал удмуртъёс ӟуч калыклы матын уло вал, — шуэ Буянова. — Соин ик соослэсь лулчеберетсэс учким ке, соослэн тӧдьыен-гордэн басмаоссы мыно».

Сыӵе буёлэн дӥськутсы но, ӵушконъёссы но, коверъёссы но быдэстэмын. Пужыоссы но ӟуч шӧмъемгес адӟиськиллям. Но удмуртъёс кӧня ке сьӧд пужыос но пукто вылэм. Сьӧд буёл уго асьмелэн музъемез возьматэ. Нош удмурт калык котьку ужаса улӥз.

Шор удмуртъёслэн, Людмила Буяновалэн кылъёсызъя, туж тунсыко лулчеберетсы. Отын купечъёслэн ветлэмзы зол шӧдӥськем. Пужыоссы но, буёлъёссы но мукетэсьгес. Дӥсьсыя но валаны луэ, со шор удмуртъёс шуыса. Вандэмез (кроез) тунсыко. Соос куиськонъя пӧртэм амалъёсты артэ пукто. Пужыоссы куэмын но, пужыятэмын но луо.

Нош лымшор удмуртъёслэн киужъёсысьтызы тюрк калыкъёслэсь асэстэмъёсты адӟыны луэ.

«Учкиськом ке, лымшор удмуртъёслэн тюрк калыклы туж тупась коверъёссы. Озьы ик дӥськутын но со амал кутӥське: пӧртэм турлы буёлъёсты одӥг арберие пыртыса. Соя тодмаськом ини, со лымшор удмуртъёслэн арбериоссы шуыса», — валэктэ удмурт куиськонъя ёзэтэн кивалтӥсь.

Фото: Михаил Шустов
Удмуртъёслэн дӥсьёссылэн аспӧртэмлыкез                                                                         Фото: Михаил Шустов © udmurt.media

Вашкала куиськон сямъёс

Куд-ог вашкала киужъёс вылысь чукъёсты адӟыны луэ.

«Вашкала кибашлыос пужыез асьме сямен кагаз вылэ уг гожто вал, уг суредало — соослэн кагаззы но, соин вырыны дырзы но ӧй вал. Соослэн ваньмыз азязы. Азьысьтызы пужыез учкыса, соос асьсэлэсь, кӧня ке пӧртэмгес воштыса, выль пужы пукто. Нош со пужы мукет кибашлылы кельше ке, со лыктэ но юа солэсь: «Яра-а мыным тынэсьтыд пужыдэ аслым но пуктыны? Туж кельшиз». «Я, пукты, но тон мыным со понна мар ке вай». Мукет кибашлы солы сётэ вал яке кӧня ке сӥньыс, яке кӧня ке пичияк басма, базар басма. Ӵапак со пужы борды ик вурӟо вал, пукто вал отчы (чукез — ред.). Кӧня чук, сомында пол со доры лыктӥзы, сомында пол кельшиз солэн пужыез», — валэктэ Буянова.

Фото: Михаил Шустов
Сӥньысъёссэс асьсэос буяло вал                                                                                           Фото: Михаил Шустов © udmurt.media

Вашкала дыръя пӧртэм буё сӥньысъёс ӧй вал. Озьы ке но, куиськисьёс амал шедьтылӥзы — кибашлыос соосты асьсэос буяллязы. Людмила Буяновалэн верамезъя, вашкала кибышлыос сӥньысэз турын-куарен ӵемгес буяло вылэм.

«Лыз буёл — со ваемын гинэ, лыз буёлъёс ӧй вал. Со Иранысь, Индиысь, Египетысь — со палась дуннеысь ваемын со буёл луэ. Нош асьмелэн тани гордзэ асьсэос буяло вал. Соин ик соос тодо вал, кудӥз пеймытгес луоз, кудӥз югытгес. Кемагес возид ке. Вашкала басмаос, тужгес но гордэз — соос ваньмыз бездо. Соос рос-прос мисьтаськыны тыршо вал толалтэ, куке тани кезьыт куазь луэ ке. Малы ке шуоно кезьыт дыръя миськем арбериез ошиськод ке, со соку ик кынме, ву вияса уг кылльы, буёл интыяз кыле», — вашкалосмылэсь лушкемвизьзэс шарая Буянова.

