Ижкар-1 °C
25 -тӥ толшор 2021 Вордӥськон
18+

Вуриськись Вероника Галанова: маскарад костюм возьдаськись адямилы усьтӥськыны луонлык сётэ

  • 132
  • 0
Пичи Пурга / Удмуртия
Вуриськись Вероника Галанова: маскарад костюм возьдаськись адямилы усьтӥськыны луонлык сётэ
Туспуктэм: Руслан Нуриахметов

Матэктэ Выль ар. Нылпи садъёсын, школаосын Тол Бабаен но Лымы нылэн кыз котырын шулдыръяськонъёс ортчо. Нош азьпалан – Вожодыр. Анай-атайёс нылпиоссылы пӧртэм костюмъёс дасяло: лудкечпи, гондырпи, ӟичыпи, бубыли, чеберай, эксэй, Аладдин, Эльза но мукетъёссэ. Кин ке дасьсэ костюм басьтэ, нош кин ке ачиз вурыны тырше. Берпуметӥосызлы пичияк юрттэт дасяны но валэктонъёс сётыны курыса, ивортодэтъя «Удмуртия» агентстволэн корреспондентэз суредасьлы, вуриськисьлы, Пичи Пургаысь «Удмурт дэрем» студилэн одӥгез кивалтӥсезлы Вероника Галановалы вазиськиз.

Вероника Галанова пичи дырысеныз вуриське но суредаське. Азьвыл Пичи Пургаысь ёрос лулчеберет юртын суредась луыса ужаз, вуриськон ужзэ дораз, ваньмон дыръяз, нуиз. Нош ньыль ар талэсь азьло яратоно ужъёссэ интыенызы воштӥз, табере вуриськись луыса ужа. Вуриськон ужаз суредаськон быгатонлыкез но туж юрттэ.

Кибашлы доры ӵем гинэ пӧртэм дӥсьёс вурыны курыса вазисько. Нош Выль ар азьын – маскарад костюмъёс юаса но. Но нылкышно ӵемысь валэктонъёс сётэ но асьсэлы вуриськыны ӵектэ, со секыт уж ӧвӧл ук, шуэ.

Заказ сётыны малпакузы, озьы-озьы лэсьтэ асьтэос шуисько. Материал басьтыкузы ик, басма вылэ ик суредаса сётӥсько. Сэре сое коть киын, коть машинаен вур
Вероника Галанова, вуриськись

Вероника Галанова валэктэ, ас киын вурем костюмлэн энергиез но лек синъёслэсь утись кужымез золгес луэ, со возьдаськись адямилы усьтӥськыны луонлык сётэ. Со сяна, сое лэсьтон бордын ужаны туж тунсыко но аспӧртэм.

Выкройка нылпилэн дӥськутэзъя, кылсярысь, футболкаезъя вандыны луэ, пусъе вуриськись. Нош куке костюмлэн инъетэз дась, соку ини фантазилэн ужез кутске. Костюмез котькызьы но чеберъяны, кулэ образлы тупась карыны луэ. Вероника Галанова акрил буёлъёсын суреданы яке басма юдэсъёслэсь маке лэсьтыса вурӟыны, тусбуйзэс аквагримен суреданы ӵектэ.

Нош кыӵе басмаос костюм вурыны тупалозы, со чебер но, дунтэм но мед луоз шуыса? Вуриськись пусъе, соос доры вазиськисьёс ӵемысь 250 манетлэсь дуно медаз луы шуыса чакласа материал басьто.

Кылсярысь, габардин, матовой, умой, юн материал, яке флис басьто, соиз трос уг кошкы. Куке соку, соослэсь ик коньдонзэс шыръяса, флис интые фетр басьтэ шуыса лэзиськом, формазэ умойгес возёз шуыса. Ӵемысь урдсэтлы мынӥсь басмаосты басьто. Чилясь дэремъёслы тесьмаосмы, лентаосмы луо, соосты ӵектӥськом. <…> Со сяна, шторалы мынӥсь тюль, вуаль кутыло. Озьы дунтэмгес луэ, малы ке шуоно солэн пасьталаез бадӟым
Вероника Галанова, вуриськись

Вуриськись пусйиз, нылпилы костюм чебер но аспӧртэм сяна, каньыл луыны кулэ шуыса.

Озьы ик Вероника Галанова вуись Выль арлэн тодметпусэзъя ошпи костюм лэсьтыны валэктӥз. Мугорызлы жилет но шорты вурыса яралоз шуыса пусйиз. Нош йырыз пумысен ӧжыт тыршыны кулэ - йыре понон капчи но мед луоз, котырак учкыны медаз люкеты.

Умойгес кепка вылэ кыӵе ке объёмъёс ватсаны, ныр, кымыс но сюръёс. Небыт шудонъёс шоры учкыса но сое луоз. Эшшо капчигес ке, сюръёс но пельёс гинэ луэ лэсьтыны, кылсярысь, ыжгонлэсь гындыса. Со капчи луэ. Пушказ ез поныса, сое котькызьы куасалтыны луэ. Нош ымнырзэ озьы ик аквагримен суреданы
Вероника Галанова, вуриськись

Со сяна, вуриськись ошлы, «Холодное сердце» мультфильмысь Эльзалы, бубылилы но «Фиксики» мультфильмысь Симкалы костюм лэсьтыны схемаос суредаса сётӥз.

Маскарад костюмъёслы схемаос

4 фото

Нылкышно аслаз нылпиосызлы но трос гинэ костюмъёс вурылӥз шуыса вера. Но али доразы одӥг павлин костюмзы гинэ кылемын на. Мукетъёсыз ваньмыз кинлы ке сётъямын.

Куке но мусо лудкеч вал, ошкем пелё капюшонэн костюм вури вал, ымнырзэ аквагримен суредай. Аборигенъёс но вал, мочалкаослэсь но материалъёслэсь юбка но мар карылӥм
Вероника Галанова, вуриськись

Со сяна, вуриськись доры шуг лэсьтӥськись, магазинысь шедьтонтэм костюмъёс вурыны курыса вазиськыло. Озьы, лымыпогъёслы, гномъёслы комбинезонъёс кылдылӥзы.

Чакласьком, адямилы умой мед луоз шуыса со костюмен, ветлэмез мед луоз. Кылсярысь, шуом, соос лымыпогез синтепонэн карыны туртто вал. Учкиськом, нылпи садын пӧсь, пӧсялозы. Ми соослы фатин яке ситец ӵектӥм. Омыр мед ветлоз шуыса
Вероника Галанова, вуриськись

Озьы ик Вероника Галановаен «Эктоника» ӵектос валче ужалля. Соослы кибашлы Пунылэн арезлы пуны костюм, Комаклэн арезлы «Рататуй» мультфильмысь комак костюм вурылӥз. Озьы ик Капитан Америка выллем Человек Удмуртия геройлы костюм, «Звёздные войны» киноысь Дарт Вейдерлы плащъёс дасялляз. Соосты интернетысь учкыса вурылӥз, чакласа, кыӵе материал тупалоз, кызьы вандыны умой луоз. 

Вероника Галановалэн ужъёсыз

5 фото



Наверх
Вниз