Ижкар+19 °C
14 -тӥ оштолэзь 2021 Вирнунал
18+

«Нуныкай» центрен тодматон ортчиз Ижкарын

  • 1194
  • 0
Ижкар / Удмуртия
«Нуныкай» центрен тодматон ортчиз Ижкарын
Туспуктэм: Майя Бывальцева

26-тӥ гудырикошконэ Ижкарысь Кызьпу арамаын кыккылъем нылпиос понна «Нуныкай» центрлэн нырысетӥ пумиськонэз ортчиз. Удмурт анай-атайёс но нылпиоссы ӵектослэн кивалтӥсьёсыныз, дышетӥсьёсын но ужанрадлыкеныз тодматскизы.

Пумиськонлы мылкыд сётӥзы «Камали» студиысь пинал кырӟасьёс. Собере нылпиос, арлыдзыя группаослы люкиськыса, пӧртэм сатнциосъя кошкизы: кылэз волятон площадкаын соосты пумитаз Таня апай (Татьяна Волкова), киужен вырон интыын — Вера апай (Вера Дубовцева) (центрын ужалоз Ольга Бикузина), крезьгуръя урокез ортчытиз Вероника апай (Вероника Фёдорова), сильвирез кыдытӥсь шудонъёс нуизы Лена апай но Люба апай (Елена Фролова но Любовь Михайлова). Та ӧръёсъя ик уж мыноз «Нуныкай» центрын.

Тодэ вайытом, «Нуныкай» 9-тӥ куарусёнэ ужаны кутскоз. Интыяськоз Карл Маркс ульчаысь 395 номеро юртын «Сёма» центрын. Отчы удмурт кылын вераськись яке кылэз валась 2 аресысен 9 аресозь пиналъёс ветлыны быгатозы.

Арнялы быдэ субботаосы ужаломы, 9-тӥ куарусён толэзьысен 11 часын котькуд занятимы кутскоз. Милям луозы пӧртэм занятиос. Али тани станциосъя ветло нылпиос, со выллем ик луозы занятиос. Киужен вырозы, собере кырӟан занятиос, мар ке но крезьгурен выромы, собере куинетӥез — кылэз волятон, дышетӥсьёс ужалозы удмурт кылын тросгес мед вераськомы шуыса. Валтӥсь малпанэз татын — именно удмурт кылын мед вераськозы шуыса, валаны мед тыршозы
Ольга Бикузина, «Нуныкай» ӵектослэн кивалтӥсез

Нылпиосты кык группалы люкозы: 2–4 аресъемъёс но 5–9 аресъемъёс. Нимаз висъетъёсын соос понна арлыдзыя тупась занятиос ортчозы. Пичиослэн со кыстӥськоз 15 минут, бадӟымъёслэн — 30 минут. Висказ ваньзы пиналъёс ӵошен шудыны быгатозы.

Ольга Бикузиналэн верамезъя, ӵектосэз кылдытыку аслэсьтыз нылпиоссэ йыраз возиз. Удмурт кылын туж умой вераськись нылыз но пиез дорысьтызы потыса ӟуч кыл вылэ выжо. Анай кылэз семьяын вераськон кыл кожало.

«Югудур сыӵе — мынӥськод кытчы ке, нылпи ӟуч сямен вераське. Доре но бертыса со ӟуч кылысь потыны уг ни быгаты, ялан ӟуч кылын ваземез потэ. <…> Вот сыӵе потэ вал — кытчы ке мыныны, отын (нылпи - ред.) кылэ удмурт кылын вераськемез. Али но тани соос бызьыло, кыло ни ваньзы котыр удмурт верасько шуыса. Соослэн потэ-а, уг-а, но удмурт кылзы потӥз ни. Озьы ик со луыны кулэ», — пусъе Ольга Бикузина.

«Нуныкай» центрен тодматон

12 фото

Туннэ Ижкарын удмуртлыкез нылпиослы пыӵатонъя пумиськонъёс радъяло кыккылолыкъя «Билингва» центр но «Анай клуб» огазеяськон. Но соос нырысь ик анай-атайёсын ужало, соослы визь-кенеш, юрттэт сёто. Нош «Нуныкай» центр быдэсак сӥземын нылпиослэсь удмурт кылзэс волятон ужлы.

Соос татын пӧртэм уж пыр удмурт кылзэс волятозы, со котькуд арняе луоз. Макем ӵемгес пумисько нылпиос, макем ӵемгес оос верасько удмурт кылын — семья пушкын гинэ ӧвӧл, мукет социумын — сокем умойгес соослэн кыккылолыксы, шуом, йыразы пыӵа. Соос кылзэс волято, мукет ласянь, соос валало — мон удмурт, мон огнам ӧвӧл, мон вӧзын мукет нылпиос но вань. Соос дышетско данъяськыны удмуртлыкенызы, соос уг возьдасько ни. Мон малпасько, тани та нылпиос, кудъёсыз али будо пӧртэм проектъёсын милям, <…> соос быгатозы будыны зэмос удмурт интеллигенцие
Татьяна Волкова, «Билингва» центрлэн кивалтӥсез, кылосбур тодосъя кандидат

«Нуныкай» центре ветлӥсьёс тырмыт луыны кулэ. «Анай клуб» огазеяськонэ пыриськисьёс, нош со 60 пала анайёс, солэсь усьтӥськемзэ туж возьмало ни. Вазиськисьёс вань та выллем ужрадъёсы азьвыл пыриськылымтэ муртъёс пӧлын но.

Снежана Никитина «Нуныкай» центре 7 но 2 аресъем пиосыныз ветлыны малпа. Семьяязы кык кылын верасько, ачиз ӵемгес удмурт кылын вазе, кузпалыз — ӟуч кылын.

«Пие пичи дырысеныз удмурт вераське вал, садике мынӥз — ӟучомиз. Али нош ик удмурт тырше вераськыны. <…> Тунсыко потӥз, тыршомы ветлыны. Со быгатоз юрттыны, удмурт кылэз медаз вунэтэ ке но шуыса», — вераз Снежана.

«Анай кылэз волятон понна удмурт садик тырмыт öвöл. Тросэзлэн отчы сюремзы но уг луы. Нош «Нуныкай» центре котькуд мылкыд карись удмурт анай-атайёс быгатозы нылпиоссэс вайыны. Ми пыриськом та ужрадэ быдэс семьяен. Бадӟым пие занятиосы ветлоз, нош пичиезлы кык арес öз ке но тырмы на, «Нуныкайын» со шудыны быгатоз мукет удмурт пиналъёсын», — вера мукетыз анай Светлана.

Тодады вайытом, Кыккылъем нылпиослы «Нуныкай» центр кылдытонлы мылкыд сётӥз «Удмурт Кенеш» огазеяськон. Ижкарлэн мерлыко ӵектосъёсъя конкурсаз пыриськыса, кичӧлтонэз быдэстыны 100 сюрс манет утыны кылдӥз. «Нуныкай» та ар пумозь ужалоз шуыса чакламын, но радъясьёсыз сое азьланьтыны луонлыкъёс шедьтыны тыршозы шуыса веразы. «Выль ужез кутскыны секыт, азьланьтыны капчигес луоз», — лыдъя Ольга Бикузина.

«Азьланяз, мон малпасько, проектмы туж пӧрмиз ке, ми та опытэн люкиськыны быгатомы мукет ёросъёсысь азьветлӥсьёсын. Малпасько, «Удмурт Кенеш» быгатоз радъяны семинаръёсты, кытын ми быгатомы ас опытмес возьматыны», — ватсаз Татьяна Волкова.

Нялтас вераса, «ВКонтакте» вотэсын «Нуныкайлэн» аслаз группаез вань. Вань выль иворъёсты отысь тодыны луоз.



Наверх
Вниз