Ижкар+1 °C
13 -тӥ оштолэзь 2021 Пуксён
18+

Таксидермист Сергей Евсеев: ужелэн вачепумитлыкез — пӧйшурез быдтыса, сое выльысь луло кадь лэсьтон

  • 14020
  • 0
Ижкар / Удмуртия
Таксидермист Сергей Евсеев: ужелэн вачепумитлыкез — пӧйшурез быдтыса, сое выльысь луло кадь лэсьтон
Туспуктэм: Никита Иванов

18-тӥ куартолэзе быдэс дунне Музейёслэсь калыккуспо нуналзэс пусъе. Солы сӥзьыса, Удмуртиысь Кузебай Герд нимо йӧскалык музейысь таксидермист — пӧйшур сульдэръёс лэсьтӥсь ӧнерчи — Сергей Евсеев «Удмуртилэн инкуазез» адӟытонэ эшшо одӥг экспозиция дася. Ивортодэтъя «Удмуртия» агентство таксидермистлэн мастерскояз вуылӥз но ас синмын адӟиз, мар ватсаськоз адӟытонэ, кызьы лэсьтӥське пӧйшурлэн сульдэрез но малы со кулэ тодослы.

Луло кадь кельтон понна — быдтоно

Сергей Евсеевлэн выль ужез — кион кар. Ӧнерчилэн тодмо пӧйшурасез мумы кионэз Красногорск ёросысь ваиз, нош кионпиосты — Эгра ёросысь. Кион карез быдтэм понна пӧйшурасьёслы коньдон сётӥське, шуэ таксидермист. Со кионъёслэсь лыдзэс мултэс трос луэмлэсь возьыны юрттэ. Гуртоос но гань-гань шокчыны быгато — пудо-животсы понна сокем сюлмаськоно уз луэ ни, пичи пӧйшуръёс но быронлэсь утисько.

«Удмуртилэн инкуазез» адӟытонэ выль экспонат ватсаськоз


Пойшур лабораторие вуэм бере, таксидермистлэн ужез кутске. Нырысь ик кионэз мертано, нимысьтыз карточкае гожтоно: кытысь та пӧйшур, кызьы со быремын, солэн секталаез но мукет. Азьланяз та тодэтъёсты эскерон ужъёсын кутыны луоз. Кыкетӥ люкетэз: куэз ниён но сузян, миськон, кейлэсь но мукет изъянтӥсьёслэсь утӥсь ядо суретъёсын пазян.

Собере ӧнерчи пӧйшурлэн мугорезъя каб лэсьтэ — ӵапак со вылэ сузям ку кыстӥськоз. Сергей Евсеев верамъя, со азьын малпаны кулэ, кыӵе позаен луоз сульдэр — выросын яке гань-гань кыллись, озьы ик кытын со луоз — писпу вылын яке музъем вылын. Сое лыдэ басьтыса гинэ скульптура лэсьтӥське. Мумы кионлы таксидермист пенопластлэсь мугор лэсьтӥз, нош пельёссэ картонлэсь вандӥз.

Кионлы мон, кылсярысь, таӵе синъёс лэсьтӥ. Токароной станокын быдэстӥ, буяй, буёл бырйи, кӧня ке пудра ватсай отчы, соос мед чилялозы, луло адӟиськозы шуыса. Но татчы (кионлэн сульдэраз — ред.) пуктӥ фабричнойзэ. Юнме. Фабричноёсыз аслам лэсьтэмелэсь аламагес вылӥллям
Сергей Евсеев, таксидермист

Собере кутске чеберлыко уж. Татын таксидермист пӧйшурлэсь гонзэ сузя, тырмымтэоссэ тупатъя но сульдэрез кулэ позае пуктэ. Со понна ӧнерчи интернетысь яке журналъёсысь туспуктэмъёсты эскере. Аслаз но Сергей Евсеевлэн 25 арлэсь ятыр ужамез ӵоже туспуктэмъёсын туж бадӟым бичетэз люкаськиз ни. Соосъя таксидермист чакла, кыӵе аспӧртэмлыкъёсыз ӵапак та пӧйшурлэн.

Куке сульдэр бичамын, лэсьтэмын ни, со куасьтӥське, куасьтӥськон вискын тупатъяське. Собере буян но чылкытатон уж мынэ. Сергей Евсеевлэн кылъёсызъя, буян ӵемысь шуг луэ, малы ке шуоно пӧйшур луло кадь мед адӟиськоз шуыса, буёлъёсты шонер быръёно. Озьыен, таксидермистлэн ужез суредасьлэн уженыз бускельяське.

