Ижкар+19 °C
14 -тӥ оштолэзь 2021 Вирнунал
18+

Ижкарысь гурт возёсъя кун академилы — 75

  • 14160
  • 0
Ижкар / Удмуртия
Ижкарысь гурт возёсъя кун академилы — 75
Туспуктэм: Майя Бывальцева

Ижкарысь гурт возёсъя кун академи 2018-тӥ арын 75 ар тырмонзэ пусъе. Котырес лыдпус улсын ужрадъёс быдэс ар ӵоже ортчо, валтӥсьёсыз соос пӧлысь 18-19 коньывуонэ чакламын. Вылӥ дышетсконнилэн юбилеез азьын ивортодэтъя «Удмуртия» агентстволэн корреспондентэз академилэн дышетон ужъя проректореныз Пётр Акмаровен вераськиз но тодӥз, мар бордысен кутскиз вузлэн историез но кыӵе вормонъёсын дышетсконни данъяське.

Ижкарысь гурт возёсъя академилэн историез 1943-тӥ арын Москваысь вал вордонъя зоотехнической институт бордысь кутскиз. 1954-тӥ арын вылӥ дышетсконниез Удмуртилэн шоркараз выжтӥзы но гурт возёсъя кун институт кылдытӥзы. 1994-тӥ арын инстиут академилэсь инлыксэ басьтӥз. 

- Пётр Борисович, малы Москваысь институтэз ӵапак Удмуртие выжтыны муг кылдӥз?

Пётр Акмаров

Нырысь ик, асьме Удмуртие туж кулэ вал ӧнерчиос. Вылӥ дышетскемен гурт удысын ужась ӧнерчиос чик ӧй вал. <…> Куке учкизы, кызьы та шуг-секыт югдурез воштыны луоз, быръемын вал ӵапак сыӵе вариант - Москваысь зоотехнической институтэз татчы выжтыны.

Мукет паллань ке верано, 1954-тӥ арын Хрущёв кивалтэ вал ни. Солэн мылкыдыз вал Москваысь гурт удысэн ужась вылӥ дышетсконниосты палэнэгес келяны, соос гурт котыре матынгес мед луозы шуыса. Тӥни со кык валче мынӥсь югдуръёс тупаса, 1954-тӥ арын СССР-ысь министръёслэн кенешсы кутӥз сыӵе пуктэт, Ижкаре выжтоно шуыса та вылӥ дышетон ужъюртэз.

Дышетӥсьёс но Москваысь татчы лыктӥзы, тужгес умой дышетӥсьёс, материальной базазэс но келязы татчы Москваысь вагонъёсын поездэн. Удмурт Элькунысь кивалтӥсьёс но кылдытӥзы условиос, сётӥзы юртъёс, кытын интыяськоно вал та дышетскон юрт.

Кинъёс вал нырысетӥ студентъёс?

Пӧртэм калык вал. Но вераны кулэ, тани 1954-тӥ арын кӧня ке студентъёс Москваысь но ми доры выжизы. Нырысетӥ но кыкетӥ курсын дышетскись студентъёс Москваысь ми доры лыктӥзы, ми дорын соос быдтӥзы ни дышетсконзэс.

Со сяна, тани 1954-тӥ арын, академилэн удмурт музъем вылын ужаны кутскем дыръяз, Удмуртиысь егитъёсты кутыны кутскизы. Нырысь ик со ужась егитъёс вал, кинлэн мылкыдыз вал дышетскыны. Собере ёросъёсысь лэзьяло вал егитъёсты* кин школаез быдтэ, кинлэн дышетскыны мылкыдыз вань, кин умой ассэ возьматӥз. Тӥни сыӵе калыкез бичамы асьме институтын.

Со аръёсы кыӵе ӧнерчиосты дасяз институт?

Вераны кулэ, Москваын та институт ужакуз, вал зоотехникая гинэ ӧр, ӵапак валъёсты утялтонэн, валъёсты сюдон-эмъян. Татчы выжем бераз, 1954-тӥ арын, куке ми Ижкарысь гурт возёсъя институт луимы, со аре ик кыкетӥ ӧр усьтӥськиз – агрономия. <…> Соку ик кутӥмы абитуриентъёсты та кык ӧръёсы. Ог 200 адями кутэмын вал: ог сюэз агрономъёс, ог сюэз зоотехникъёс.

Бергес ни институтлэн бордаз кылдытӥзы инженерной факультет – механизация сельского хозяйства. Озьы ик туж кулэ луись вал, соку инженеръёс но уг тырмо вал. Тӥни 1957-тӥ арын нырысетӥ инженеръёс но дышетскыны кутскизы ни. Ог 150 адями кутэмын вал со инженерной ӧръя.

Нош туэ студентъёс кӧня ӧнеръёсъя дышетско?

