Ижкар+12 °C
10 -тӥ куартолэзь 2021 Вордӥськон
18+

Наталья Чиркова: калык сярысь тодэмед потэ ке, учкы солэсь эктонъёссэ

  • 13060
  • 0
Ижкар / Удмуртия
Наталья Чиркова: калык сярысь тодэмед потэ ке, учкы солэсь эктонъёссэ
Туспуктэм: Григорий Фомин

Арнянуналэ, 29-тӥ оштолэзе, Эктонлэн калыккуспо нуналэз пусйиське. Солы сӥзьыса, ивортодэтъя «Удмуртия» агентстволэн корреспондентэз Калык эктонъя «Чебеляй» студилэн кивалтӥсеныз Наталья Чирковаен но Ижкарысь армян калык эктонъя «Гарни» ансамбльлэн кивалтӥсеныз Лилит Трузянэн пумиськылӥз но тодӥз, кыӵе инты басьтэ эктон калыклэн лулчеберетаз но кызьы йӧслыклэсь сямзэ эктон пыр тодоно.

«Яхрушта» — лулын кужмоослэн эктонзы

«Гарни» армян коллективлэн кивалтӥсез Лилит Трузян пусъе, котькуд калыклэн вань аслаз выросъёсыз. Кавказлэсь кыдёкын улӥсь калыкъёс понна, кылсярысь, армян, азербайджан но грузин эктонъёс одӥг кадь пото. Но зэмзэ соос туж пӧртэмесь, шуэ Лилит. Армянъёслэн, шуом, висъясько чабылон эктонъёссы.

Армян эктӥсьёслэн киоссэс ваче шуккемзы — со ожмаськон тӥрлыклэн имитациез. Нош чабонъёс — ожмаськон тирлыкъёслэн ваче шуккиськемзылэн чузъяськемез
Лилит Трузян, Ижкарысь «Гарни» армян коллективлэн кивалтӥсез

Лилит Трузян верамъя, армян калыклэн историысьтыз секыт югдуръёс «Ярхушта» эктонын адӟисько. Азьвыл, куке вашкала выжыоссылы ас музъемзы но осконзы понна ожмаськоно луиз, та эктон лулэз ӝутыны юрттӥз. Дауръёс ортчемъя эктон чик ӧз воштӥськы шуыны луэ.

«Ярхушта» — со армянъёслэн вашкала калык эктонзы, кудӥз ожмаськонэз возьматэ. Сое ожмаськон азьын мылкыдэз ӝутон понна но ожмаськон бере вормон эктонэз кадь быдэстыло вал. <…> «Ярхушта» — со лулын кужмоослэн эктонзы
Лилит Трузян, Ижкарысь «Гарни» армян коллективлэн кивалтӥсез

Азьвыл «Ярхуштаез» воргоронъёс гинэ экто вылэм: йӧскалык дӥськутэн — армян таразэн — но ожмаськон тӥрлыкен. Али «Гарни» коллективын пиос тырмымтэен нылъёсты но ватсазы, но со эктонлэсь огъя пуштроссэ валаны чик уг люкеты. Коллективын ваньмыз куинь группаос экто — студентъёс, пиналъёс но покчиос. Огъя лыдзы ог 40 адями луэ.

«Гарни» ансамбль «Ярхушта» эктонэз возьматэ


Улонын кепырась удмуртъёс эктонын туж дӥсьтӥсесь луо

Наталья Чиркова верамъя, калык эктон — со калыклэн сямыз но лулпушэз. Со пыр йӧслыклэсь историзэ но философизэ тодыны луэ.

Ӵапак вашкала калык эктон — со сям, со лулпуш. Кырӟан сярысь верало, со лулпуш шуыса. Озьы ик эктон но. Ваньмыз ӵошен — крезьгур, эктон но кырӟан — со калыклэн лулыз
Наталья Чиркова, Калык эктонъя «Чебеляй» студилэн кивалтӥсез

Финн-угор эктонъёсты ӵошатыса, валамон, эктон лексикаез отын пӧртэм шуыса. Кылсярысь, мадьяр эктонъёсын валтӥсь луо воргоронъёс. Нылкышноос вань ке но, ӧвӧл ке но ярам, шуэ Наталья Чиркова.

Отын соослэн кышномуртъёссы салатын укроп кадь: вань ке — умой, ӧвӧл ке но — ярам. Улонын но соосты уд чакла. Нош пиос шурдытымон экто, кыӵе соос тэтчало
Наталья Чиркова, Калык эктонъя «Чебеляй» студилэн кивалтӥсез

«Чебеляйлэн» кивалтӥсезлэн кылъёсызъя, улонын кепырась удмуртъёс эктыны кутско ке, туж дӥсьтӥсесь луо. Сое котькуд шулдыръяськонын но чаклано.

