Ижкар-5 °C
1 -тӥ толсур 2020 Пуксён
18+

Кылосбур но йӧскалык дышетон удыслы сӥзем IV калыккуспо конференцие Ижкаре 300 пала адями люкаськиз

  • 14203
  • 0
Ижкар / Удмуртия
Кылосбур но йӧскалык дышетон удыслы сӥзем IV калыккуспо конференцие Ижкаре 300 пала адями люкаськиз
Туспуктэм: Наталья Тетерина

Туннэ, 11-тӥ коньывуонэ, Ижкарын «Туала троскылъем улонын кылосбур но йӧскалык дышетон удысысь инъетъёс но выль ужан амалъёс» («Традиции и новации в филологическом и этнокультурном образовании в условиях межъязыковой коммуникации») IV калыккуспо конференци ужаны кутскиз. Ужрадэ Удмуртиысь, Москваысь, Татарстанысь, Башкириысь, Марий Элысь, Пермь шаерысь, Венгриысь, Финляндиысь, Эстониысь, Испаниысь но Германиысь 300 пала дышетӥсьёс, тодосчиос, дышетон но тодос удысысь ӧнерчиос люкаськизы. 

Таяз арын конференци кык тодосчиослэн, школаын но вузъёсын кутӥськись учебникъёслэн авторъёссылэн котырес лыдпусъёссылы сӥземын: кылосбур тодосъя докторлэн, Россиысь но Удмуртиысь тодос удысысь дано ужасьлэн Иван Таракановлэн вордскем дырысеныз 90 ар тырмонлы но педагогика тодосъя докторлэн, Россиысь калыкез дышетонъя отличниклэн, Россиысь вылӥ школалэн дано ужасезлэн, Удмуртилэн кун премиезлэн луареатэзлэн Геннадий Ушаковлэн вордскем дырысеныз 80 ар тырмонлы.

Конференцие люкаськемъёслы Удмуртилэн Кун Кенешысьтыз тодосъя, дышетонъя, лулчеберетъя, йӧскалык но калыкъёсын ужан политикая но спортъя ялан ужась ӧрилэн кивалтӥсез, «Удмурт Кенеш» огазеяськонлэн тӧроез Татьяна Ишматова вазиськиз. Со пусйиз, нырысь ик та удмурт кыллы но сое дышетонлы сӥзем ужрад. 

Та конференция мед сётысал тӥледлы, асьмелы ваньмылы, кин та юан бордын ужа, сыӵе луонлык - малпаськыны, ужаны мылкыд сётыны асьмелы но, матысь адямиослы но та ужез азинтоно шуыса. <…> Удмурт кыллэн азинсконэз луоз соку гинэ, куке котькуд дышетӥсь, котькуд анай-атай, котькуд кивалтӥсь, кудӥз радъя та ужез, та ужез яратӥз но валаз ке. <…> Та конференциын тӥ вераське вал со ужпумъёс пумысен, кудъёсыз тӥледыз шугъяськыто: учебникъёс-а со, методикаос-а со, кыӵе ке но ужан амалъёс-а со. Тӥ поттэ сое шара но кенеше со адямиосын, кудъёсыз туннэ верало асьсэлэсь дась луэмзэс, ойдолэ, ӵош ужалом, ойдолэ, мае ке но выльзэ лэсьтом шуыса
Татьяна Ишматова, «Удмурт Кенеш» огазеяськонлэн тӧроез, Удмуртиысь Кун Кенешлэн депутатэз

Озьы ик со вераз юбиляръёс сярысь, кудъёсызлы туэ конференция сӥземын. Татьяна Ишматовалэн кылъёсызъя, Иван Тараканов но Геннадий Ушаков элькун, калык но тодос понна туж трос лэсьтӥзы. Соос бадӟым букваысен Тодосчиос, Дышетӥсьёс но Мер огазеяськонъёсын ужасьёс, шуиз депутат.

FullSizeRender (1).jpg
Конференциез сӥё-дано усьтон Фото: Наталья Тетерина © udmurt.media

Удмуртиысь дышетонъя но тодосъя министрлэн воштӥсез Ирина Крохина пусйиз, со туж шонер, куке конференци сӥземын со муртъёслы, кин Удмуртилэсь но кыллэсь историзэ кылдытэ, тодосэз азинтэ, педагогъёсын, дышетскисьёсын но студентъёсын ужа но соослэсь устолыксэс будэтэ.