Выль амалъя вань куинь уровень вылӥ дышетсконын: бакалавриат но специалитет – со одӥг уровень, кыкетӥез – магистратура, куинетӥез – аспирантура. Ваньмыз та уровеньёс милям вань. Бакалавриатын милям 12 ӧр усьтэмын, кык ӧр специалитетын усьтэмын, укмыс ӧр магистратураын усьтэмын, вить ӧр усьтэмын аспирантураын. Ваньмыз со 28 ӧр, соос ваньмыз огазеяськемын, ваньмыз сямен ик соос гурт удыслы ӧнерчиосты дасяло.

Ваньзэ верано ке, ог 6 сюрс 500 адями дышетске, соос пӧлысь ӝыныез заочной амалэн дышетско, ӝыныез – очной амалэн. Арлы быдэ ог 1700 егит ӧнерчиос пото, очной амалэн соос пӧлысь ог ӝыныез.

Ижысь гурт возёсъя кун академиын

14 фото

Кӧняез соос пӧлысь гуртэ ужаны берытско?

Вераны кулэ, милям сыӵе ӧнеръёсмы вань, кудъёсыз ӵапак карын ужаны тупало. Тани «Технология переработки продукции сельского хозяйства», «Технология общественного питания». Яке вань тани «Лесное хозяйство». Отын гуртын ӧвӧл, тэльын ужаны кулэ.

Ог 80 процентэз ужало ас ӧнерзыя, кудзэ басьтӥзы соос академиын. Но гуртэ ужаны ог 60 процентэз гинэ мыно. Валамон, соос ваньзы гурт удысын гинэ уг ужало, кин ке но администрацие интыяське, кин ке школае интыяське. Пӧртэм интыосы соос интыясько, но ӵапак ас ӧнерзыя шедьто уж.
Пётр Акмаров, Ижысь гурт возёсъя кун академилэн проректорез

Со умой лыдпус. Тани верано ке, быдэс Росси Федерациын академи басьтэ 14-тӥ инты вылӥ дышетсконниос пӧлын уже интыяны быгатэмезъя.

Вань-а вуоно ӧнерчиослэн луонлыксы басьтэм тодон-валанъёссэс ужын эскерыны?

Гужем нуналъёсы милям практикаосмы луыло. Кыкетӥ, куинетӥ курс бере ми лэзиськомы егитъёсты со предприятиосы, кытын соослы матынгес ӧнерзыя, улон интызыя. Учкыны кулэ, быгатоз-а со отын ассэ шедьтыны, кельше-а солы со уж, кудзэ со быгатоз ужаны дышетскемзэ быдтэм бераз. Ӵемысь озьы луэ, кин кытын практика ортче, кинлы кытын кельше, отчы ик соос ужаны мыно берло.

Ижысь гурт возёсъя академилэн мастерскойёсаз

3 фото

Нош кин практика дыръя кельшымон интыуж ӧз шедьты, соослэн кыӵе сюрессы?

Котькуд аре люкаськом вакансиосты ёросъёсысь, министерствоосысь, кытын, кыӵе вань буш интыос егит ӧнерчиосты отчы интыяны шуыса. Котькуд аре соос милемлы лэзьяло, кыӵе кулэ ӧнерчиос соослы, кыӵе со ӧнерчилы уждун быгатозы сётыны, кыӵе мерлыко гарантиос быгато сётыны: вань-а садиксы, школазы, вань-а газзы, тылзы, сюресъёссы. <…> Куддыръя асьсэос но кивалтӥсьёс лыкто ми доры асьсэлы ӧнерчиез бырйыны.

Дышетскон сяна, академиын тодосъя уж ялан нуиське. Со ужъемышъёсты улонэ пыӵатыны быгатӥськоды-а? Кытысь со понна коньдон шедьтӥськоды?

Туала улонын уг луы ужаны азинтӥськыса, ӧд ке куты тодослэсь (наукалэсь) вормонъёссэ. <…> Тросэз гурт возёсъёс ми доры ӵем вазиськыло юрттыны курыса выль технологиосты пыӵатыны ужазы яке выль техникаез уже кутыны, чакланы сое, тупатъяны сое. Юрттыса возёсъёслы, тыршиськомы пыӵатыны асьме тодон-валанъёсмес гурт удысэ.
Пётр Акмаров, Ижысь гурт возёсъя кун академилэн проректорез

Тани кык-куинь возёсъёс, кудъёсыз туж матэ милемын ужало Вавож ёросын, Вотка ёросын, соос пыро азьмынӥсь возёсъёс пӧлы, малы ке шуоно соос тодосэн ӵош ужало. Тани, шуом, Мичурин нимо колхоз Вавож ёросысь, СПК «Колос» Вавож ёросысь, «Пихтовка» Вотка ёросысь.

Али тросэз возёсъёс лябӟылэмын, коньдон висъяны уг быгато. Соин ик ми вазиськиськом асьме Удмурт Элькунысь кивалтэтлы но, Росси Федерациысь гурт возёсъя министерстволы но, мед сётозы вал милемлы луонлык бюджет чотын со тодосъя емышъёсты пыӵатыны, кудъёсызлы бадӟым коньдон кулэ, кудъёссэ возёс уг быгаты ачиз висъяны. Тӥни сыӵе чакланъёсты учкыса, милемлы кӧня ке висъяло. Валамон, со коньдон тырмыт ӧвӧл, но висъяло тани етӥнэз азинтон понна, тодосъя ужез али федерал бюджет чотын нуиськомы. Со сяна, выль пудо-живот, скал поттонэз но азинтӥськомы федерал коньдон чотъя.

Дышетсконлэсь ваньмонзы дыръя маин студентъёс выро?

Студентъёслэн пӧртэм луонлыкъёссы асьсэ дырзэс умой ортчытыны. <…> Тужгес тунсыкоез - спортэн, лулчеберетэн вырыны, тросэз тодосэн выро.
Пётр Акмаров, Ижысь гурт возёсъя кун академилэн проректорез

Верано ке спортысь вормонъёсмес, милям выпускникмы Дима Япаров Сочиын Олимпи шудонъёслэн вал призёрез. Али со аспирантураын дышетске ми дорын. Со сяна, милям студентъёсмы туж умой куасэн бызьыло. Асьсэдыз возьмато гиряез ӝутканъя, шахматэн шудонъя. Верано ке оглом Росси Федераци сярысь, гурт возёсъя вылӥ дышетсконниос пӧлын ми 4-5-тӥ инты басьтӥськомы вань спортивной шудонъёсъя. Нош куасэн бызьылонъя, биатлонэн яке гиряосын, отын ми котьку призёръёс луиськомы.

Кинлэн ке спортэн выремез потэ, кинлэн ке тодосэн. Тодосэн вырись студентъёслэн но бадӟымесь азинсконъёссы. Котьку но соос кыӵе ке олимпиадаосы, семинаръёсы, конференциосы ветлыса, кыӵе ке но кузьымъёс ваё.

Куинетӥез – культурно-массовой уж. Вань пӧртэм амалъёс милям: эктон кружокъёс, кырӟан кружокъёс, ог 12 пӧртэм-пӧртэм кружокъёс ми дорын ужало. <…> Элькунын ми котьку 1-тӥ, 2-тӥ интыос басьтӥськомы. Тани, шуом, общежитиос куспын ӵошатсконъёсын ми котьку но призёръёс луиськом. Котькуд аре ортчытӥсько студенческой КВН вожвылъяськонъёс, отын но ми призовой интыос басьтӥськом.

Мукет кунъёсын кусып возиськоды-а? Быгато-а студентъёсты кун сьӧры потаны?

Котькуд аре милям студентъёсмы кунгож сьӧры потало. Ӵемысь со практика дыръя луэ, гужем. Соос фермер возёсъёсы азинскем кунъёсы Европае потало. <…> Швейцариен, Германиен, Чехиен вань договоръёсмы. Со кунъёсы мыныса, студентъёс учко, кызьы ужало кунгож сьӧрын фермеръёс, собере татчы бертыса, сое асьсэ ужазы пыртыны тыршо. Сыӵе луонлыкъёс кылдытэмын студентъёслы.

Кунсьӧр стажировка
Академиын дышетскисьёс стажировкае кунгож сьӧры но ветло Фото: Ижысь гурт возёсъя академилэн пресс-службаез © izhgsha.ru

Вашкалазэ но туалазэ верам, нош азьланьзэ учконо ке, кыӵе чакланъёсты?

Котькуд аре ми тыршиськом чакласа возьыны, кыӵе ӧръёсъя, кыӵе ӧнеръёсъя кулэлык гурт удысын. Сое чакласа, ми туэ усьтӥськомы куинь выль ӧр, кудаз кутыны кутском ни сояз аре, 2019-тӥ арын.

Нырысь ик, средне-специальной дышетскон луоз бухгалтер учёт но экономика. Азьвыл та ӧнеръя ум дасяське вал. Кыкетӥез ӧр – со гурт удысын азьвыл туж тунсыко вал, али малпасько ӝутыны сое – гидромелиорация. <…> Куинетӥез ӧр «Технология продукции животноводства» шуиське, ӵапак кызьы со поттэм продукциез переработать карыны но ӝӧк вылэ сое вуттыны.

Выль ӧръёс усьтон понна дышетӥсьёслы туж трос тыршоно луэ. Гожъяськонэн валче, тырме-а дырзы студентъёсын ужаны?

Али дышетонын выльдонъёсъя трос бумага гожъяськон. Дышетӥсьёслэсь со дырзэс басьтэ. Но ми тыршиськомы юрттыны дышетӥсьёслы. Нырысь ик ужазы автоматизация пыӵатӥськомы. <…> Компьютер техника трос пыӵатэмын ужазы. Со сяна, ми материальной стимул сётӥськом дышетӥсьёслы. Кин выльзэ гожтэ, выль программа гожтэ, солы ватсаса коньдон сётӥськомы. <…> Дышетӥсьёс сое валало. Ми юрттэт сётӥськом бере, соос но дырзэс уг жаляло: бумага но гожто, студентъёслы но дырзы тырме на. 



Наверх
Вниз