Ижкар+15 °C
2 -тӥ пӧсьтолэзь 2020 Покчиарня
16+

Пичи Пурга ёросысь Ольга Кузьмина: библиотекарь луыны ноку ӧй малпалля

  • 246
  • 0
Вуж Мӧнья / Удмуртия
Пичи Пурга ёросысь Ольга Кузьмина: библиотекарь луыны ноку ӧй малпалля
Туспуктэм: Анжелика Тихонова

27-тӥ куартолэзе Россиын лыдӟетъюртъёслэсь но библиотекарьёслэсь нуналзэс пусъё. Удмуртиын оглом 5 миллион 300 сюрс экземпляр фондэн 533 лыдӟетъюртъёс ужало. Отын 1 сюрс 400-лэсь трос ӧнерчиос тыршо. Туала вакытэ интернет книгаен зол вожвылъяське ини ке но, лыдӟиськонниосы арлы быдэ 500 сюрслэсь трос лыдӟисьёс ветло.

33 ар ӵоже ни та праздникез Пичи Пурга ёросысь Вуж Мӧнья гуртысь библиотекаен кивалтӥсь Ольга Кузьмина но пусъе. Мар бордын библиотекарьлэн ужез, кызьы туала лыдӟисен, гурт калыкен ужано но мукетыз сярысь со ивортодэтъя «Удмуртия» агентстволэн корреспондентэзлы вераз.

«Библиотекарь луыны ноку ӧй малпалля»

Ольга Спиридоновна Кузьмина 1967-тӥ арын Пичи Пурга ёросысь Баграш-Бигра гуртын вордӥськиз. Школаын дышетскон вакытаз куасэн бызьылыны, суредаськыны, лыдӟиськыны яратылӥз. Сюлэмаз Елена Ильиналэн Гуля Королёва сярысь «Четвёртая высота» книгаез тужгес но пыӵаз.

Лыдӟиськыны яратылӥз ке но, библиотекарь луыны ноку ӧз малпалля.

Школа бере одӥг арзэ ӵош дышетскем эшъёсыным механической заводын ужамы. Заводысь озьы гинэ кошкыны уг лэзё вал, кытчы ке но дышетскыны пырыны кулэ вал. Бигралась ик Антипина Лена соку культпросвет училищеын библиотекарьлы дышетске вал, ми солэсь адӟем каримы но отчы мынӥмы. Дышетскыны пыримы
Ольга Кузьмина, Вуж Мӧнья гуртысь лыдӟетъюртлэн кивалтӥсез

Озьы со 1985-1987 аръёсы эшъёсыныз ӵош Ижкарысь лулчеберетъя но калыкез дышетонъя училищеысь «библиотека» ӧрын тодон-валан люказ.

Дышетскыкумы ини ми валамы, библиотекарьлэн ужез, кызьы тросэз малпало, книга сётъян гинэ вылымтэ шуыса. Отын калыкен ӵош ужаны бадӟым саклык висъяно вылэм
Ольга Кузьмина, Вуж Мӧнья гуртысь лыдӟетъюртлэн кивалтӥсез

Дышетскемез бере пинал ӧнерчиез Пичи Пурга ёрос библиотекае ужаны келязы. Но, учырлы луыса, эшеныз воштӥськизы, Ольга Вуж Мӧнья гуртэ ужаны интыяськиз. Бӧрысь татчы ик бызиз, семья кылдытӥз.

Татын мон лыктыку Васильева Хрестинья Фёдоровна ужа вал ай. Мон со вӧзын ужаны дышетски ини. Со мыным нырысь аръёссэ ужаны туж юрттӥз. Нош 1995-тӥ арын кутски ни заведующие, Хрестинья Фёдоровна пенсие потӥз
Ольга Кузьмина, Вуж Мӧнья гуртысь лыдӟетъюртлэн кивалтӥсез

Озьы Ольга Спиридоновна 25 ар ӵоже ини Вуж Мӧнья гуртысь гурт библиотекаен кивалтэ.

Ольга Кузьмина
Фото: Анжелика Тихонова                                                                                                                        © udmurt.media

Фондзэс ас уксёен но книга басьтыса будэтыны тыршо

Азьлозэ верано ке, нырысетӥ кутскем берам туж трос лыдӟиськисьёс вал. Ужрад дасяны нимаз дыр но уг сюры вал библиотекаын. Весь лыктӥсьёслы валэктыны, книга сётыны, книга гожтыны кулэ вал. Берозь ужаськомы вал, ужась калык ӝытазе библиотекае книга басьтыны, шутэтскыны, лыдӟиськисьёслы залын пукыны лыктэ вал
Ольга Кузьмина, Вуж Мӧнья гуртысь лыдӟетъюртлэн кивалтӥсез

Нош али лыктӥсьёс ӧжытгес, вера Ольга Спиридоновна. Озьы ке но, библиотекаын лыдӟиськисьёс 600-лэсь ятыр лыдъясько. Книга, журнал учкыны нылпи садэ ветлӥсь пиналъёс но, мӧйыос но вуо.

