100 лет государственности Удмуртии
Ижкар+12 °C
1 -тӥ инвожо 2020 Вордӥськон
16+

Гербер Москваын: вашкала сямъёс но туала технологиос

  • 1021
  • 0
Москва / Россия
Гербер Москваын: вашкала сямъёс но туала технологиос
Туспуктэм: Майя Бывальцева

1-тӥ пӧсьтолэзе Москваысь «Эрмитаж» садын куинетӥ ползэ ни удмуртъёслэн Гербер праздниксы ортчиз. Таяз ардэ солэн валтӥсь мереткылъёсыз вал — «Лэсьтэмын Удмуртиын» но «Тод Удмуртиез Москваысь потатэк». Соослэсь пуштроссэс быдэсак усьтӥзы 10 площадкаос — «Шӧмъя Удмуртиез», «Тодматскы Удмуртиен», «Кылзы Удмуртиез», «Удмуртилэн данлыкез», «Лэсьтэмын Удмуртиын», «усьты Удмуртиез», «Йӧтскылы Удмуртия борды», «Удмуртиез тодад кельты», «Шуд Удмуртиен», «Удмуртиысь салам».

Удмурт Элькунлэн тӧроезлэн Росси азьмурт бордын ялан ужась ыстэм муртэзлэсь ужоскетъёссэ огдырлы быдэсъясь Михаил Хомич верамъя, Гербере 10 сюрслэсь трос адями вуылӥз.

Иворъёсъя «Удмуртия» агентство праздникысь текстэн трансляция нуиз

Удмуртарняе, 30-тӥ пӧсьтолэзе, Москваын жаль-жаль зориз, гудыръяз но чилекъяз. Но кӧснуналэ куазь удалтӥз — быдэс нуналскын одӥг пол гинэ вакчи дыр куспын кӧня ке зор усиз, но со чаклам радлыкез ӧз тӥя.

Азьвыл аръёсы сямен ик, трос калык люкаськиз Калашниковлэн автоматэныз туспуктэм лэсьтыны, гур азьын пыжем перепечез верьяны. Таяз радэ уно тунсыкъяськисьёс вал Пётр Чайковскийлэн музей-юртэзлэн стендэз дорын. Ужъюрт но нылпиослэн «Кванториум» технопарксы валче кылдытэм ӵектосъёсынызы тодматӥзы — музеетӥ виртуальной тур но «Чайковский. LIVE» ватсэт.

Юмшаса жадемъёс котсэс тырыны быгатӥзы фермеръёс дорын. Можга ёросысь фермерлэсь Галина Белозёровалэсь гинэ 200 килограммлэсь трос пельняньзэ басьтӥллям!

Куноос Удмуртиын поттэм вузъёсын, киужъёсын но книгаосын тодматскизы, ужбергатӥсьёсын но нимо-дано спортсменъёсын пумиськизы, удмурт кылэз дышетӥзы, шудӥзы но эктӥзы, кырӟанъёсты кылзӥзы. Оглом вераса, Москваын улӥсьёслы Удмуртиез котыр ласянь возьматӥзы.

Москваын Гербер-2017 шулдыръяськон ортчиз

37 фото

«Удмуртъёс туж дунъяло но утё асьсэлэсь лулчеберетсэс, йылолъёссэс. Тау Москвалэн кивалтэтэзлы, инты сётэмез понна. Туж кулэ, Москваын но, быдэс Россиын но улӥсьёс мед тодозы шуыса, кыӵе узыр но пӧртэмлыко асьмелэн кунмы — мед тодозы котькуд улосвыллэсь аспӧртэмлыксэ, лулчеберетсэ, йылолъёссэ, маин ми данъяськиськомы», — вераз журналистъёслы Удмуртилэн тӧроезлэсь ужзэ огдырлы быдэсъясь Александр Бречалов.

Со пусйиз, Удмуртиын Гербер одӥгез валтӥсез праздник луэ, туж умой, сое Москваын но ортчытон сям кылдӥз шуыса.