Ӵапак та дыре ӧнерчи мумы кионэз буян люкетэз быдэстэ. Огъя та сульдэр бордын со куинь арня пала тыршиз. Нялтас вераса, одӥг пӧйшурез кылдытонлы висъям дыр котьку пӧртэм. Куд-огзэ нунал куспын но лэсьтыны луэ, мукетызлы толэзь но ӧжыт. Со котькыӵе творчествоя ужын кадь, шуэ Сергей Евсеев. Тужгес но усто люкетэз — куке ужез йылпумъяд но шутэтскиськод, серекъя таксидермист. Нош зэмзэ верано ке, чеберлыко вакытэз тужгес но тунсыко.

Позаез луло мед луоз шуыса, тупатъяськод позазэ. Кӧня ке йырзэ берыктӥд, мукет сямен адӟиське ни. Синъёссэ, кыньыртэмзэ мукет карид — воксё мукет луэ. Тӥни тужгес но тунсыкоез — луло кадь карыны. Мон шонерак верало тазьы: ӧнерлэн парадоксэз со бордын, пӧйшурез виёно ук, нош собере луло кадь лэсьтоно
Сергей Евсеев, таксидермист

Гондыр яке пичи тылобурдо — мар капчигес

Сульдэр лэсьтӥсь муртлэн ужез, суредасьлы сяна, ювелирлы но матын, малы ке шуоно татын котькуд деталез чаклано. Йӧскалык музейысь ӧнерчи малпамъя, уг луы вераны, бадӟымзэ яке пичизэ пӧйшурез лэсьтыны капчигес, котькудӥзлэн аслаз аспӧртэмлыкез вань.

Пичиосыныз тупен-тупен ужано. Нош бадӟым пӧйшурлэн, отын мукетыз бордын шугъяськон. Отын ымныр туслэн люкетъёсыз бадӟымесь кадь, но котькуд мышцаез кулэ быдэстыны. Тылобурдолэн тусыз номыр уг возьматы ке, пӧйшурлэн мимикаез вань. <…> Тӥни со детальёсты лыдэ басьтоно. Соин ик мон уг быгатӥськы вераны, мар капчигес, нош мар шуггес
Сергей Евсеев, таксидермист

Ӧнерчи уг лыдъя, кӧня сульдэр лэсьтӥз ни трос аръёс ӵоже ужатозяз, но тужгес но бадӟымзэ но пичизэ пӧйшуръёсты тодаз возе. Кылсярысь, гондыр но кырпарсь — со тужгес но бадӟымъёсыз. Нош пичиосыз — ӵуж йыро королёк тылобурдо но мугрись (бурозубка).

«Вань Удмуртиын тужгес но пичи тылобурдо — королёк желтоголовый — 3–5 грамм гинэ секталаез. Со туж ӝикыт уж. Вань эшшо пичиез — бурозубка вань сыӵе — со шырпилы келеше. Тӥни тужгес но пичиосыз. Пичизэгес ӧй лэсьты, пичиезгес уг но луы», — шуэ Сергей Евсеев.

Кытын таксидермистлы дышето

Сергей Евсеевлэн кылъёсызъя, таксидермистлы нимысьтыз нокытын уг дышето. Али Москваын курсъёс вань, но отын таксидермия мукет — трофейной.

«Пӧйшурасьёс али тросэз узыр адямиос, сиёнлы уг ёрмо. Сӥль, ку соослы кулэ ӧвӧл. Соослы кулэ трофей. Тӥни соос пӧйшурало, трофейной пӧйшуран. И отын (курсъёсын — ред.) дышето, кызьы пужей, кырпарсь но мукет пӧйшур йырлэсь сульдэр лэсьтыны», — вера таксидермист.

Нош музейын пӧртэмлыкез мукет, татын коллекция лэсьтӥськом, валэктэ Сергей Евсеев. Ачиз со ӧнерезъя географ, нош сульдэръёсты лэсьтон удысэ тунсыкъяськонэз вуттӥз. Нырысетӥ пӧйшурзэ армиын служба нуыкуз лэсьтӥз.

Мон Оренбург улосвылын служба нуи, отын сусликъёс туж трос вал. Мыным тунсыко потӥз. Мон сусликез кутӥ но туж огшоры амалэн (сульдэр лэсьтӥ — ред.). Соку мон номыр но уг быгатӥськы вал. Кузэ сылалтӥ, медаз изъянмы шуыса. Вуж матрацысь вата тыри, лэсьтӥ. <…> Сое мон ваи но школаелы кузьмай, кытын дышетски, 19 номеро школа
Сергей Евсеев, таксидермист

Нош рос-просгес таксидермиен вырыны со Йӧскалык музее ужаны лыктыса кутскиз. Соку татын Вячеслав Семечкин ужа вал. Со дышетэм улсын Сергей Евсеев нырысетӥ пӧйшуръёссэ кылдытъяз.

S5750043.00_00_20_31.неподвижное изображение001.jpg
Сергей Евсеев кионэз лэсьтон бордын 3 арня тыршиз Фото: Никита Иванов ©

Огъя верано ке, таксидермилэсь валтӥсь тодэтъёссэ Удмурт кун университетысь биологияя но химияя факультетын сёто. Александр Меньшиков нимысьтыз курс нуэ, малы ке шуоно биолог кулэ быгатыны сульдэр лэсьтыны. Тросгес быгатонъёс басьтон понна, валамон, ужаны кулэ, шуэ Сергей Евсеев.

Кызьы сульдэръёсты изъянмемлэсь утьыны

Сульдэръёсты адӟытонын возьматонтэм дыре музейлэн фондъёсаз интыяло. Отысь нимысьтыз утӥсь чакла кулэ луись температураез, пӧйшур медаз уродмы шуыса. Озьы ке, но, адӟытонысь адӟытонэ нуллыса, сульдэръёс изъянмо. Вань сыӵеосыз но, кудзэ кей сие, вера Сергей Евсеев.

Солэн кылъёсызъя, ӵемгес тупатоно улэ 1930-тӥ аръёсы лэсьтэм сульдэръёсты, малы ке шуоно соку туала кадь материалъёс ӧй вал на, соин ик пӧйшуръёс аламагес луэмын. Кылсярысь, кемалась ӧвӧл, Сергей Евсеев ӵанаез но кыркокасез тупатӥз но соослы кыкетӥ улон сётӥз.

Кытын ке но тылы лякиськод. Тани чиньыоссы тӥямын вал, мон соосты тупатӥ, нимысьтыз материаллэсь лэсьтӥ, буяй. Уг висъяськы (азьвыл лэсьтэмъёсызлэсь — ред.). Кытын ке но мынам воштон люкетъёсы — тылыос, гижыос — кыллё. Малы выльзэ пӧйшурез быдтод, куке вужзэ луэ тупатыны. Тупатон секытгес выльзэ лэсьтонлэсь, соосын кемагес выроно луэ, но соос ярамонэсь на
Сергей Евсеев, таксидермист

Пӧйшур сульдэрлэн тодосын интыез сярысь

Сергей Евсеев ачиз но пӧйшурась вылэм. Удмуртиысь фаунаез утёнъя управленилэсь пӧйшуръёсты тодос ужпумен кутонлы лэзёнэз али но вань, но ӧнерчи кык ар пала пыӵалэз кияз кутылымтэ ни. Мыным нюлэскы биноклен тунсыкогес ветлыны, шуэ таксидермист.

«Уг шуы, со жалян шуыса. Но валаськод, коллекция кылдытыны кулэлык вал. Ваньмыз валамон — со уж. Коллекция кылдытэмын, нош малы юнме (быдтыны на — ред.)», — лыдъя Сергей Евсеев.

Солэн верамезъя, сульдэр — со огшоры адӟытонлэн люкетэз гинэ ӧвӧл, со тодослэн быдэс сӥез.

Уз луы тодос сульдэртэк. Котьма ке но, быдтыны, мертаны, эскерыны кулэ. Отын бадӟым секыт уж. Отын вераське, мар тылобурдолэн ӵемоназ, кылсярысь. Яке пӧйшурлэн вылтусэз, нимаз детальёс — ваньмыз тодосъя база. Со инкуазез утьыны, со видэз утьыны юрттэ
Сергей Евсеев, таксидермист

Ватсалом, Кузебай Герд нимо йӧскалык музейын та дыре «Удмуртилэн инкуазез» адӟытон ужа. Сое кылдытон понна ӧнерчиос кык ар тыршизы. Отын возьматэм 200-лэсь трос экспонатъёс 30-лэсь ятыр аръёс ӵоже лэсьтэмын. Та дырлы музейлэн фондъёсаз Удмуртиысь ваньмыз сямен пӧйшуръёс вань ни, туж шер пумиськылӥсьёсызлэн гинэ сульдэръёссы уг тырмо на. Сергей Евсеев верамъя, соосты кутыны туж шуг, аръёсын утчаны кулэ. Озьы но шедьтытэк кыльыны луэ.



Наверх
Вниз