Покчи классъёсын дышетскисьёсмы яратыса лыдӟисько. Кыкетӥ классысь пиналъёс туж вожмаськыса ветлыны кутскизы вал, но тани югдурен сэрен дугдоно луизы ай. Петрова Софьяез вераме потэ. Туж мыло-кыдо нылаш. Лыдӟиське. Эшъёссэ сьӧраз валтыны быгатэ. Солэсь адӟыса, мукетъёсыз но эшъёсыз лыкто библиотекае но Софья тае басьтӥз, Софья тае лыдӟиз шуыса верало ини, мынам но лыдӟеме потэ шуо. Собере дышетӥсьсы но уж сётъя, лэся, книгаосты учконъя
Ольга Кузьмина, Вуж Мӧнья гуртысь лыдӟетъюртлэн кивалтӥсез

Пиналъёс куспазы тросгес ӟуч сямен верасько ке но, удмурт книгаос но одӥг ог басьяло, шуэ Ольга Кузьмина. Нош мӧйыос Совето вакытэ потэм литератураез быръё. Вашкалаез, колхозъёс кылдон, Быдӟым Атыкай ож вакыт сярысь лыдӟо. Со сяна, шутэтскыны, капчи, чаляк лыдӟиськись литератураез басьяло, кылсярысь, нылкышно романъёсты.

Берло дыре выль книгаос библиотекае туж ӧжыт вуо, веранзэ азьланьтэ Ольга Спиридоновна. Солэн кылъёсызъя, берлозэ кылем арын сӥзьыл вуизы. Пӧлазы пиналъёслы но кӧня ке книгаос вал.

Ӵектӥ мон соосты 8-9 классъёсын дышетскисьёслы. Соос лыктӥзы, учкизы, басьтӥзы, лыдӟизы, эшшо ӧвӧл на-а шуыса юало. Мынам малпанэ кылдӥз, пиналъёс лыдӟиськысалзы, дыр, сыӵе умой книгаос луысалзы ке. Вань лыдӟиськисьёс пинал калык пушкын но, соосты кыскыны быгатыны гинэ кулэ, книгаос кулэ. Мон малпасько, пинал калык копак лыдӟиськытэк уг кылльы
Ольга Кузьмина, Вуж Мӧнья гуртысь лыдӟетъюртлэн кивалтӥсез

Лыдӟетъюртлэсь фондзэ Ольга Кузьмина ас коньдонэныз книга басьяса но выльдэ. Лавкаосысь книга ӝажыос вӧзтӥ тэк ортчеме уг луы, шуэ.

Книгаез адӟиськод ке, дугдӥськод, таиз мынам библиотекаям ӧвӧл на шуыса учкиськод, маиз кельше, басьтӥськод ини собере. Нырысь ик ачид лыдӟиськод, собере ӵектӥськод ини лыдӟисьёсыдлы. Удмуртсэ но, ӟучсэ но, кӧня асме тодӥсько ини, весь книга октӥсько
Ольга Кузьмина, Вуж Мӧнья гуртысь лыдӟетъюртлэн кивалтӥсез

Берло дыре Ольга Спиридоновна журналъёс но басьтэ. Уго тросэз книга лыдӟыны дырзы ӧвӧл шуо, соку библиотекарь соослы журнал ӵектэ - отын но лыдӟоноез, тунсыкоез, кулэез трос пумиське.

Туэ лыдӟетъюртэ пиналъёслы «Весёлый колобок», «Кизили» журналъёс, «Ӟечбур» газет лыкто, со сяна, «Удмурт дунне», «Маяк» газетъёс, «Кенеш» журнал вуо.

Книгаосын ӝажыос лад-лад сыло
Фото: Анжелика Тихонова                                                                                                                        © udmurt.media

«Библиотекаысь клубъёсамы ветлӥсьёслэсь мӧзмисько»

Лыдӟиськыны сяна, лыдӟетъюртэ ог-оген пумиськыны, шутэтскыны, вераськыны но люкасько. Мӧйыос понна «Ӵыдонтэм пумиськонъёс» клуб ужа.

