Ижкар-6 °C
27 -тӥ шуркынмон 2020 Удмуртарня
18+

Кузебай Герд нимо йӧскалык музейысь тодосъя секретарь Юрий Перевозчиков: музеймы котьку но, котькинлы но мед луысал

  • 61
  • 0
Ижкар / Удмуртия
Кузебай Герд нимо йӧскалык музейысь тодосъя секретарь Юрий Перевозчиков: музеймы котьку но, котькинлы но мед луысал
Туспуктэм: Григорий Фомин

2020-тӥ арын 20-тӥ шуркынмонэ Удмуртиысь Кузебай Герд нимо йӧскалык музейлы кылдэмез дырысен 100 ар тырмиз. Музейлэн дауръем сюресэз, экспозициосыз сярысь ивортодэтъя «Удмуртия» агентстволэн корреспондентэз йӧскалык музейысь тодосъя секретарен Юрий Перевозчиковен вераськиз.

Туж тунсыко, асьмелы, Удмурт шаерлы, кунлыкез 4-тӥ шуркынмонэ сётӥзы, нош музей 20-тӥ шуркынмонэ усьтӥськиз. Но сое кылдытон сярысь пумкылъян вазьгес кутэмын вал. Соку со «Ижевский музей местного края» нимаськиз
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

1920-тӥ арын музей Советской урамысь Лютеранской кирха интыын усьтӥськиз. Али со юрт Ижкарын ӧвӧл ини.

Бӧрысь музей трос юртъёсты вошъяз. Тунсыко, тросэз соос пӧлысь али синпелет радэ пыртэмын

Юрий Перевозчиковлэн кылъёсызъя, музейлэн тужгес секыт вакытэз Быдӟым Атыкай ож аръёсы вал, уго соку солэсь фондъёссэ Сарапулэ выжтоно луиз.

Зэмзэ вераса, музейлэн огсыр улонэз кутскиз 70-тӥ аръёсы, куке солы Арсеналлэсь одӥг люкетсэ сётӥзы. Соку Арсенал юртын Ижмаш завод ужаз на вал, но собере, 80-тӥ аръёсы ини, та юртэз быдэсак музейлы сётӥзы. Татын реставрация, реконструкция но кутскиз, музей татын ужаны мед быгатоз шуыса
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Музейлэн нырысетӥ кивалтӥсез пудо першал Андрей Филиппов луиз. Сое дышетскем, дуннеез кӧня ке но адӟем адями шуыса ӧтизы. Со ик музее аслэсьтыз нырысетӥ экспонатъёссэ но вайиз. Бӧрысь Ижкарын гурт возёс адӟытон ортчиз, отысь кӧня ке экспонатъёсты ужъюртэ кельтӥзы. Озьы музей нырысетӥ вамышъёссэ лэсьтӥз.

100 ар ӵоже музей трос гинэ кивалтӥсьёссэ вошъяз. Юрий Перевозчиков соос пӧлысь Андрей Филипповез, Кузебай Гердэз, Михаил Ильинэз, Тамара Шиловаез висъяз.

Кузебай Герд, кинлэсь нимзэ сётӥзы музейлы, со кӧня ке толэзь гинэ кивалтӥз, но нырысетӥез луиз, кинлэн интыужез директор вал. Азьло вал заведующой, нош со директор луиз. Со вал 24-тӥ ар. Со Мускоын аспирантураын дышетскиз. Но сое юри гужем толэзьёсы ӧтизы, мед со музейын тодос ужез радъясал шуыса. Со быгатӥз. Со материалъёс бичаса экспедицие но потаз. Ужкагазъёс ласянь но туж трос лэсьтӥз. Зэмзэ вераса, туж шонер музей солэсь нимзэ нуллэ шуыса
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Кузебай Гердлэсь нимзэ музейлы 2000-тӥ арын сётӥзы
Кузебай Гердлэн печатлан машинаез
Йӧскалык музейын Кузебай Гердлэн печатлан машинаез утиське Фото: Майя Бывальцева © udmurt.media

Туннэ нуналлы йӧскалык музейлэн фондъёсаз 200 сюрслэсь трос экспонатъёс лыдъясько. Тужгес вашкалаосыз археологи бичетысь экспонатъёс луо. Юрий Перевозчиковлэн верамезъя, отчы неолит вакытысен кутскыса 40 сюрс пала арбериос пыро. Но зэмос арзэс вераны туж шуг. Озьы ке но, музейын шаермылэн 10 сюрс ар ӵоже историез сярысь мадись археологи экспонатъёс утисько шуыны луоз.

Валамон ини, удмурт калыклэн лулчеберетэз, материальной культураез – со милям ужмылэн валтӥсь ӧрез. Удмурт калыкен герӟаськем трос экспонатъёсмы, трос арбериосмы вань. Шуом, дӥськут, азвесьёс, собере мае ми чурыт этнография шуиськом – со улон-вылон тӥрлык: пулэсь лэсьтэм арбериос, пӧртэм чеберлыко киужъёс. Озьы ик вань туж дуно, удмурт осконэн герӟаськем арбериос: воршудной короб, пӧртэм сюмыкъёс, тэркыос, кудъёсыз вӧсяськон дыръя уже басьтӥськизы. Ужан тӥрлык: соос муш возёнэн, кизёнэн, гыронэн герӟаськемын
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Озьы ик музей пыӵал тӥрлыкен герӟаськем бичетэныз но данъяськыны быгатэ. Отчы пырись экспонатъёс 18-тӥ даурысен кутскыса люкамын.

Солэн пичи гинэ люкетэз кылдытӥськись Калашников нимо музейлы ар дыръяз сётэмын вал. Но тросэз асьме музеямы ик кылиз. Пусъё, соос Ижысь тӥрлык поттон заводэн гинэ герӟаськемын ӧвӧл, мукет но татын пыӵалъёс вань. Вуоно арын, малпаськом, милям соосын герӟаськем асьмелэн нимаз экспозицимы кылдытӥськоз
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Озьы ик музей ужгаказъёсын, мотоциклъёсын, шаерысьтымы инкуазен но мукет адӟытонъёсыныз ушъяськыны быгатэ.

Валтӥсь экспозицимы - со историен герӟаськемын. Со археологиысен кутске. Отын ик этнография, удмуртъёс возьматэмын. Собере вузкарон мынэ, кызьы асьме шаерамы вузаськон кылдӥз но азинскиз. Нош бадӟым люкетэз «Города начинались с заводов» нимаське. Со валтӥсь экспозиция
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Юрий Перевозчиковлэн верамезъя, ӵапак али сое выльдон бордын ужало. Тунсыкогес, туалагес карон понна выль мультимедиа тӥрлык пыртыны тыршо.

Озьы ик кӧня ке ар ортчыса экспозицие Удмуртилэн кунлыкезлы дасям «Удмуртия – 20 век» адӟытон но пырыны быгатоз, сое кылем арын лэсьтӥзы вал.

Ми сое кӧня ке но воштом, кӧня ке экспонатъёс ватсалом, информативнойгес, пӧртэм адямиослы тунсыкогес мед луоз шуыса
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Музей арлы быдэ оглом 70 пала адӟытонъёс радъя. Отчы электрон но, интыысь интые нуллӥськись адӟытонъёс но пыро

Палэнысен учкыса, музейлэн юртэз туж бадӟым адӟиське. Но зэмзэ ке, экспонатъёссэ возьыны интызы уг тырмы ни.

Зэмзэ вераса, милемлы фондовой висъетъёс уг тырмо ини, туж ӧжыт интымы, кытчы выль экспонатъёс тырыны луысал. Музейлы туж кулэ выль висъетъёс но выль ужан тӥрлык, малы ке шуоно фондовой помещениосын одно ик нимаз режим возьыны кулэ, мед со мускытлыкъя но, югытъя но, температурая но ялан огкадь луоз. Шуом, ужкагазъёс, басмаос, ужан тӥрлыкъёс, пыӵалъёс, зарнилэсь лэсьтэм арбериос возьыны – котькудӥзлэн аслаз куронъёсыз вань. Соин ик одно ик кулэ выль фондохранилище
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Музейысь ӧнерчиос выль ужан амалъёсты но одно ик ужазы куто. Учкись-кылзӥсьёсты музее кыскон понна пӧртэм мастер-классъёс, пленэръёс, пиналъёслы квестъёс ортчытъяло, гужем музей азбарын концертъёс, фестивальёс радъяло. Нош азьланяз, музейын мультимедиа тӥрлык тросгес луиз ке, калыклы эшшо но тунсыкогес луозы шуыса оско.

Йӧскалык музейлэн филиалэз но вань – со Геннадий Красильниковлэн музей-квартираез. Со сяна, музей ёросъёсысь шаертодонъя музейёсын но уж нуэ. Соос понна семинаръёс ортчытъя, экспозициоссэс выльдыны, адӟытон радъяны юрттэ. Озьы ик соосын валче акциос ортчытъяло.

Музеймы котьку но, котькинлы но мед луысал. Соин ик тыршиськом адӟытонъёсамы но тунсыко луыны котькинлы. <…> Ми тыршиськом лэсьтыны сыӵе адӟытонъёсты, отын чеберлыко киужъёс но, суредъёс но, улон-вылонын кутӥськись арбериос но мед луозы. Тыршиськом, музеймы научной но, воспитательной но, просветительской но, куддыръя развлекательной но мед луоз шуыса
Юрий Перевозчиков, Удмуртиысь Кузебай Герд нимо йӧскалык музейысь тодосъя секретарь

Тодэ вайытом, Удмуртиысь Кузебай Герд нимо йӧскалык музейын ужасьёсты ужъюртлэн дауръем юбилееныз Россилэн азьмуртэз Владимир Путин ӟечкылаз

Ватсалом, азьвылгес ивортодэтъя «Удмуртия» агентстволэн корреспондентэз йӧскалык музейысь таксидермистлэн мастерскояз вуылӥз



Наверх
Вниз