Чаклалэ ай, тани гурт праздник — сюан. Ваньзы экто, но котьку сюроз одӥг, кык яке тросгес нылкышноос, солэн пушказ (эктыны потэмез шӧдӥське — ред.), но со удмурт сям — ӧтьытозязы со уз поты (эктыны — ред.). Тани сое ӧтизы, но со кепыра, нош пушказ ваньмыз бугыръяське. Куке сое китӥз кыско ни — «ой, я иське, мыно-а, мар-а». И как кутскоз ук эктыны!
Наталья Чиркова, Калык эктонъя «Чебеляй» студилэн кивалтӥсез

Эшшо одӥгез удмурт сям, кудӥз калык эктонъёсын адӟиське — асьме калык дышемын ваньмыз валамон мед луоз шуыса. Озьы, кӧня адями эктэ, соя ик калык эктонъёслы ним сётӥське: одӥг адями — «Оген эктон», тямыс адями —«Тямысэн эктон». Нялтас вераса, одӥг эктон мукетызлы пӧрмыны быгатэ.

Кылсярысь, кыӵе ке праздник, ваньзы котыр сыло, нош одӥгез мар ке эктэ. Ваньзы чабозы но шулалозы солы. Со луоз ӵапак импровизационной «Оген эктон». Тӥ султӥды, эктӥды, ӧтиды монэ. Кӧня ке дыр ми ӵошен эктӥськом — со «Кыкен эктон» луоз ни. Собере тӥ круге султӥськоды, мон огнам эктыны кутскисько — нош ик «Оген эктон»
Наталья Чиркова, Калык эктонъя «Чебеляй» студилэн кивалтӥсез

Жаляса верано, туннэ нуналлы тодмо ӧвӧл ни, кыӵе йылолъёс дыръя но кыӵе нуналъёсы созэ яке мукетсэ эктонэз быдэстоно, шуэ Наталья Чиркова. Но удмурт хореографъёс тодо валтӥсь фигураосты но соослэсь радлыксэс. Озьы ик эктонлэн вордӥськем интыез сярысь ивортодэт утиськиз. Кылсярысь, Татарстанысь Огырчи ёросысь Варклед-Бӧдья гуртысь «Тямысэн эктон» потэмын, Пичи Пурга ёросысь Брангуртысь — «Ньылен эктон», нош «Чебеляй» студилэн «Бытыр-бытыр» эктонэз Дэри ёросысь Подшивал гуртысь кырӟанлэн туала аранжировкаез улсын кылдытэмын.

«Чебеляй» студия «Бытыр-Бытыр» удмурт эктонэз возьматэ


Калык эктонъя «Чебеляй» студия сярысь

Огъя верано ке, «Чебеляй» студия Ижкарысь Кузебай Герд нимо гимназиын 2001-тӥ арын кылдытэмын. Али отын 100-лэсь трос студентъёс, бадӟым, шор но покчи классъёсын дышетскисьёс экто. Репертуаразы удмурт, карел, венгер, финн эктонъёс вань.

Калыккуспо фестивале нырысьсэ ветлыкуз ик — 2002-тӥ арын Одессае — нырысетӥ степенё лауреат луиз. Соку, 15 ар талэсь азьвыл, туж бурдъясь кылъёсты кылыны кылдӥз, кудъёсыз валан сётӥзы, студилэн ужез пайдаё но шонер шуыса, вера Наталья Чиркова.

Мон доры воргорон лыктӥз, нимзэ но кытысь луэмзэ вераз. Мон уг тодӥськы ни, кызьы нимыз, но кытысь со. Тодӥсько, жюри шуыса. <…> И со мыным шуэ: «Одӥг номерды куспын мон калыктылэсь вань историзэ но философизэ валай. Тау». Со кыӵе ке, но шуак вал. <…> Со вал сыӵе толчок, ми ваньзэ шонер лэсьтӥськом шуыса
Наталья Чиркова, Калык эктонъя «Чебеляй» студилэн кивалтӥсез

Наталья Чиркова «Чебеляйысь» пиналъёссэ сюлмынызы эктыны дышетэ. Соин но, дыр, палэнысь учкисьёс коллективлы ӵемысь паймо. Кылем арын Карелиысь калык эктонъя «Крууга» коллективлэн котырес лыдпусаз удмурт эктӥсьёслы зал пумтэм-йылтэм чабиз. Бӧрысь Наталья Чирковалы элькунысь лулчеберетъя министрлэсь мылкыдзэ веразы: кӧня удмуртъёсты адӟи, но таӵе кавказ темпераментэн эктӥсьёссэ — нырысьсэ.

Хореограф верамъя, вашкала калык эктонъя коллективъёс Удмуртиын тросгес мед луысалзы, эктонэз но лулчеберетэз егитъёс мед азинтысалзы.

Мед калык эктон асьме пиналъёсын азьланьтӥськысал, мед соос яратысалзы но данъяськысалзы, мед соос тодысалзы, соос удмуртъёс, соос классноесь шуыса, ми чебер но дано калык — узыр лулчеберетэн но паймымон философиен. Со дыре ик, ми туж востэмесь
Наталья Чиркова, Калык эктонъя «Чебеляй» студилэн кивалтӥсез

Со аслэсьтыз малпанзэ-сӥзёнзэ вераз: удмуртъёс асьсэдыз удмуртэн мед шӧдозы, нош Удмуртиысь мукет калыкъёс мед данъяськозы, сыӵе калыкен артэ уло шуыса.



Наверх
Вниз