Удмуртъёс кужъёсазы пӧртэм пужыос пукто вал. Солэн но аслаз пуштросэз, валатонэз вань.

Котькуд калык, вашкала калык, пужыез байлык мед сётоз, умой кароз, музъемлэсь ӟечлыксэ будэтоз шуыса пуктэ вал. Со пужызы урод синлэсь, аламаезлэсь утет луэ
Чеберлыко киужъёсъя элькун юртысь удмурт куиськонъя ёзэтэн кивалтӥсь Людмила Буянова

Туала куиськон

Чеберлыко киужъёсъя элькун юртысь удмурт куиськонъя ёзэтын туннэ ӟуч станокен куисько. Со ужез капчиятонэн гинэ герӟаськемын. Удмуртъёслэн станоксы туж бадӟым, солы вӧл-вӧл инты кулэ. Людмила Буяновалэн верамезъя, со станокез ялан кесяса-бичаса ужаны уг луы. Соин ик сое одӥг интые пукто ке вал, отын ик со сылэ вылэм ини. Со ласянь ӟуч станокен каньылгес. Ёзэтын ужасьёс соин Гербер шулдыръяськонъёсы но потало. Туннэ озьы ик  мукет сӥньысъёс но кутӥсько.

«Вашкала кадь сӥньысъёс ӧвӧл. Инъетэ мынэ етӥн-лавсан, сэре вискоза сӥньыс октӥськиськом. Курисьёс луо ке, хлопок сӥньыс но утчаськом», — вера Людмила Буянова.

Удмуртъёслэн куиськон аспӧртэмлыкъёссы


Ижкарын Куиськонъя Росси школа усьтон сярысь

Удмуртиысь ваньмаз сямен ёросъёсын Кибашлыослэн юртъёссы ужало. Ваньмаз куиськон ёзэтъёс вань. Мылкыд карисьёс понна отын дышетонъёс но радъяло. Нош ӝоген та уж эшшо паськытгес луыны быгатоз.

Ми воксё но куиськонъя Росси школа усьтыны малпаськом, малы ке шуоно кинлэн дышетскемез потэ, соос туж трос калык. Быдэс Россиысь жингырто, луоз-а тӥ доры лыктыны шуыса юало
Чеберлыко киужъёсъя элькун юртысь удмурт куиськонъя ёзэтэн кивалтӥсь Людмила Буянова

Школаез усьтыны кылдӥз ке, отчы дышетӥсьёс но, дышетскисьёс но быдэс кунысь вуылозы.

«Соос дасесь татчы вуыны. Кемалась ик ӧвӧл тани конференци ортчытӥм («Дома ремёсел — новые культурные институции» тодосъя но ужъя Росси конференци Удмуртиын шуркынмонэ ортчиз - ред.). Отын вераськыса, валаськом, кӧня ке вань сыӵе ӧнерчиос, но ми коньдэт улсын ужаськом бере, милям со уж юнгес пуктэмын. Чеберлык понна гинэ ми ум ужаське. Милям мукет ужпуммы. Экспедицие ветлӥськом, мар эшшо кылиз на, сое бичаськом. Эскерыса, ми ӧнерчиос бере, сое выльысь лэсьтыны но быгатӥськом. Археологъёслы тани технологизэ шуг валаны, соос вераны со сярысь быгато. Но ачид ке уд лэсьтӥськы, тон сое уд валаськы, малы ке шуоно котькуд ужлэн аслаз кыӵе ке но аспӧртэмлыкез вань, малы со озьы пуктэмын. Соин ми, шонер гожъямын мед луоз шуыса, тодосчиосын ӵошен ужаськом. Нош куинетӥ ужпуммы — калыклы сое сётыны, берыктыны. Дышетыны соосыз, кинлэн дышетскемез потэ», — вера куиськись.

Удмурт нылкышноослэн вашкала дӥськутсы Волга котырысь улосын одӥгез тужгес секыт кылдытэмез но яркытэз лыдъяське вал. Куиськонын удмуртъёс вылӥ устолык басьтӥзы.

«Асьмелэн пӧртэм амалъёсмы вань, ваньмыныз соосын вашкалаос ужаны быгато вал. Многоремизной амалэн туж зол быгато вал куыны. Али та амалэз ми ӝутыны турттӥськом. Со туж чебер басма пӧрме. Фабрикаын, валамон ини, сое каньылгес лэсьто, но киын лэсьтэмез со туж тунсыко луэ ук. Соин ми, азьло но удмуртъёсыз туж зол куиськисьёс шуо вал бере, тыршиськом, куиськон Удмуртилэн брендэз мед луоз шуыса. Милемыз куиськонъя мед тодмалозы шуыса. Соин ми куиськонъя школа но тыршиськом татын усьтыны одно ик. Ми доры мед лыктозы, ми асьмелэсь вань тодэммес соослы мед быгатом сётыны», — пусйиз Людмила Буянова.

Удмурт куиськонъя ёзэтлы Ижкарысь 19-тӥ даур кутсконын пуктэм Лятушевичлэсь юртсэ сётӥзы. Туннэ отын тупатъян ужъёс мыно. Азьланяз со юртын ик куиськонъя Росси школаез радъяны чаклало.

Лятушевичлэн юртэз — мезонинэн одӥг этажъем из юрт — пуктэмын вал 1807-тӥ арын. Дудин архитектор сое кылдытӥз Лятушевич протоиерей понна. Интыяськемын Вадим Сивков ульчаын. Юртлэн архитектураез 19-тӥ даурысь ӟуч классикалы тупа. Но 1925-тӥ арын коркалэн уйпал но шунды ӝужан палъёсаз куинь укноем ватсэтъёс пуктӥзы, со фасадлэсь симметризэ тӥяз.
Фото: Михаил Шустов
Чеберлыко киужъёсъя юртын кибашлыослэн тужгес усто ужъёссы возьматэмын          Фото: Михаил Шустов © udmurt.media

«Дышетскисез огназэ кельтыны уг луы. Со школаын сямен, математикая но ӟуч кылъя гуртэ уж басьтыса шуэмъя, куиськыны уз дышы, сое весь чаклано. Ужез шуг шуыса вераны уг луы. Валтӥсез куиськонын — шонер со лыдӟемын мед луоз. Кӧня кулэ сӥньыс, кыӵе буёл — сое ваньзэ лыдӟоно. Эшшо сӥньысъёсты юнматон. Кызьы шуо «кызьы валэз кыткод, озьы ик мынод». Озьы ик куиськон — основаез шонер лыдӟыса, котькуд сӥньысэз интыяз пуктыса, соку гинэ тынад шонер арбериосыд пӧрмозы», — валэктэ кибашлы.

Вераны кулэ, школаын удмурт куиськонлы гинэ уз дышетэ — пӧртэм выжы калыкъёслэсь амалъёссэс возьматозы. Людмила Буяновалэн верамезъя, отын туж бадӟым уж луоз.

Кыӵе секретъёсмы вань, ваньзэ ми вераськом. Куд-огъёсыз конкурентъёсты асьтэлы будэтӥськоды шуыса верало. Кыӵе конкурент. Тани ми ньыль кузя ужаськом. Одӥг пужыез кутӥськом. Одӥг арбери ке но, озьы но мукет шӧмын луэ. Малы ке шуоно киын лэсьтэм уж, солэн лулыз вань. Малы ке шуоно со быдэсак киын лэсьтэмын. Кибашлы пуке, со уго сое малпаськыса ужа, аслэсьтыз сюлэм шунытсэ пичияк отчы кельтэ
Чеберлыко киужъёсъя элькун юртысь удмурт куиськонъя ёзэтэн кивалтӥсь Людмила Буянова

Киын лэсьтэм кузьымъёс, пӧртэм арбериос, дӥськут туннэ туж вылӥ дунъясько. Нош отчы вашкалаез ватсаське на ке, со выжыосмес тодэ вайыны, аспӧртэмлыкмес, йылолъёсмес утьыны луонлык сётэ.

Куэм киужъёслэн чеберлыксы

7 фото



Наверх
Вниз