Ижкар+3 °C
31 -тӥ коньывуон 2020 Кӧснунал
18+

Выжы киужзэс азинтэ но куиськон пыр удмурт кылэн тодматэ Дэбес политехникумын дышетскись

  • 5233
  • 0
Дэбес / Удмуртия
Выжы киужзэс азинтэ но куиськон пыр удмурт кылэн тодматэ Дэбес политехникумын дышетскись
Туспуктэм: «Байгурезь» газетлэн

Светлана Корепанова Эгра ёросысь Тюптиево гуртын вордӥськемын. Зура школаын укмыс классэз йылпумъяса, Дэбес политехникуме дышетскыны лыктӥз. Али нылаш ньылетӥ курсын ини, дышетсконзэ йылпумъяса, покчи классъёсын дышетӥсь луоз.

- Политехникуме лыктыны мон ӧй но малпа вал, но табере шумпотӥсько, мыным татын туж яра, - вера со. - Пӧртэм кружокъёсы ветлӥсько, ужрадъёсы пыриськисько, мӧзмыны дыры чик но ӧвӧл.

Светлана политехникумысь егитъёслэн «Шунды» огазеяськонэнызы кивалтэ. Ужзэ ёросысь егитъёслэн «Шунды» огазеяськонэнызы герӟаськыса нуэ. Политехникумысь удмурт нылъёс но пиос «Вертикаль» центрын радъям ужрадъёсы ӵемысь ветло. Кылсярысь, «Karaoke Star» (Караоке кизили) шудонэ шумпотыса пырисько, чузъяськем крезьгуръя удмурт но ӟуч кырӟанъёсты тодыны тыршо, куд-огзэ кырӟало но.

2018-тӥ арын Светлана «Чеберина» ёрос конкурсэ пыриськиз, аслэсьтыз визьмо, мусо, быгатӥсь луэмзэ возьматӥз. Политехникумын ортчись ужрадъёсы но нылаш мыло-кыдо пыриське. Туж яратэ киужен вырыны: керттӥське, пужыятске, куиське.

Ӵапак куиськонлы сӥзем мастер-классэныз со туэ Ижкарын ортчем улосвылкуспо вожвылъяськонэ пыриськиз. Удмурт кун университетысь Удмурт филологияя, финно-угроведения но журналистикая институтэн радъям ужрад «Удмурт кылвуко» нимаськиз. Отын асьсэлэсь тодон-валанзэс, быгатонлыксэс Удмуртиысь, Татарстанысь, Башкортостанысь, Пермь улосвылысь студентъёс возьматӥзы. Светлана верамъя, конкурс куинь секциосын ортчиз. Дэбес политехникумысь студентка возьматӥз, кызьы куиськон пыр нылпиосты вашкала киужен, удмурт кылъёсын тодматыны луэ.

- Куиськон станокен ужаны кема дышетсконо, соин ик мон капчигес амалъёсын тодматӥ: пулъёс вылын куиськонэн, гобелен техникаен но мукетъёсыныз, - вера Светлана. - Верай, покчи нылпиосты куиськон пыр буёлъёсты, станоклэсь детальёссэ возьматӥсь но мукет пуштросъем удмурт кылъёсын тодматыны луэ шуыса.

Дэбесысь студентка та вожвылъяськонын вормисьёс радэ ӧз поты. Озьы ке но, мылкыдыз ӧз сӧриськы.

- Конкурсын трос выльзэ тодӥ, - пусъе со. – Тунсыко потӥз, кызьы удмурт кылэз интернетэз, смартфонъёсты уже кутыса дышетыны луэ. Озьы ик мыло-кыдо кылзӥ мнемотехникаез уже кутыса пӧртэм кылъёсты дышетон сярысь.

Вераны кулэ, куиськонлы сӥзем мастер-классэз дасян борды Светлана юнме шорысь ӧз басьтӥськы.

- Та киужен милям ӵыжы-выжымы юн герӟаськемын. Песянаелэн песянаез туж чебер куиське вылэм. Анаелы со трос выжлёгет куыса кельтэм. Соос туж чебересь, буёлъёсыз эсэпсэ валаса быръемын. Песянае но куиське вылэм. Но жаляса верано, мон тодыса гуртамы куиськон станокмы ӧй вал ини. Та уж тӥрлыкен политехникумын тодматски, пулъёс вылын куиськыны дышетски. Табере зэмос куиськон станок вылын ужаны дышетскеме потэ. Тунсыкъяськемме шӧдыса, атае сое лэсьтыны малпа. Анаелэн но куиськыны мылкыдыз ӝутскиз ини. Ас киыныд лэсьтэм арбери котьку шунытгес, матынгес луэ, уго. Мынам потэ, нылпиос но куиськон сярысь тросгес мед тодозы шуыса.

Азьланяз, политехникумез йылпумъяса, Светлана Корепанова школаын нылпиосты дышетыны малпа. Тодон-валанзэ Удмурт филологияя, финно-угроведения но журналистикая институтын будэтэмез потэ.

Руфима Ложкина, туспуктэм авторлэн

Ивортон Дэбес ёросысь «Байгурезь» газетын потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз