Ижкар-13 °C
23 -тӥ толшор 2021 Кӧснунал
18+

30 ар тырмонзэ пусйиз Якшур-Бӧдья ёросысь «Ялыке» ансамбль

  • 9405
  • 0
Якшур-Бӧдья / Удмуртия
30 ар тырмонзэ пусйиз Якшур-Бӧдья ёросысь «Ялыке» ансамбль
Туспуктэм: Роман Иванов

Якшур-Бӧдья ёрослэн 90 ар тырмонэзлы сӥзем ужрадъёс туж чебер ужрадэн йылпумъяськизы. Лулчеберетъя юртлэн сцена вылаз 30 ар тырмонзэ пусйиз «Ялыке» ансамбль.

Валамон, 30 ар талэсь азьло улон но мукет вал, калык но, луонлыкъёс но. Ансамблез кылдытӥсь Валентина Широбокова, Якшур гуртэз сярысь книга гожтэм кышномурт, али кадь ик син азяз возе кутскон сюрессэс.

- Якшур-Бӧдьяын соку воксё ӧй вал удмуртлыкез утись коллективъёс. Йырам весь бергаз малпан, со югдурен мар ке но кароно шуыса, калыкез люкано. Озьы мон нырысь ик мынӥ Светлана Геннадьевна Иванова доры, соку со ёрос библиотекаен кивалтэ вал, собере Алевтина Геннадьевна Вахрушеваез юай. Кыкназы ик соос малпанме шумпотыса пумитазы. Лев Борисович Решетников доры но ветлӥ, арганчиостэк кызьы-о бен ай? Огез эшъёссэ вайиз, мукетыз эшшо мыло-кыдо тодмозэ шедьтӥз. Трос кузя люкаськимы «Ялыке» ансамблямы, куамыно пала. Ялан шудӥсь арганчиосмы но вал гинэ: Лев Решетников, Владимир Новосёлов, Веналий Данилов. Репертуарамы тросгес кутылӥмы портэм сям-йылолъёсты возьматӥсь инсценировкаосты, валамон, отын кырӟанъёс но, эктонъёс но вал. Со аръёсы бадӟым клубмы ӧй вал на, соин олокытын но репетициосы люкаськылӥмы. Огдыре вуж библиотекалэн юртаз но вуылӥмы…

Валентина Николаевна сямызъя, ми тодӥськом, туж востэм адями, но собыдӟа пайдаё ужез берыктыны быгатэмез паймытэ но шумпоттэ, угось солэн кутскемез улэ али но.

90-тӥ аръёсы куд-ог эшъёсмылэн мылкыдзы куашказ, кин ке кошкиз, кин ке ветлыны ӧз быгаты ни – дыр сыче вал. Но кырӟаны тужгес яратӥсь нылкышноос ӧз пазьгиське, огинын возиськизы, выль кырӟасьёс но лыктылӥзы. Трос аръёс ӵоже ансамблен кивалтӥз крезьгурчи но кырӟась Любовь Лебедева, клубын ужасьёс Людмила Тронина, Екатерина Загребина, искусствоосъя школаысь дышетӥсь Валентина Аверкиева. Туэ арысен ялыкеосын туж сюлмо ужа ёрос клубын ужась егит ӧнерчи Татьяна Головизнина. Та вакытэ нылкышно кык мӧйы но кык нылпи коллективъёсын ужа. Бордаз ик кырӟаны вуэ кык мукет ансамбльёсын. Куд-ог концертъёсын йырыз бергатозь вуэ, но секыт ке но, косо бере, лэсьтоно, вуоно, шуэ.

- «Ялыке» ансамбльысь кышномуртъёсын тулысысен ужасько. Конечно, коллектив сомында ар ӵоже ужа ини бере, солэн аслаз сямыз, аслаз куронъёсыз. Котькин борды сюрес шедьтыны быгатоно. Мыным потэ, мон быгатӥ кадь. Котькудӥзлэсь мылкыдзэ адӟи, пушсэ валаны турттӥ. Тани ансамбле нырысетӥ нуналъёсысен ветлӥсь Алевтина Геннадьевна Вахрушева туж мыло-кыдо адями, висьыса но сцена вылэ потоз. Кемалась татын кырӟа ини «Ялыке» магазинэз возись Ирина Александровна Третьякова. Со котырын ваньмыз берга: костюмъёс но вурисько, куд-ог кырӟанъёс но бырйисько. Жингрес вылӥ куаразэ кылзӥсь туж тодэ. Якшурысь нылпи садын ужась Любовь Малькина но сьӧраз кыстӥське. Яркыт чузъяське больницаын ужась Лидия Ардашевалэн куараез. Со но туж быгатэ кылыкез сьӧраз кыскыны, учкисьлэсь мылкыдзэ ӝутыны. Ӧжыт чалмытэсьгес Елена Вахрушева, Светлана Иванова, Надежда Журавлёва, но котькудзылэн – асьсэлэн интызы та ансамбльын. Нокинэн воштонтэм луэ арганчимы гинэ, Василий Байкузин, ёросысьтымы вань ансамбльёслы со дасяськытэк но шудыны быгатэ, нош ялыкеосын воксё одӥг семья кадь луиськомы.

Пӧлазы кырӟа ачиз Татьяна Фёдоровна но. Сцена вылэ со котьку ик яркыт пиштӥсь пальпотонэн потэ, ваньзылы адӟем карымон луэ. Аслэсьтыз мӧйыгес ӵош кырӟась эшъёсыныз со котьку гажан мылкыдын, небытак вераське, но репетициосын кӧбераса уг улы. Кырӟан чебер мед чузъяськоз шуыса, кулэ луэ ке, куаретыны но быгатэ, янгышъёссэс возьматэ, тупатэ.

Концертэ лыктэмъёс огез но ӧз жалялэ со ӝытэ клубе ветлэмзылы. «Ялыкеослы – 30» концерт туж шуныт, капчи но эшлыко мылкыдын ортчиз. Адӟе вал, кызьы ялан чабыса улӥз нырысетӥ радын пукись егит нылаш! Мӧзмем, лэся, удмурт концертъёслэсь, соос милям ӵем уг ортчыло уго.

Якшур-Бӧдья ёросысь «Ялыке» ансамбль

4 фото

«Ялыке» ансамбль бӧрсьысь бӧрсе яратоно кырӟанъёсты быдэсъяз, выльёссэ но возьматӥз. Каллен жильыртӥсь шур кадь кисьтӥськизы гуръёссы, кылзы но кылзы гинэ. Синмез кыскизы выль удмурт шӧмо дӥсьёссы но. Юбилей понна ялыкеосты соосын клуб шумпоттӥз-вуриз.

Верантэм яркыт адскизы ӝытэз нуись «пересьёс». Соосты туж быгатыса шудӥзы Татьяна Селивёрстова но Любовь Пасынкова. Бордазы туж интыяз адскиз Александр Дмитриев но. Зэмос артистъёс, соос бадӟым сцена вылын но шудыны быгатысалзы.

Сцена вылэ, ялыкеос сяна, ёрос клубын кырӟась мукет ансамбльёс потазы на. «Русская песня», «Тӧдьы юсь», «Воля», «Ворекъян», Якшурысь «Купанча» ансамбль, кудӥзлы туэ 35 ар тырмиз ни – ваньзы учкисьёслы чебер но шулдыр кырӟанъёссэс кузьмазы. Гор-гор серекъятӥзы куноосты Мукшиысь «Ури-бери» дуэтысь Татьяна Кайсина но Елена Тронина, соос но ялыкеослы ваньзэ умойзэ сӥзизы. Озьы ик сюлме пырымон кырӟанъёссэс быдэстӥзы Ольга но Алексей Ковальчукъёс, Павел Королёв. Нош кыӵе паймымон быдэстӥзы Татьяна Головизнина но Екатерина Загребина «Ой, сюлэмы» кырӟанэз, бордаз ик асьсэос крезьёсын шудӥзы, сое али вераны но уд быгаты. Туж чебер!

Концертэ лыктэм Ольга Протопопова, «Якшур-Бодья ёрос» муниципал кылыдтэтлэн кивалтэтысьтыз тӧроезлэн мерлыко юанъёсъя воштӥсез, озьы ик пусйиз, концерт чебер, пуштросо но яркыт пӧрмиз шуыса. Нош ансамбльын кырӟасьёслы трос аръёс ӵоже калыклы ӟеч мылкыд кузьмамзы понна интыысь кивалтэтлэсь Таукаронъёс сётӥз, азьланяз но сыӵе ик сюлмо кырӟаны сӥзиз.

Концерт йылпумъяськиз, катанчи пытсаськиз. Мар сюлэме кылиз? Та юанэз сётӥ Татьяна Головизниналы. Со ваньзэ радъяз, люказ, бырйиз, сценарийлы зэмос удмурт шӧм пыртӥз!

- Ваньмыз ортчем бере, бушам кышномурт кадь луиськод. Сомында сюлмаськонэд одӥг ӝыт куспын тӧлӟе. Со дыре ик мон туж шумпотӥсько, сыӵе концерт возьматыны быгатӥмы шуыса. Мынам ваньзылы бадӟым тау вераме потэ: ялыкеослы, арганчиосмылы, вань ансамбльёсмылы но кырӟасьёсмылы, сценаез чеберъясьёслы, куара тупатӥсьёслы. Тау шуисько клублэн кивалтӥсезлы Алексей Барышниковлы, Лариса Поздеевалы но Елена Тимофеевалы кылын но, мылкыдын но юрттэмзы понна, - капчи мылкыдын вераз Татьяна.

Мар бен, ми но сӥзиськомы «Ялыке» ансамбльысь чебер апайёслы капчи мылкыд, жингрес куара! Семья пӧлазы шудбур но байлык медло. Вуись Выль арен, эшъёс!

Вера Вахрушева

Ивортон Якшур-Бӧдья ёросысь «Рассвет» газетлэн удмурт кылын «Ошмес» ватсэтаз потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз