Ижкар-3 °C
24 -тӥ тулыспал 2020 Вордӥськон
16+

Кӧня кыллы дышетоно покчи нылпиез: малпанъёс но дышетон амалъёс

  • 1259
  • 0
Ижкар / Удмуртия
Кӧня кыллы дышетоно покчи нылпиез: малпанъёс но дышетон амалъёс
Фото: Михаил Шустов

Макем трос кылъёсты тодэ адями, сокем умой. Та веранлы нокыӵе валэктонъёс кулэ ӧвӧл. Но ку но кызьы дышетоно пӧртэм кылъёсты? Кыӵе кылын вераськоно вож нуныен кык кыло семьяын? Яра-а огдыре кыксэ ик кылъёсты дышетыны? Удмуртиысь Калыкъёслэн эшъяськон юртазы ортчем кыккылолыкъя семинарын анай-атайёс ӧнерчиосын ӵош та юанъёслы валэктонъёс утчазы. Пумиськонэз радъяз «Билингва. Кыккылолыкъя удмурт центр».

Анай-атайёслэн юанъёссылы валэктонъёс сётыны тыршиз философи тодосъя доктор, кыккылолыкъя ӧнерчи, Римын (Италия) кӧснуналъёсы ужась ӟуч школаын дышетӥсь Лариса Широбокова-Монако. Со вань ужан амалъёсты аслаз семьяяз эскере. 

Фото: Михаил Шустов

«Бадӟым» но «пичи» кылъёс сярысь

Татын вакчияк валэктыны кулэ бадӟым но пичи кыл сярысь. Бадӟым кыл — со котырысь кыл яке кыл, кудӥныз тросэз верасько. Пичи кыл — со кыл, кудӥныз улон интыын ӧжытгес адями вераське, со шергес кутӥське. Озьыен, Удмуртиын бадӟым кыл луэ — ӟуч, нош пичи — удмурт. Кунгож сьӧрысь кунын пичи кыл луэ мукет кунысь лыктэм анайлэн яке атайлэн кылыз.

«Ми кутскимы итальян но ӟуч кылэз дышетыны. Со туж чебер вераське итальян кылын, суратэк вераське, ӟуч кылын вераське. Собере мынам анай-атайёсы удмуртэсь бере, мон ачим телефон пыр но, скайп пыр но удмурт кылын вераськисько котьку. Ми быдэс гужем улӥськом Мувыр гуртын Шаркан ёросын. Соин со али кутскиз ни валаны, трос кылъёс тодэ ни удмурт кылын. Собере мон али нимысьтыз кутски ини — нуналаз одӥг час, каллен-каллен мон сое удмурт кылэ пыртӥсько», — вераз Лариса Широбокова-Монако.

Фото: Михаил Шустов

Ольга Тойдорова ужрадэ Балян пиеныз лыктӥз. Семьязы кык кыло: атайзы ӟуч кылын гинэ вераське, анайзы удмурт кылэз лябытгес ке но, тодэ. Али удмурт кылъя курсъёсы ветлэ. Пизэс ӟуч кылын дышето но Ольга Тойдорова ас кылыныз но вераськыны тырше, пичи пиез мар но со вала ни. «Нимыз удмурт бере, удмурт кылэз дышетыны кулэ. Татчы, но ваи мед кылоз шуыса, кызьы мукет нылпиос верасько», — вераз егит анай.

3 арескозяз нылпилэн котыраз 80 процентлы «пичи» кыл гинэ чузъяськыны кулэ

Паськыт вӧлмемын малпан, нылпиен пичиысеныз ик кык кылын вераськоно ке, со сураське но бер вераськыны кутске шуыса. Лариса Широбокова-Монако соин соглаш ӧвӧл. Солэн верамезъя, Римысь ӟуч школае 200 пинал ветлэ, ваньзы итальян но ӟуч, озьы ик англи кылын верасько. Со сяна, тросэз анайзыя яке атайзыя «пичи» кылъёсты но тодо: молдаван, грузин, армян… Соин ик, кыкылолыко пиналъёс бер вераськыны кутско шуыса вераны уг яра, лыдъя тодосчи.

Фото: Михаил Шустов 

«Но пӧртэм учыръёс луо. Кыӵе семья сярысь вераськиськомы? Со тёпак удмурт ке, кулэ кутскыны удмурт кылын гинэ, 2–3 арескозь мед луоз удмурт кыл, кышкано ӧвӧл. Урамын со ӟуч кылэз кылэ, школаын ӟуч кылэз кылэ, ӟуч кыл вормоз. Соин ик мон малпасько, пиме но али учкыса малпасько, 3 арескозь нылпилэн котыраз 80 процентлы пичи кыл луыны кулэ. Нош вераськиськом ке, атай ӟуч, анай удмурт — соку ӵош: атай ӟуч сямен гинэ, анай удмурт сямен гинэ. Ми озьы кутскимы — атаймы итальян кылын гинэ вераськиз, ӵыжы-выжыосмы итальян кылын гинэ верасько, мон вераськи пиеным ӟуч кылын. Али тани кутски ини… ӟучо-удмурто карыны сое выриськомы. Но одно ик кулэ ӵош, огдыре», — пусъе Лариса Широбокова-Монако.

Дышетон амалъёс сярысь

Кыккылолыко нылпиез будэтонын пӧртэм модельёс вань.

  • Одӥг анай-атай — одӥг кыл
  • Семьяын одӥг кыл, мерлыкын — одӥг кыл
  • Одӥг дыр — одӥг кыл
  • Одӥг югдур — одӥг кыл

Суро семьяосын тужгес паськыт вӧлмемын «одӥг анай-атай — одӥг кыл» модель. Кылсярысь, атай ӟуч кылын гинэ вераське, нош анай удмуртэн, ӟучез луоз «атайлэн кылыз», нош удмуртэз — «анайлэн». Соку котькудӥз нылпиен аслаз кылыныз  ӵемгес вераськыны кулэ.

«Семьяын одӥг кыл, мерлыкын — одӥг кыл»: семьяын одӥг кылын гинэ верасько, шуом, удмурт кылын, нош дорысь потыса — ӟуч кылын гинэ. Кунгож сьӧрез басьтоно ке, дорын — ӟуч кылын гинэ (суро семьяын яке ӟуч семьяын), нош мерлыкын — со кунлэн кылыныз.

«Одӥг дыр — одӥг кыл»: кылсярысь, одӥг нунал (арня) удмурт кылын гинэ вераськоно, мукетаз — ӟуч кылын гинэ.

«Одӥг учыр — одӥг кыл». Кылсярысь, вузкаронние, парке ветлыку, тодмоосын пумиськыку нылпиен одӥг кылын гинэ вераськоно, шуом, удмурт. Нылпи дышыны быгатэ, со учырын удмурт кылын гинэ вераськыны кулэ шуыса

Фото: Майя Бывальцева

Тупась амалэз бырйыса, соя ялан ужано. Дорын луыны кулэ трос книгаос, шудонъёс, крезьгур. Нылпи ӟуч кылын вера ке, анай сое ик удмурт кылын мед вералоз. Пинал кылъёсты шонертэм вера ке, анай тупатыны кулэ. «Но «тон янгышаськод» шуыны уг яра, озьы нылпилэн дышетскыны мылкыдыз усёз, тупатоно бӧрсяз ик шонер кылэз вераса но нунал ӵоже, тупамон вакытэ, сое мукет предложениын вералляно», — ӵектэ Лариса Широбокова-Монако.

Солэн верамезъя, умой луысал удмурт кылын гинэ вераськись няня кутыны (удмурт кылэз утён сярысь вераськиськомы ке — ред.), нуналаз 1–2 часлы ке но. Со ӟуч кылэз чик медаз поттылы. Нылпи амалтэк удмурт кылын вераськоно луоз. Ӵыжы-выжыосын но эшъёсын та амал уг ужа. Нылпи соосын ӟуч кылын вераське ке, соос но ӟуче выжо. Нош няня ужамез понна коньдон басьтэ бере, со азе чурыт курон пуктыны луэ.

Анайлы юрттӥсь кужымъёс сярысь

Вань сыӵе но учыръёс, куке нылпи кылэз вала, но уг вераськы. Семинаре лыктэм анай-атайёс понна та одӥгез тужгес сюлмаськытӥсь юан вылэм. Татын дорын вераськон тырмыт уз луы ни, лыдъя Лариса Широбокова-Монако. Нылпи «пичи» кылэз семьялэсь палэнын но кылыны кулэ, соку со азьын кыллэн авторитетэз луоз но пинал мыло-кыдо вераськоз. Кулэ кылэз кутон инты, сое юри но кылдытыны яра. Кылсярысь, со кылын вераськись нылпиосын шудонъёс ортчытъяны, ӵошен экскурсиосы ветлыны. Пичи кылэз утьыны анайлэн кужымез огназ уг тырмы — кулэ юрттӥсь. Тодосчилэн верамезъя, татын туж умой юрттыны быгато удмурт кылын ужась азинтон центръёс, шутэтскон нуналъёсы ужась школаос. Но отын одно ик мед луоз нимысьтыз ужанрадлык, классысь классэ потон, эркын вераськон понна пумиськонъёс тырмыт ӧвӧл.

Фото: Михаил Шустов

Ижкарын туннэ сыӵе центръёс но, школаос но ӧвӧл. Солы нырысетӥ вамышен лыдъяны яра, дыр, «Удмурт нылкышно кенеш» огазеяськонлэсь «Шудон корка» ӵектоссэ. Ог 8 ар талэсь азьло солы кутскон сётӥзы вал Анастасия но Миклош Деметеръёс (удмурт-мадьяр семья). Собере соослэсь ужзэс азьланьтӥз «Удмурт нылкышно кенеш», Калыкъёслэн эшъяськон юртсы но Йӧскалык политикая министерство юрттэмен. Огазеяськонлэн кивалтӥсез Надежда Степанова верамъя, «Шудон коркалэн» валтӥсь ужпумез — удмурт кылын вераськись пиналъёслы ӵош шудыны, кылэз волятыны луонлык кылдытон. Пумиськонъёс толэзяз 1 пол чакламын. Отын пиналъёсын выжыкыл пукто, мультфильмъёс учко, киужъёс лэсьто. Надежда Степанова лыдъя, нылпи садэ мынытозь пиналэн удмурт кылын гинэ вераськыны кулэ шуыса, ӟучезлы со отын но ӝог дышоз. «Туж умой валаськомы, таӵе пумиськонъёс ӵемгес луыны кулэ шуыса, но али луонлыкмы ӧвӧл», — вераз со.

Фото: Михаил Шустов

«Шудон коркаын» Лариса Широбокова-Монако «Шара лыдӟонъёс» нимо дышетон амалэн тодматӥз. Удмурт кылын выжыкылэз яке веросэз шара лыдӟем сяна, пиналъёс веразы мар суредамын книгаын, озьы ик асьсэды геройёсыз интыын эскеризы. Таӵе амалэз котькуд семья ас дораз кутыны быгатэ.