1995-тӥ арын ини кылдэмын со пуконъёсмы милям. Нырысь ӧжыт ветлӥсьёс вал, собере 17 но люкаськылӥз, али 13-ё потаны кутскизы вал. Пенсие потэмъёс, мӧйыосгес ветло. 1995-тӥ арысен татчыозь ветлӥсез но вань ай. Фомина Юлия Трофимовна тани али но весь ветлэ ай. Ветлэме потэ ай, шуэ. Ефремова Аннапай но кема ветлӥз, алигес дугдӥз ай. Вирнуналэз гинэ возьмаса улӥськом, мӧзмиськом, шуо. Куд-огез тани висьыса яке кызьы ветлытэк кылё, собере нош ик лыкто но мӧзмемзэс утыр верало ини ог-огзылы. Мон но мӧзмисько ини соослэсь
Ольга Кузьмина, Вуж Мӧнья гуртысь лыдӟетъюртлэн кивалтӥсез

Пуконъёсы ветлӥсьёсын пӧртэм ужрадъёс ортчыто, ӵошен книга лыдӟо. Со сяна, мукет гуртъёсысь, ёросъёсысь ветеран огазеяськонъёсын пумиськылонъёс но радъяло. Озьы Выль Мӧнья гуртысь, Гожнялась, Омгалась, Киясаысь эшъёссэс ӧтчазы, собере доразы но вуылӥзы.

Озьы ик арлыдоос пӧртэм фестивальёсы но мылысь-кыдысь пырисько, кылсярысь, «Пурга минё» фестивале.

Куд-ог мунёоссы шоры учкыса, тус но пукто. Тазэ Юляпай ӧз лэсьты-а - ачиз тусо, нош тазэ Шурапай лэсьтӥз, дыр, шуо
Ольга Кузьмина, Вуж Мӧнья гуртысь лыдӟетъюртлэн кивалтӥсез

Клубе ветлӥсь нылкышноослэн мунёоссы
Фото: Анжелика Тихонова                                                                                                                        © udmurt.media

Покчи классъёсын дышетскисьёслы кылем арын «Весёлый башмачок» нимо театр кружок усьтӥзы. Отчы покчи классъёс сяна, витетӥ классысь но кӧня ке дышетскисьёс мыло-кыдо пыриськизы. Пиналъёсын «Репка» выжыкылэз выль сямен пуктӥзы. Со Удмуртиын ялэм Тазалыклэн арезлы сӥземын вал.

Ми сое татын, библиотекаын, мӧйыослы пуктӥмы, кыказ ик садике ветлӥмы – Итэше но, Мӧньяла но, школае ветлӥмы – нырысетӥ классъёс азьын пуктӥмы. Собере элькун конкурсэ но лэзьямы на вал, видео лэсьтыса
Ольга Кузьмина, Вуж Мӧнья гуртысь лыдӟетъюртлэн кивалтӥсез

Озьы ик библиотека бордын «Табань» клуб но ужа. Со улсын пӧртэм удысын тыршись тодмо адямиосын пумиськылонъёс радъяло. Мӧнья калыкез Кирилл Ломагинэн, Самсонов гожъяськисьёсын, Татьяна Черноваен, Дэметэръёслэн мадьяр-удмурт семьяенызы, Николай Анисимовен, Сергей Сосновен, Анатолий Перевозчиковен, Любовь Тихоноваен но трос мукет адямиосын тодматӥзы ини.

Бадӟым телевизор сярысь чебер малпан

Туала вакытэ трос пӧртэм акциос радъяло. Гужем пинал волонтёръёсын ӵош урамъёсы потало. Кылсярысь, 31-тӥ куартолэзе – Тамак кысконэн нюръяськонъя дунневыл нуналэ – «Брось сигарету, возьми конфету» акция ортчыто.

Собере 8-тӥ пӧсьтолэзьлы, Семьялэн, яратонлэн но осконлыклэн нуналзылы, сӥзьыса но акция ортчытъяськомы. Котькуд аре со милям луэ. Пиналъёсын ромашкаос лэсьтӥськомы, собере, ураме потыса, сётъяськомы, ӟечкыласькомы
Ольга Кузьмина, Вуж Мӧнья гуртысь лыдӟетъюртлэн кивалтӥсез

Озьы ик берло дыре трос ивортодэто стендъёс дасяло. Библиотекае сяна, гуртысь магазин дорысь стендэ но.

Адямиос ивор мед адӟозы шуыса, отчы котырес лыдпусъёслы ивор тыриськом. Озьы ик юбилей датаосын ӟечкылан листовкаос лэсьяськомы. Асьмеос организациосы мероприятиосын потаны тыршиськомы. Трос ужмес клубын ужасьёсын лэсьтӥськомы, озьы ик школаын ужасьёс но, садикын ужасьёс но юрттӥсько
Ольга Кузьмина, Вуж Мӧнья гуртысь лыдӟетъюртлэн кивалтӥсез

Со сяна, трос гинэ ёрос лыдӟетъюртлэн вожвылъяськонъёсаз, акциосаз пырисько. Али но, астэ ачид нимаз висъян вакытэ, Быдӟым Атыкай ожын Вормонлы 75 ар тырмонлы сӥзем вань вотэс акциоссэс быдэстӥзы.

Быдӟым Атыкай ожлы сӥзем адӟытон
Фото: Анжелика Тихонова                                                                                                                        © udmurt.media

Озьы пичиен-пичиен мерлыко вотэсъёсын ужаны но дышетско, туала улонлэсь бере кыльытэк тыршо. Со ужазы туж кулэ шуыса пусъе Ольга Спиридоновна.

Секыт ке но, тыршиськом ужаны. Пинал калык сьӧры вуттыны кулэ, соослэсь азьланьгес но мыныны кулэ
Ольга Кузьмина, Вуж Мӧнья гуртысь лыдӟетъюртлэн кивалтӥсез

Элькун акциослэсь но уг палэнтӥсько. Одӥг пол «Бадӟым удмурт диктантэз» но гожтӥзы. Нош «Бадӟым этнографи диктантэз» - куинь пол.

Вань библиотекарьлэн бадӟым льӧль малпанэз но.

Туж потэ, бадӟым телевизормы библиотекаын мед кылдоз вал шуыса. Кино учкыны, кинотеатрын кадь. Мылкыды вань мынам ужрад ортчытыку но отын ик возьматыны. Асме ачим спонсор карыса но басьтысал ини кадь. Котькыӵе ужрад ортчытыны кулэ кыӵе ке но наглядной материал. Книгаен гинэ али ужано ӧвӧл ини. Али коть пичиезлы, коть бадӟымезлы мар ке но возьматыны мед луоз
Ольга Кузьмина, Вуж Мӧнья гуртысь лыдӟетъюртлэн кивалтӥсез

Лыдӟиськонни - кыкетӥ дор

Ольга Спиридоновна гурт библиотекаын вань сюлэмзэ сётыса тырше: книгаос лад-лад ӝажыосын сыло, укно дуръёсын яркыт сяськаосын садъёс пушъё, котыр чылкыт но ӝикыт. Табере библиотека кыкетӥ юртэ кадь потэ ини, шуэ со.

Библиотекарьлэсь тыршемзэ ёросын но, элькунын но адӟо. Пӧртэм аръёсы сое Пичи Пурга ёрослэн но Удмурт Элькунлэн данъян грамотаосынызы пусйизы.

Яратоно ужез понна семьяез но дурбасьтэ, уг алы.

Азьло вакытэ трос ужрадъёс ӝытазе ортчо вал. Пичи пиналъёсме но одӥг ог гинэ адӟисько вал потӥсько. Ӝытазе бертӥськод, нош ик ужрадэ библиотекае потӥськод. Сьӧрам но улляськыса кылемзы вань пиналъёсылэн. Но семьяе, картэ вала, юрттӥське
Ольга Кузьмина, Вуж Мӧнья гуртысь лыдӟетъюртлэн кивалтӥсез

Ольга Спиридоновналэн Валерий кузпалэныз ньыль пиналзы - куинь пизы но одӥг нылзы. Евгений но Дмитрий пиоссы бадӟымесь ини, анай-атай бурд улысьтызы потӥзы. Нош Артём пизы но Юлия нылзы бордазы на. Артём туэ сизьымэтӥ классэз йылпумъя, нош Юлия – витетӥ.

Семьяенызы «Русское лото» шудонэн шудыны ярато, вера Ольга Кузьмина.

Пичи дыръязы сётскиськомгес но вал, кӧтсы ӝож медаз луы шуыса. Нош али огкадь шудӥськом ини
Ольга Кузьмина, Вуж Мӧнья гуртысь лыдӟетъюртлэн кивалтӥсез

Ольга Спиридоновна та праздник библиотекарьлэн гинэ ӧвӧл, лыдӟиськисьёслэн но шуыса пусъе. Соин ик ваньзэсты ӟечкыла. Нош библиотекаосын ужасьёслы азьланяз трос лыдӟиськисьёс, ужазы выль малпанъёс но юн тазалык нимысьтыз сӥзе.



Наверх
Вниз