Тӧршоры тодосчилэн нимыз пуктэмын, малы ке шуоно кыл – со сӧзнэт. Котькуд кыл, сӧзнэт сямен, азинске но воштӥське дуннеен ӵош, мерлыкын воштӥськонъёсын ӵош. Солэсь уд кошкы. Кылэз ыштонтэм понна, солэсь аспӧртэмлыксэ но историзэ утён ужез ӵапак кылосбуръя тодосчиос нуо, со туж дуно
Ирина Крохина, Удмуртиысь дышетонъя но тодосъя министрлэн воштӥсез

Иван Таракановлэн но Геннадий Ушаковлэн дышетон но тодос удысын интзы сярысь ивортодэтъя «Удмуртия» агентстволы Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез, кылосбур тодосъя кандидат Вера Пантелеева вераз. Солэн кылъёсызъя, тодосъя докторъёс элькунысь дышетон, тодос но лулчеберет удысын шӧдскымон пытьы кельтӥзы. Кыкназы ик соос улонзылэсь бадӟым люкетсэ Удмурт кун университетын тыршизы: Тараканов – 55 ар, Ушаков – 40 ар.

Мон шуыны быгатӥсько, туала дышетӥсьёс-удмуртоведъёс ваньмыз но ортчемын, потэмын Таракановлэн школаез пыр. Соос ваньзы но солы куке экзаменъёс сётъямын, солэсь куке но лекциоссэ лыдӟемын. Соин ик со, студентъёсын ужаса, вуоно удмурт дышетӥсьёслэн дышетӥсьсы вал
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

vXTYI4v.jpg
Иван Таракановлэн ужъёсыныз адӟытон Фото: Наталья Тетерина © udmurt.media

Нош Геннадий Ушаков 1990-тӥ аръёсы Удмурт кун университетын дышетонъя проректор луыса ужаз. Та шуго-леко вакытэ тодосчилы университетэ выль дышетон программаосты но технологиосты пыртоно луиз. Со дыре ик Геннадий Ушаков удмурт кылэз азинтонэ но трос кужымзэ сётӥз.

Ас вакытаз, 1992-тӥ арын, Ушаковлэн кичӧлтэмезъя Удмурт кун университетын нимаз удмурт филологияя факультет кылдӥз. Со трос лэсьтӥз, удмурт кылэз тросаз факультетъёсын мед дышетозы шуыса. Вал сыӵе вакыт, куке удмурт кылэз факультатив амалэн яке быръем курсъёс амалэн асьме Удмурт кун университетысь вань факультетъёс дышето вал. Жаляса верано, со вакытъёс ортчизы, но ваньзэ сое радъяз вал Геннадий Афанасьевич Ушаков
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

Иван Тараканов но, Геннадий Ушаков но пӧртэм удысъёсъя паськыт тодон-валанъёсын висъяськизы. Кылсярысь, удмурт кылэз эскерон сяна, Геннадий Афанасьевич удмурт литературалы но саклык висъяз, педагогика тодосъя доктор та ӧръя учебникъёслэн, удмурт гожъяськисьёслэн творчествозыя статьяослэн авторез луэ.

VuMTKyl.jpeg
Геннадий Ушаковлэн ужъёсыныз адӟытон Фото: Наталья Тетерина © udmurt.media

Нош басьтоно ке Иван Васильевич Таракановез, со сыӵе классической, академической кылчи, соин ик туж паськыт вал ӧрез. Со одӥг ласянь выриз удмурт кылкуара ӧрез азинтонын, со вал лексиколог туж бадӟым, кыллюкамъёс но дасялляз. Озьы ик со выриз диалектология удысэн но. Нош докторской диссертациез удмурт кылэ тюрк кылъёслэн выжемзы пумысен
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

Со пусъе, тодос удысын Таракановлэн но Ушаковлэн ужъёссы туж бадӟым инты басьто но кема аръёс ӵоже уз вужме шуыса. Учебникъёс ласянь верано ке, дышетон амалъёс ялан воштӥсько, соин ик туннэ нуналлы тодосчиосты мукет авторъёс воштӥзы ни. Озьы ке но, тодосъя докторъёслэн нимъёсынызы куд-ог книгаос школаосын али но кутӥсько.

Геннадий Афанасьевич Ушаковлэн 6-тӥ класслы дасям удмурт литературая учебникез, соос сое дасязы вал Виктор Леонидович Шибановен ӵош, со учебник али кыкетӥзэ печатласькиз. Сое Виктор Леонидович Шибанов трослы выльдӥз, но Ушаковлэн фамилиез отын кылемын на, малы ке шуоно оглом концепциез Ушаковлэн отын вань на
Вера Пантелеева, Удмуртиысь Дышетон удысысь йӧскалык ужпумъёсты эскеронъя тодос институтлэн кивалтӥсезлэн воштӥсез

Ватсалом, тодосъя IV калыккуспо конференци 2 нунал кыстӥськоз. Туннэ ужрадъёс Удмурт йӧскалык театрын ортчизы, нош 12-тӥ коньывуонэ пыриськисьёс Удмурт кун университетын но Дэри ёросысь Изгуртысь шоръёзо школаын  ужалозы. 



Наверх
Вниз