Фото: Михаил Шустов

Оксана Крылова 7 аресъем нылыз удмурт кылзэ вунэтэ шуыса сюлмаське. Ачиз со удмурт, атайзы — ӟуч. «3 аресозь со милям туж умой вераськиз удмурт кылын. Но котькуд семьяын кадь ик, милям но сыӵе югдур кылдӥз — ми потӥмы садике… Кӧня быгатӥ мон кылме кутӥ, но картэ но ӟуч кылын вераське бере, озьы ик дорын но ӟуч кыл тросгес луиз. Эшшо бадӟым каре кошкимы. Ижын кутысал дыр ай — анаен но атаен, ӵужаен но ӵужатаен, песянаен но песятаен кызьы ке… Но кошкимы бадӟым каре, со копак ыштӥз удмурт кылзэ. Валаны ваньзэ туж умой вала, но уг вераськы. Таӵе пумиськонъёсын бугырске мар ке пушкам, выль кужым сётэ, вань мылкыд. Мон сое удмурт кыло лагере нуллӥ, туж тунсыко вал. Мон валай, солэн потэ вераськемез удмурт кылын. Котьку нунал пичиен-пичиен нылпиен вераськоно», — лыдъя Оксана Крылова.

«Билингва» удмурт центр сярысь

Кылъёсты дышетон пумысен юанъёслы валэктонъёс сётыны тырше кыккылолыкъя «Билингва» удмурт центр. Со кыкетӥ арзэ ужа ни.

«2015-тӥ арын тросгес малпамы, кыӵе со сайт луыны кулэ, кыӵе люкетъёсыз со сайтын луыны кулэ, кыӵе материалъёс ми отчы поттомы. Толсур толэзьысен кутскимы ини материалъёс тросгес печатланы, та дырозь тестовой вариантэн ужаз вал сайтмы. Собере, ку сайтамы туж трос материал бичаськиз, милем тунсыко потӥз: лыдӟо-а со материалэз, кулэ-а со анай-атайёслы, мар уг тырмы сайтамы? Соин ик ми чакламы радъяны семинаръёс, кытын ми пумиськиськомы адямиосын, адӟиськомы анай-атайёсты, соос верало асьсэлэсь, шуом, шугъяськонъёссэс, мар соослы уг тырмы. Озьы ми чакламы, сайтмы куинь сыӵе бадӟым люкетэн луоз. Нырысетӥез — анай-атайёслы сӥзем люкет, кытын печатламын огъя, шуом, кыккылолык сярысь ужъёс: тодосчиослэн ужъёссы, логопедъёслэн ужъёссы но психологъёслэн ужъёссы. Кыкетӥез — нылпиослы люкет, кудаз пыртэмын нылпиослы йырвизьзэс сынась ужъёс, пӧртэм шудонъёс, пӧртэм веросъёс, мадиськонъёс но мукетыз, пӧртэм сыӵе нылпиослы фольклорно-литературной жанръёс. Со сяна, нимаз малпаса, потӥзы удмурт нылпиослы логикалы, мышленилы заданиос. Куинетӥез люкет — дышетӥсьёслы, визьнодасьёслы, кытчы пыртэмын урокъёслы, занятиослы конспектъёс но методикая ужъёс», — валэктӥз ӵектослэн куроторез Татьяна Волкова.

Фото: Татьяна Волкова

Сайт котькуд нунал сямен выльдӥське. Отын пото удмуртлыкен, удмурт нылпиосын, школаен, нылпи садэн, анай-атайёсын герӟаськем иворъёс. Со сяна, котькуд арняе выль материалъёс пото.

«Ми тросгес саклык висъяськомы семьяен ужанлы. Вуоно арысен, 2017-тӥ арысен, малпаськомы пуктыны эксперимент: кутыны кӧня ке семьяосты, кудъёсыз соглаш кариськозы, но эскерыны, кыӵе, шуом, условиос умой луо кылэз азинтонлы семья пушкын», — вераз Татьяна Волкова.

Йылпумъяса вераны луэ, пичи дырысен кык яке солэсь тросгес кылъёсты тодон азьланяз трос кужымез но дырез шыръяны юрттоз. Пиналъёс кылэз шудон пыр дышето но сое умойгес пыӵато. Англи визькыл вера: «Умой анай-атайёс нылпиоссылэсь 20 ар улонзэс шыръяло». Сыӵе анай-атай луыны тыршыны кулэ асьмеос но.

Фото: Майя Бывальцева

Наши партнеры

Наверх
Вниз