«Куке вераськод — Ижкар, Удмуртия, малпало со Калашниковлэн автоматэз но оборонно-промышленной огъетысь кыӵе мукет темаос. Но Удмуртия — со туж бадӟым луонлыкъёсын, туж тунсыко, аспӧртэм интывыл. Отын вань трос сыӵеез, мае милям возьматэммы потэ Москваын но, Россиын но, дуннеын но. Ми озьы ик лэсьтомы. <…> Удмуртия — со быдэс дуннелэн люкетэз. Соин но ми татын. Но со дыре ик уг яра удмуртъёслэсь, поръёслэсь, бесерманъёслэсь - вашкала дырысен та музъем вылын улӥсь калыкъёслэсь, дауръёсын кылдэм йылолъёссэс тӥяны. Соин ик та ӧръя ужез, калыкъёслэсь кусыпъёссэс юнматон ласянь, ми ялан кужмоятомы», — пусйиз Бречалов.

Шулдыръяськонэз сӥё-дано усьтон ужрадын Москвалэн кивалтэтысьтыз йӧскалык политикая но улосвыл кусыпъёсъя департаментлэн кивалтӥсез Виталий Сучков пусйиз, таӵе праздникъёсын «ми эшшо матэгес луиськомы. Пӧртэм калыко, вӧсьлыко кунмы понна валтӥсез — тупаса улон, эшъяськон». Озьы ик со Москвалэн мэрезлэсь Сергей Собянинлэсь ӟечкылан но сӥзён кылъёссэ вераз.

«Эрмитаж» садэ трос гинэ калык люкаськиз. Валамон, тросэз соос Удмуртиын вордскем муртъёс. Соос пӧлын Шаркан ёросын будэм Россиысь тодос удысысь дано ужась, педагогика тодосъя доктор, профессор Глафира Никольская. Со трос аръёс ӵоже ини Москваын улэ, али М. С. Щепкин нимо театр училищеын (институтын) ӟуч кылъя дышетэ.

«Татын, Москваын, самой дуно интые, дыр, — удмурт калык инты. Гербер — та нимысь ужрад, мон малпасько. Татчы удмуртъёс но, ӟучьёс но, кин куке но Удмуртиын улӥз, ваньзы соос татчы люкасько, туж умоесь пумиськонъёс кылдо. Шумпотыса лыктӥсько, адӟо ини удмурт калыкме шуыса — эшъёсме, тодмоосме. Туж чебер мылкыд пумиськиськомы», — вераз Глафира Никольская.

Бен, Москваын ортчись Герберлэсь пуштроссэ вашкала праздникен уд ӵошаты ни. Татын со улосвылэн тодматон фестиваль выллем луэ. Но отын номыр уродэз ӧвӧл, лыдъя Глафира Николаевна.

«Умой, дыр, соин — трос калыкез люкало. Тани Башкириысь удмуртъёс но, пе, лыктэмын (соос 30 кузя вуизы — ред.), озьыен, соосты но кыске ук татчы. Чуваш огазеяськонысь но ужрадъёсамы лыкто, комиос, коми-пермякъёс. Татын финно-угор калыкъёсын герӟаськыса уж ортчытӥськом ке, мон солы но шумпотӥсько, мылы ке шуоно финн-угор калык со одӥг семья, кусып возьыны тыршиськом», — пусйиз профессор.

Ижкарысь лыктэммес тодыса, тау карон кылъёссэс куноос веразы милемлы но. Туж, пе, шумпотто лякытэн вазиськись, пальышась адямиос. «Москвае адямиос коньдон поттыны гинэ лыкто, ялан ужало, ог-огзэс уг адӟо, нош татын сыӵе каньыл, ваньмыз пальпото», — вераз одӥгез кышномурт.

Куд-огез веразы зэмос удмурт кырӟанъёс ӧзгес тырме шуыса, фольклор коллективъёсты тросгес кылэмзы потэ вылэм. Но таяз радэ егит кырӟасьёс но коллективъёс мынэмын вал, уноез соос поп но рок ӧръёсъя кырӟанъёсты быдэстӥзы.

Радъясьёс оскытӥзы, Гербер Москваын вуоно арын но ортчоз шуыса. Со сяна. Санкт-Петербургын бадӟым праздник радъяны чакланъёс вань.



Наверх
Вниз